尋找方向: 三十七週四日: 果汁糖出世喇!!!

2010年9月20日 (星期一)

早上七點半, 張師奶如常地按停鬧鐘, 起身刷牙洗面準備上班...

正當自己仍然處於不太清醒既狀態上完廁所, 就是發現有好少好少既紅色分泌, 心想, "什麼? 這是見紅嗎?" 沒有讓自己太多胡思亂想的機會, 就是打開廁所門叫停正準備出門口既張先生, "爸爸... 爸爸..."

"仲乜呀?"... "爸爸, 這是見紅嗎?"... "吓! 咁少? 係唔係架? ... 唔知喎..." 正當我倆都在猶豫之際, 感恩, 神俾我地更確實的提示, 因為張師奶抺拭到更多的紅色分泌了... 真的, 真係見紅了, 果汁糖要出世了...

確定了是見紅以後, 張師奶不自覺地緊張起來... "爸爸, 真係見紅, 咁而家應該點呀...?" 張先生望了張師奶一眼, 定一定神, 就是跟張師奶說, "刷牙囉... 你本身諗住刷牙呀嘛"... "咁刷完牙呢?"... "你刷左牙先啦..."

張師奶一邊刷牙, 個腦一直在盤算呢樣個樣... "真係出世嗎? 要點樣呢? 會點架?"... 刷牙過後, 走出客廳跟張先生說: "爸爸, 刷完牙喇! 咁而家點呀? 係唔係攞走佬袋去醫院呀!?"... "係囉..."

可能由於事出突然的關係, 張氏夫婦未有心理準備, 話就話攞走佬袋去醫院, 但係兩個人就係間屋到行黎行去, CHECK呢樣CHECK個樣, 好似好驚會攞漏野咁... 攞住封入院信再一次檢查時, 發現原來見紅要先致電醫生喎, 咁未就打電話囉... 早上七點幾都未到八點, 接通既當然係CALL台服務啦...

張先生掛斷電話以後, 張師奶就是問道, "咁而家又要點呀? 等覆CALL呀!?"... "係呀... 我地坐下先啦... 睇下香港早晨先啦!" 就係咁, 張氏夫婦你眼望我眼, 跟住就好安靜咁坐係SOFA到睇電視...

在等醫生回覆的同時, 張師奶想到了要打電話通知家人... 第一個想到的, 再一次是大家姐... 奇怪既係, WENDY姨媽都好像估到有野咁... "喂... 家姐呀!".... "仲乜呀! 無事呀!"... 張師奶帶著抖動的聲音說: "頭先起身見紅呀!"... "吓!? 係呀!? 咁點呀! 而家去醫院呀!?"... "唔係呀... CALL左醫生, 而家等覆CALL"... "好啦! 有乜再打電話什俾我啦... 唔使驚呀! 我地幫你祈禱呀!"... "係... 知道喇!"....

掛斷電話過後, 張氏夫婦就是何其安靜, 完全無對話咁坐係SOFA到等電話... 幾分鐘過後, 張師奶終先開口講說話了, "爸爸... 果汁糖係唔係真係要出世喇! 今次會點架!? 我有D驚..." "唔知呢... 我都唔知會點架! 交俾神啦! 祈禱啦!"...

過後, 再次的一番沉默... 張師奶開始有點點著急了... "其實醫生係唔係會未起身呢? 係唔係真係會覆CALL架... 等左廿分鐘有多喇喎... 定係我地應該打去仁安醫院問下呢?"... 接著, 張氏夫婦就係封入院信到搵醫院個電話號碼... 試左好幾個電話先打o岩同有人接聽... 而我地得出的答案就係先到醫院撿查一下吧!!!

掛斷電話, 張氏夫婦又開始有點點緊張了... "要攞乜呢? 係唔係剩係攞呢個就可以喇! 有無執漏野呢?"... 正當我們搞掂出門口準備關門之際, 張先生個手機就響了... 原來是醫生覆CALL了... 簡單的講述見紅情況, 得出的答案, 都是先到醫院檢查一下...

走出屋苑還未到商場之際, 就是收到大家姐的來電... "芳芳呀... 點呀! 而家點呀?" "頭先醫生覆左CALL, 我同GERMAN而家先到醫院去..." "吓, 係呀... 乜你未打俾老豆媽咪乜!? 我頭先打返屋企, 原來佢地唔知... 媽咪仲話佢即刻落樓過去你到添"... "吓! 我地出左門口喇喎... 我未話俾佢地知, 諗住SETTLE DOWN 晒先打俾佢地, 怕佢地擔心... 唔緊要啦, 我自己打返電話俾媽咪, 叫佢唔好過我地到啦!"...

