當Alice遇上小契仔田星星... ..

2010年7月31日 (星期六)

星期三晚上, 放工時收到了KALI的來電, 問到張師奶有無什麼建議, 到底KALI媽媽可以帶ALICE去邊到玩... 話說ALICE回港近一個月的時間, KALI媽媽著實想不到什麼可以帶ALICE 去玩的好去處... 落雨天固然是無街去, 晴天時就是太熱, 帶ALICE到公園去玩滑梯又話會"辣"到屁股仔, KALI媽媽開始覺得ALICE快要悶得發霉, 要生菇了... 哈哈!!

正因為咁, KALI媽媽好想搵D小朋友同ALICE玩下喎... 哈, 竟然俾佢諗起小契仔田星星喎... 仲話, 如果田星星唔得閒, 同事陳經理那個姨甥仔都照玩可也喎...

講真啦, 雖然KALI 媽媽跟田星星媽咪都係同屆同學仔, 但係, 相約聚會嘛, 我想都係第一次吧了... 原本, 張師奶已約了田星星媽媽於今個星期日有聚會既, 不過, 由於ALICE爸爸將於那天到港, 如果真係要約埋佢地一齊玩下, 也就是要將我們的聚會提前一日吧... 唔緊要啦, 張師奶即管也碰碰運氣吧...

跟星媽相討過後, 我地終於確定到今個星期六的聚會了... YEAH! 

由於下午時間我地大家都有野做, 所以, 今次的特別聚會可以話係o係黃昏時段舉行既... 地點!? 當然都係張宅啦!

嘩, 嘩, 嘩, 我諗, 小朋友的相處可然唔同既... 今天晚上, 因著田星星的關係, 竟然俾張師奶睇到ALICE原來都有惡的一面呀... 小朋友爭野玩, 真係會唔同D架... 哈哈!!

由於KALI媽媽同ALICE明早要接爸爸機的關係, 大概十點鐘左右佢地就先回去了... 剩下來的田氏夫婦同張氏夫婦做乜野, 就係照我地之前的約定玩WII囉.... "SUPER MARIO"o黎喇... 只可惜, 我地開始得太夜了, 玩還玩, 點都要顧住小契仔嘛! 最終, 田氏一家也得於十一點幾離開張宅呢! 

唔緊要啦, 下次再戰!!  

話晒第一之見面, 緊係拖實媽咪先啦!!

望左一陣... ALICE好主動咁去揾田星星喇!!!

喂, 田星星, 你仲乜著ALICE隻鞋仔呀!? 你係男仔o黎o架!

哎呀... 開始爭野喇!! 先來爭凳仔....

再黎爭波仔...

跟住呢! 爭咕o臣....

你睇下ALICE.... 攞住個咕o臣上岸先.... 哈哈哈!!

食飯時間到.... UNCLE GERMAN 要幫下手先得喎...

呢四幅相到底做乜野!? 試下跟住我地唱啦! ...

"London Bridge is falling down, falling down, falling down.... London Bridge is falling down, My fair Lady...."

P.S. 點解婆婆會o係到o既!?  話說, 佢係專登走下黎睇下大個左既ALICE架...!

玩左一陣, 兩個小朋友開始熟啦... ALICE 同契仔兩個忽然"糖黐豆"喇!!!

嘩... 婆婆喂ALICE 食西瓜呀!!!

ALICE 咁獨立... 唔使幫手架! 自己食, 好味!!!

契仔獻吻俾契媽喎!!!

KALI媽媽同ALICE走左之後, 當然到肥豬出場同田星星玩啦...!!

嘩... 好驚呀... 肥豬o黎喇!!

張師奶與好朋友仔"星媽"的合照... 仲有肥豬肥婆呀!!!

最後環節.... "WII"  之 "SUPER MARIO".....

三十週二日: 揮之不去的陰影!?

2010年7月31日 (星期六)

果汁糖踏入三十週, 要開始兩星期一次到醫務所檢查了...

預約時間為下午三點半, 爸爸媽媽兩點多出到沙田, 就是快快的吃了個下午茶餐, 便急急的趕到診所去... 誰不知, 當媽媽登記時, 姑娘就是跟我們說, 由於醫生才剛抵達醫務所, 媽媽前面尚有八個媽媽未睇呢, 怎麼辦? 當然是先行落街走走吧...

由於診所就在一田附近的關係, 所以也不怕無地方行呢... 先跟張先生到玩具反斗城走了一趟, 然後就是到一田四圍走走吧...

