尋找方向
終於等到再睇醫生的日子了....
o係過去的幾個星期, 自己心中都不停的計算, 小寶而家幾多週呢, 到底到幾時先有心跳呢.... 我o地o既小寶係唔係健康咁成長呢..... 我有無唔小心咁整到佢呢?
o黎到見醫生的日子, 即係我地又可以見見小B了.....
嘩, 見到小B喇, 雖然唔係好懂得點樣睇... 但係好明年見到小B了.... 仲有一下一下既心跳.... 望到佢一下一下咁閃呀閃... 我覺得佢好實在, 呢個就係我同張先生的小寶寶了..... o個一刻真係好感動啊...
小寶, 你要叻叻呀.... 要做個健康快樂的張家小寶啊!
一連四天的復活節假期開始了....
寶寶, 知嗎? 我們的節目排得滿滿的..... 由於星期天(3/23)是你五叔公再婚的大喜日子, 遠居於美國的六叔公同姑婆都回港了, 而今天 (3/21), 就是媽媽這個"莫"大家族到郊外燒烤的日子... 我o地今日去了香港仔呢...
由於媽媽今日好早就起身了, 而你爸爸又在熟睡中, 所以我便"偷偷地"過了公公婆婆家... 哈哈, 開門的一刻, 我o地嚇了公公婆婆一下, 因為佢地都奇怪點解媽媽會咁早起身呢..
因為公公婆婆諗住先出去, 所以當佢地出門口的時候, 媽媽都同你返屋企了. 不過, 返屋企前, 當然要帶你去食飽飽先啦... 咁, 今日, 媽媽就同你去食大家樂啦! 可惜, 太多人了, 只好買外買返屋企啦... 哈, 你估下懶訓爸爸起身未???
不出媽媽所料, 爸爸真的未起身呀.... 好啦, 就等媽媽先同小寶食早餐啦.... 10點鐘, 懶訓爸爸終於起身了, 看到我o地食剩之外買餐盒, 仲話諗住同我o地去大家樂食早餐..... 點知, 我o地巳經食o左lu......
12點鐘, 終於等到Alex姨丈架車喇, 我o地可以同恩平表哥同恩同表姐一齊出發去BBQ喇! YEAH!!!
我o地今日食o左好多o野呀... 爸爸好好呀, 雖然熱, 佢都不停咁燒d 食物俾我同小寶你食呀..... 我o地燒野食到差唔多四點幾先走呀...
BBQ 後, 我o地到了大伯公o係灣仔的屋企坐, 等恩平表哥同恩同表姐沖完涼, 我o地仲去了霞姨媽屋企呢... .
BB, 不過公公今晚忽然間唔舒服, 又吐又發燒, 婆婆因為擔心公公, 佢o地兩個都無去到食晚飯呀.... 知嗎? 公公婆婆都老了, 佢地o既健康總係令媽媽擔心的.... 小寶, 你要健康同聽話, 10月出世後要做個開心小B, 好好錫公公婆婆, 討佢地歡喜呀....
雖然巳在威爾斯登記, 但係與此同時, 我o地都要到健康院登記啊!
今日媽媽無叫婆婆陪, 只係自己同你一個人去呢! 八點半去到健康院, 想不到診所還未開診呢, 所以我o地唯有等一陣吧..... 今天可以拿到二號籌, 都算好吧, 對嗎?
驗小便, 度高, 量體重, 血壓, 寫下所有個人資料病歴, 就是見醫生姐姐同驗血了... 因為媽媽今早無食早餐, 血管又幼小, 護士姐姐要媽媽食完早餐先再返o黎抽血呀.... 無辦法啦, 唯有同你去大家樂吃個早餐再返去啦....... 我o地的早餐豐富了, 蘿蔔糕, 炒蛋, 雞肉, 蕃茄通粉, 熱華田...... 嘩, 飽晒喇, 要返去抽血同聽講座了....
十一點開始聽了一個三十分鐘的講座再去抽血, 知嗎? 護士姐姐的表現真的令媽媽很驚怕呢... 因為一直都好像找不到血管似的, 幸好, 經過一大番研究後, 最終都可以抽到四筒血.... 希望一齊正常, 而你就一日一日長大, 做個健康快樂的張家小寶啦.!
自從証實懷有寶寶, 預產期為2008年10月28日後, 接下來要做的, 就是要為迎接這個小生命做一連串的準備工夫, 好似要到醫院排期啦, 做檢查等等...!
三月十日(星期一), 婆婆今日陪媽媽到威爾斯登記...... 什麼醫生也無得見呀.... 只是排期直至四月二十一日(星期一) 同五月五日(星期一) 才回來檢查呢.... 寶寶, 我們要等一陣子了..... 你要乖呀!
哈.... 雖然我o地今日見不到醫生叔叔/姨姨, 但是你就得到你的第一份禮物呢!係乜? 就是惠氏送俾你的口水肩啊! 雖然唔係好靚, 但係你放心呀, 因為爸爸媽媽一定會買d更靚o既俾你呀.... Winnie The Pooh 公仔好唔好? 因為媽媽鍾意嘛.... 哈哈!
寶寶, 好不容易才等到三月八日這個大日子....
知嗎? 因為媽媽終於可以去睇婦科醫生, 看看你是否真的在媽媽的肚子裡.... 由屋企到達診所, 媽媽都不停的問你爸爸, 真的有小寶嗎? 那份莫明的緊張, 真是不懂形容....
終於入到醫生姨姨的房間了, 照了第一次的超聲波.... 看到了, 看到了.... 是一個小小的胎囊.... 即是你的小屋.... o係o黎緊的四十週, 你就是住在這裡了.....
寶寶, 媽媽會好好的保護你啊!