致電媽媽, 簡單的講及狀況便掛線了... 一邊走往的士站, 一邊就是致電公司同事"陳經理"告知張師奶要請假了... 口中講著今早見紅時, 腦海中就是不停地想公司枱面有幾多PENDING 既野要交代, 要處理... 另邊廂的張先生, 就是告知大姑奶我倆正往醫院途中和致電公司同事告假呢... 同時間, 醫生亦回電說已BOOK好手術室, 準備下午兩點左右開刀...

坐在的士上, 張氏夫婦沒有太多的對話, 全程就是緊握著對方的手, 偶然間就是給予對方一個支持的眼神, 我想, 這就是一切盡在不言中吧... 張師奶嘛, 想到了果汁糖的LIT LIT 契媽, 亦打了個電話告知她自己正往醫院途中呢...

到達醫院, 輾轉的上到婦產科登記, 一輪檢查過後, 護士就是說宮頸完全未開, 應該有排先生得, 或者先行回家再等... 當告知她們已跟醫生聯絡, 並已BOOK好手術室時, 護士們就是替我們作各項準備同安排房間呢...

由於醫院的病房著實太緊張, 在早上九點幾的時間, 根本未有"吉"既床位提供... 所以嘛, 張師奶就是著住手術袍, 坐在大堂對著升降機係到等, 等, 等...

等待期間, 在平靜過後, 張氏失婦就是緊握著手, 一同禱告... 過了一陣子, 姑娘就是說吳醫生剛到醫院, 可以先行檢查... 由於沒有"吉"既檢查室, 我們就是安排到產房中的候產室作檢查了...

簡簡單單的檢查過後, 醫生就是說一陣子需要駁機一句鐘, 之後就是等時間過, 下午就動手術喔!

醫生離開以後, 姑娘就是幫張師奶駁機... 再一次的駁機, 聽到果汁糖的心跳聲, 感受到她踢時就是要按鈕, 張師奶的心情真的很複雜...

由於我們是在產房的關係, 隔壁就是有產婦在生產中... "出力... 出力... 唔好哭啦! 你好叻架...!" 之後, 又是聽到產婦大哭大叫... 最後, 就是BB的哭聲... 聽著這些聲音, 張師奶真的很是緊張, 就好似自己都一齊生緊BB咁... 腦海中嘛, 就是不停想著, "今次生產到底會點樣? 有無事呢?"....

一大堆的問題就是在腦海運轉著.... 私家醫院嘛, 實在, o係我們駁機的位置就是可以一直睇住電視的... 不過, 張師奶又點會有心機去睇呢... 眼睛嘛, 就是經常望住掛在床上的鐘等時間過...

一句鐘終於過去了, 到了十點半的時候, 張先生就是要到樓下登記處再辦理多一些的手續.. 另外, 由於今早我地都無食過野, 張師奶也都希望張先生可以把握時間, 先到餐廳食D野, 唔係到一陣子連食野的時間都沒有了...

就是這樣, 在這個候產室內, 也就只剩下張師奶自己一個人了... 未幾, 姑娘到來說有好消息... 什麼好消息? 就是說有位上病房囉... 房間編號: 555B...

打電話通知張先生後, 張師奶也就跟姑娘先行上病房去... 嘩, 是二人房喔! 太好了吧!! 待一切SETTLE DOWN過後, 張氏夫婦就是忙於告知家人病床編號吧!!

在張師奶致電回家的時候, 媽媽就是告知說家姐正過來醫院睇我... "吓? 唔係呀... 家姐今早說下午要過海開會, 黎唔到睇我呢!?... "唔知呀... 佢好似話用LUNCH個時間過來喎..."

掛斷電話, 就是致電家姐... 原來, 她真是捨棄自己的LUNCH時間過黎睇一睇我先呢... 真的, 真的何其感動... 在我的生命中, 每當到了些重要時刻, 我這個家姐就是會給予我最大最大的支持... 感恩!!

掛斷電話不久, 姑娘就是前來說, "吳醫生話可以提前在一點鐘做手術, 你們有問題嗎?"... 張氏夫婦互相對望了一眼, 就是說, "吓... 無問題... 好呀!"... "咁呀... 十五分鐘過後就落產房準備喇!!"