行了差不多大半個鐘的時間, 還是回診所等等吧... UM, 還要睇三四個媽媽才到我呢... 沒法子喔, 還是要等呢, 也得在診所靜靜的坐著呢... 最終嘛, 叫媽媽名子的時候已是下午五點多了...

說實話, 也許由於已踏入懷孕後期的關係, 媽媽的陰影也隨之而來了... 今個下午, 著實媽媽有點不明所以的不安... 躺在檢查床等待吳醫生的時間, 看著那個黑色不動的螢光幕畫面, 媽媽忽然緊張起來了, 忽然閃過當日看不到亦霜跳動那漆黑一片的畫面, 害怕一陣子的畫面會是一樣...

當吳醫生用探測機掃著媽媽的肚皮時, 媽媽的眼睛就是第一時間在找著閃動的畫面... 想看到果汁糖那一閃一閃旳小心臟... 看到了郁來郁去的果汁糖, 媽媽的心才稍稍安靜下來的... 當吳醫生說果汁糖的面仔多肉時, 媽媽才開始笑了...

求主加力, 求主堅固媽媽的信心... 今天的我, 忽然間有點乏力呢... 

二十九週二日; 果汁糖的4D照...

2010年7月24日 (星期六)

今天早上, 是爸爸媽媽到中環的醫務所替果汁糖照4D的日子喔.... 預約時間為早上十點, 等了一陣子, 就已叫張師奶的名字, 真好!!  

今次的診症室, 與之前照結構的房間不一様呢... 嘩! 中環的診所果真不同, 今次檢查的房間還有海景... 我想, 除了醫生的口碑, 收費貴果真有其原因吧!

步入這間檢查室, 房間內已播著很悠揚的古典音樂了, 我想, 也許是莫扎特之類吧... 躺在檢查床上的張師奶跟張先生說, 今次的安排同之前的都唔同了(除了上兩個月所做的結構檢查外, 實在, 亦霜的4D照也是找林醫生照的呢!)

在等待林醫生期間, 聽著音樂的果汁糖就是在媽媽的肚子裡游來游去... 對呀! 張氏夫婦頓然想起, 今次陀著果汁糖, 還未有播放過莫扎特專輯給她聽呢... 也許, 果汁糖覺得這類音樂很新鮮, 所以郁來郁去吧...

過了一陣子, 終於見到林醫生了... 林醫生步入檢查室的第一句說話, 就是說, "今日照4D喎... UM, 上次o個胎有D唔開心, 照下先啦!"... 說話的同時, 就是走到HI-FI的位置將音樂扭細聲一點, 同時就是問及張師奶說, "如果唔鍾意聽, 可以把音樂關掉喔!"... 張師奶就是指著肚皮答道, "唔需要關掉喇, 我諗佢可能鍾意聽啊!"... 林醫生聽到了張師幼的答案, 消化了句子一兩秒, 就是哈哈大笑...

開始照喇! 當檢查的儀器放在媽媽的肚皮上時, 雖然果汁糖面仔好乖咁向上, 但係她就是用小手仔擋住個樣呢... 林醫生在媽媽的肚皮拍, 拍, 拍, 嘗試著騷擾她等佢縮開隻手仔... 哈哈哈, 果汁糖唔知點解就係乜都好少理, 繼續用手仔擋住自己... 試左幾次拍佢都唔得, 林醫生竟然叫姑娘試下扭大聲D音樂...

嘩... 哈哈哈... 竟然咁樣有效呀... 果汁糖真係縮開手仔呀... 看到果汁糖的模樣喇! 此時此刻, 張師奶不禁在心裡說, "感謝神!"... 實在, 張師奶真的覺得好感動, 看著這個囡囡的模樣, 感覺很是幸福...

檢查過後, 張氏夫婦也得把握機會問一下林醫生有關手腳上的皮膚問題... 給林醫生看過之前醫生所開的藥膏, 就是說那些都不太適合... 同時, 就是處方另一種含少量類回醇的藥膏給張師奶試一下吧...

離開檢查室, 查看著手上四張的4D照片, 感覺真的很得意吧... 到底似爸爸還是似媽媽呢? 哈哈! 都係好似像爸爸多一點點吧!

回家以後, 張師奶在擺放好這些4D照之際, 不禁取出了亦霜的4D照作比對...

哈! 原來妹妹果汁糖跟亦霜也有幾分像樣喔!!  

這就是七個月大的果汁糖了...

大富翁大比拼...

2010年7月18日 (星期日)

今天下午, 張宅再次開放成為招待朋友的聚腳點...

難得KALI媽媽同ALICE返香港喎, 當然要一班同學仔聚一聚吧! 上幾次的聚會, 我們都少不了玩PICTIONARY的環節.. 今天嘛! 原本我地都係諗住玩PICTIONARYo既.. 不過, 正當張師奶走入書間攞PICTIONARY之際, 杜溫發現原來張宅都有"大富翁紙牌", 仲話佢同老公兩個人都會玩, 話好好玩咁話...  

說實話, 副紙牌係張先生聽過朋友講過話好玩, 諗住買返屋企玩下o既... 不過, 因為張氏夫婦兩個人之前都未玩過, 加上看到說明書的詳細內容已無心機睇落去, 副紙牌一直都被置於張宅的"冷宮"當中...

難得杜溫識玩, 我想, 我們也可以試試這個新遊戲吧... 

經過一輪熱身後, 一個下午的時間, 我地都玩到兩ROUND呀... 實在, 這個紙牌遊戲也都真的OK好玩!!  

我o地個個都唔識玩, 當然要由識得玩呢個遊戲既杜温講解啦... 你睇, 我o地個個都好留心o架...

KALI媽媽好認真咁睇緊D牌係講乜呢!!

熱晒身喇! 我o地要黎正式o既遊戲喇!

KALI 媽媽幾凝重....

MANGO 嘛.... "等我睇真D出邊隻先!!..."

杜温仲乜o野!? "到底抽唔抽到靚牌呢??"....

張師奶都好認真o架.... 睇真D先.... 點好呢!?

Round 2 開始喇! 唔可以張師奶自己玩晒o既! 張先生都要玩下嘛!! 

點解KALI媽媽調左位!? 原因好簡單o架咋... 你o地有無覺得有D奇怪, 點解我地班大人可以玩得咁自由自在呢? 同埋, 好似咁耐都仲未見到小主角ALICE喎...  哈哈! 因為ALICE食完LUNCH之後, 就好乖咁自己一個係張師奶間房到大覺瞓... 我地班大人玩到第二ROUND, ALICE都差唔多時候醒喇...

KALI媽媽嘛, 當然要READY 隨時走入房啦!  

小公主瞓醒喇!! 第一件事仲乜, 當然要食件CAKE 先啦...!

食飽飽做乜好? 當然係玩啦!!! 見到ALICE個笑咪咪樣, 就覺得好開心喇!.

唔可以唔提o既, 係當日KALI媽媽同ALICE o既服飾囉...

你睇下佢地套母女裝幾靚...!

張師奶好鍾意呢樣相呀!!

今天的大富翁戰績... 下次再戰啦!!!

二十八週二日: 令人緊張的入院信!?

2010年7月17日 (星期六)

等了四個星期, 又到了產檢的時候了... 跟契仔一家吃過午餐, 就是到醫務所去了... 相約的時間本為三點半, 不過, 因著醫生遲了一點回診所去的關係, 張氏夫婦最終等上了個幾鐘, 差唔多到四點幾五點先叫我地呢...

入到診症室, 張師奶當然是將手手腳腳的皮膚同傷口問題給醫生過目吧... 同時間, 亦將係威院取得的藥膏給醫生看... 吳醫生看過了皮膚和傷口, 就是說或者開D有少許類固醇成份的消炎藥試下, 因為威院那支藥膏實在沒有任何消炎作用的呢... 唉! 沒法子吧... 就是要三管齊下... 中藥洗皮膚, 再搽威院及吳醫生的藥膏... 實在, 求主加力醫治吧!!

今天的超聲波檢查, 忽然間覺得果汁糖面仔多肉咗喔, 就連吳醫生都說她面仔有D肉呀, 哈哈哈...! 不過, 我諗最叫張氏夫婦覺得有趣的是, 我們看到了果汁糖的頭髮呀... 一支支咁撐出黎架... 因為陀亦霜的時候, 醫生未試過照頭髮俾我地睇, 第一次看到寶寶的頭髮喎, 感覺太神奇吧!!

接受檢查後, 張先生跟吳醫生提到, 如果我們真的決意剖腹生產的話, 應該要幾時跟醫生預約... 吳醫生就是說, 如果你地決定左邊日的話, 其實隨時都可以book的了... 接著, 在張師奶實在無乜心理準備下, 張先生就是跟醫生說, "我地想選擇九月二十四日..." 實在, 張先生之前都有跟張師奶提過這個日子, 但是, 當他跟醫生說了過後, 就好像真的要落實一樣吧... 此時此刻, 不明所以, 張師奶有點點緊張呢... 吳醫生翻看了一下月曆, 到時候果汁糖應該已三十八週, 都係一個適合剖腹的時間呢...