嘩... 十五分鐘? 姑娘離開病房以後, 張氏夫婦就是忙於執拾床位, 有什麼要鎖入櫃呢... 同時間, 家姐亦到達病房了... "家姐... 姑娘話提早個手術, 我地而家要落產房喇!"... "吓... 咁快呀!? 我打電話俾媽咪佢地先... 咁我可能可以睇埋BB出產房先出去開會喎" ... 就係咁, 張先生同我家姐就係咁不停的打電話...

安靜下來以後, 家姐就是跟我一同禱告, 而在我們禱告的時候, 姑娘們已經準備好手推床, 準備推張師奶到產房去了... 瞓上那張床, 眼睛望住天花板上的光管, 這一幕是兩年前張師奶曾經經歷的... 今天的我, 心情真的複雜得不懂得形容... 雙手就只懂得合實的摸著肚皮, 希望感受到果汁糖的跳動...

瞓在那手掛的病床上, 張師奶根本唔係好清楚被推去邊到... 只知道經過走廊, 到了升降機, 又要再經過走廊咁... 到了產房, 就是知道張先生要先行到另一間房等候, 只有我自己一個被推入候產室...

入到這個候產室, 張師奶就是感到很凍... 真的, 張師奶真的覺得有點害怕... 雙手嘛, 仍是緊貼著肚皮... 在呢個獨處的時候, 張師奶又開始胡思亂想了... "點解好似唔係好感受到果汁糖咁既... 好怕... 好怕打開肚皮以後, 果汁糖像霜兒一樣離我們而去... 如果係咁, 我應該點呀!?"

過了一陣子, 麻醉師走到張師奶的床前問了些問題, 亦告知之後會點樣落藥後, 張師奶就被推進手術室了... 大大的手術室, 感覺好空洞, 好寒冷的感覺.... 按照住姑娘同麻醉師的吩咐彎曲身體被打針落藥, 很快很快, 下身的所有部位就是開始無知覺了...

此時此刻, 亦開始感覺到肚皮有被拉扯的感覺... 我想, 手術開始了... 張師奶的左手邊是麻醉師, 右邊嘛, 就是張先生... 實在, 張先生好像是忽然間出現一樣, 唔知道係幾時已經入到手術室... 緊握住張先生的手, 張師奶只是覺得好凍, 身體不斷抖動...

在張師奶仍然覺得肚皮被人不斷拉扯的時候, 忽視間, 聽到了BB的哭聲, 跟著, 醫生就是說, "BB出世喇!"... 張先生嘛, 就是說, "聽到嗎? BB 出世喇!"... 此時此刻, 張師奶好像完全迷失一樣, 只懂得放聲大哭... 身旁的麻醉師就是遞上紙巾說, "唔怕, 我們早有準備..."

未幾, 張先生就是被姑娘叫到往後邊處剪臍帶... 張師奶嘛, 只是聽到後邊傳來聲音說, "先生, 望住呢邊... 笑... !" 應該就是影相了吧!!

過了一陣子, 張先生再次走到張師奶的身旁, 同時間, 姑娘亦將BB放在爸爸媽媽的懷中... 看著這個小東西, 張師奶好像不懂得反應... 係果汁糖呀... 真係出世喇! 佢身體好溫暖, 面仔係有血色架... 佢係一個活寶寶呀... 係我同張先生既囡囡... 原來佢係咁既樣架... 張師奶的眼淚再一次不受控咁流下來...

由於張師奶仍然有傷口要處埋的關係, 張先生要先行離開手術室... 而我嘛, 就是任由醫生姑娘處治吧... 推出手術室, 要先行到休憩處安頓一下... 同時間, 這也是張師奶安頓心情的時間... "生了!? 真係咁樣就生左BB嗎? 真係生左嗎?? 剛才那個就是果汁糖嗎??"

迷迷糊糊的我, 只知道一陣子過後, 聽到姑娘說555B可以返病房... 未幾, 就是被人推出去, 然後, 眼睛望到張先生, 就是跟我說: "DADDY, MUMMY都黎左喇!!"...

迷迷糊糊咁, 又知道自己已經被推回病房到... 張開眼睛, 就是見到老豆, 媽咪同張先生係病房內... "休息下... 瞓下啦!"

同時間, 張先生遞過照片, 就是看到了剛出世的果汁糖... 那些, 是BB一出產房, 家姐第一時間幫BB拍下的照片喔!!

感謝天父, 讓手術進行得順利, 讓果汁糖黎到我地呢個家庭, 求主繼續教導我們如何當上好的父母, 好的管家...