步出診症室, 張師奶的腦海有點空白一片的感覺... 因著張先生要趕回奶奶家吃晚飯的關係, 張師奶就是催促他先行離去吧... 而我嘛, 當然是等攞藥同俾錢啦... 等了差不多十五至二十分鐘, 終於叫張師奶的名字了...

走到接待處的時候, 張師奶一心想著是俾錢同取收據攞藥之際, 姑娘就是給張師奶遞上了另一份文件... 吓! 原來是九月尾的入院信, 當中列明幾時需要禁食, 邊日需要入院做檢查, 仲有, 附上兩粒藥丸列明幾時要食, 仲有進行剖腹生產手術的日期時間.... 一剎那間, 張師奶真的有點緊張吧....

接過了這一些文件和藥物後, 好像是一切就是這樣子定下來嗎? 離開醫務所, 致電張先生, 第一句就是告訴爸爸自己忽視間有點緊張, 有點驚... 手持著這些文件, 忽然間想起了當年結婚到酒樓落訂後的感覺, 頓然覺得自己真的要結婚了嗎? 今天嘛, 就是覺得, 好像真的要當上媽媽了...  

說實話, 當我們要作決定時, 實在唔知道什麼才算是"最好"的決定... 或者可以說, 根本唔會有答案... 只盼望呢個都係合神心意的決定, 求主保守, 祝福, 恩待我們的家庭, 讓平安喜樂大大的充滿我們的家...  

契仔... "的士"....

2010年7月17日 (星期六)

今天下午, 張氏夫婦相約了契仔一家三口食午餐...

相約在一田樓下的"甘味", 張師奶去到餐廳, 就見換上新髮型的契仔挨在媽媽身上.. 嘩, 嘩, 嘩.... 點解契仔唔同晒樣o既!? 原來契仔媽媽早一陣子, 順應老人家的要求將契仔D頭髮剃光晒, 等佢生靚D喎... UM... 真係有D睇唔慣呀... 最衰呢個做契媽既唔記得用相機影低佢個樣啦...

剛剛瞓醒無幾耐的契仔, 經過一輪WARM UP 後, 就開始講"BB話"喇... 講乜野!? 由於餐廳有落地玻璃的關係, 呢個小朋友一見有車車行過就會叫"的士".... "的士"....

嘩... 契媽聽到了, 當然就是話一定係契仔媽咪成日帶佢搭的士的關係, 所以契仔見到車就講"的士"啦... 不過, 始終都係父母心水清o既.... 契仔爸爸立即澄清, 應該o係田星星心目中, "的士"應該係講緊"THOMAS"玩具車喎....

哈哈哈... 唔知呢, 總之今日聽得契仔講最多o既就係"的士"啦...!!  

讚美之泉音樂會...

2010年7月11日 (星期日)

認識張師奶的朋友都會知道張師奶係一個唔鐘意睇演唱會的人...

記得有一次, 跟張先生仍在拍拖的時候, 唔知因為什麼原因有機會取得門票到紅館第一次睇歌手的演唱會, 但係, 張師奶嘛... 實在, 由聽第一首歌開始, 張師奶已經覺得好悶, 甚至有點煩躁, 因為周邊的環境實在太嘈喇... 也許, 又因著離開舞台太遠的關係, 張師奶真的點點興趣也沒有.. 最終呢, 我們兩個竟然中途離場回家去呢.. 哈哈!

我想, 張師奶有時候就是這樣子的奇怪, 對於演唱會實在也有選擇的... 今次呢, 早在個幾兩個月前, 張師奶已預訂了今天晚上這個讚美敬拜會的門票呢... 不過, 在購買這個門票前, 實在也有掙扎喔, 因為知道張先生的興趣唔大, 又唔知個音樂會係點怎樣的, 所以呢, 也有猶豫過去唔去呢... 

感恩, 最終, 張先生都幫張師奶作了決定, 買左門票先算... 試聽一次, 如果真係悶的, 下年未唔去囉...

我想, 作為基督徒的朋友, 對於讚美之泉這個名一點也不會陌生... 實在, 他們所製作的詩歌實在陪我們走過很多開心, 很多難過的時間...

今個晚上的音樂會在會展舉行的, 在行往會展的途中, 張師奶竟然有點點緊張... 嘩! 原來個音樂會係咁多人聽的... 場館可容納八千人, 差不多都坐滿呢...

這個音樂會不單是表演者的音樂會, 因為所有觀眾不其然的跟著唱, 大部份都會站起來跟著表演者一齊唱, 一同敬拜主...

短短的兩小時, 實在讓張師奶享受極了...明年, 張師奶都會到呀!!!

  

 

二十七週二日: 三年抱倆的畫面...

2010年7月10日 (星期六)

早陣子, 唔記得從什麼途徑聽到了"三年抱倆"這句子, 一天, 在街上行行下時, 算一算手指, 如果亦霜在爸爸媽媽身邊生長著, 張氏夫婦也可說是三年抱倆呢... 亦霜在二零零八年十月出世, 果汁糖就在兩年以後, 二零一零年十月出世... 哈, "零八", "零九", "一零"... 果真是三年抱倆喔!

每次到醫院或診所檢查時, 不時都會遇到一些手抱或手拖著小朋友的孕媽媽, 看到一些跟亦霜應該差不多大的小朋友時, 張先生都會不其然的問道張師奶說, "如果亦霜係到的話, 唔知係點既呢..?".. "可能你就會好似o個個媽媽咁架喇!"... "不過, 我諗我地個女應該唔係咁既... 個嘴仔會點既... 眼仔係點既..."

實在, 每次聽到張先生這樣的提問, 張師奶都會諗, "係呢, 唔知會係點既呢?"... 不過, 好快地, 張師奶又會去諗, 我地唔可以咁諗, 儘管亦霜係到, 張師奶可能又未必會有第二個小朋友, 又或者神只俾我地一份禮物呢, Who know?

說實話, 有時候, 當張先生睇到其他小朋友時, 都會問道如果亦霜係到, 係唔係已經乜都食得呢, 係唔係已經跑跑跳跳到捉唔住呢...? 有時候, 張師奶就會答道, "你睇下KALI囡囡ALICE去到邊個stage, 亦霜未就係差唔多咁囉..."

今天, 因著ALICE的到訪, 實在讓張氏夫婦幻想到如果囡囡係到時, 現在的畫面也就可能像照片一樣呢... 手拖著一個, 肚子裡懷著另一個... 不過咁, 在張氏夫婦心目中, 亦霜應該沒有ALICE那樣精靈美麗, 但是, 就應該會多了一份呆呆的可愛呢!!  

謝謝KALI媽媽幫張氏夫婦跟ALICE拍了這個照片喔!

法國寶寶到訪...

2010年7月10日 (星期六)

沒有刻意的約定, 一通電話, 卻造就了一個既悠閒, 又滿有歡樂的下午... 因為遠從法國回港的KALI及她的心肝寶貝小ALICE到訪張宅喔! 

早上跟老爸老媽吃過早餐, 剛跟媽媽提起過好朋友KALI將會今個夏天自己先帶囡囡回香港, 往後的一個月再等法國爸爸一同回家去... 誰不知剛於今早才提及KALI, 跟老媽分道揚鑣後, 就接到KALI的電話...

因著我倆下午都有空閒時間, 由大圍到馬鞍山只需十五分鐘左右, 最終, KALI就是決定帶ALICE到訪張宅喔! 

下午兩點半左右, 張師奶就是站在車站等著這位好朋友... 眼中的ALICE, 實在長大不了呢... 仍是這麼可愛, 越來越"鬼妹仔"様子... ALICE 真的一點也不怕陌生, 實在, 跟她已差不多一年無見吧, 但是, 當媽媽帶著她從車站走出來時, 就是好開心的對著張師奶跑跑笑笑, 還伸出小手俾我這個姨姨拖住呢...

經過商場的Dr. Kong, KALI 媽媽一心想買對涼鞋仔俾ALICE的... 可是, 選中了的只有DISPLAY, 同時間, 鞋子上的小花有一小片花瓣掉了呢... 當然, 最唔開心的就是ALICE啦, 當除掉她的靚靚鞋仔後, 換來是什麼嘛, 當然是大哭呢... 不過, ALICE 真的很乖巧, 媽媽鬧了一個, 就很快的收聲了... 而KALI媽媽嘛, 就是跟張師奶說, 其實只要將另一邊鞋的花瓣也脫掉一片, 不是也就成了嗎? 哎呀... 張師奶呢個傳統師奶嘛, 當然覺得這個不成啦, 應該擇日到其他分店選購一對"完整"的呢... 哈哈, 我這個朋友真是... 哈哈哈!!  

到東海堂買了幾件蛋糕, 我們就是一行三人回家去了... 在張宅嘆普冷氣, 談東談西, 吃個CAKE, 多寫意自在呢... KALI 嘛, 更成為了享用張宅咖啡機的第一位貴賓呢...

由於張先生打算回家吃晚飯的關係, KALI媽媽就是說可以跟張師奶吃個飯去回家去喔, 太好了吧!

不過, 峰迴路轉, 當張先生出門口還不到十分鐘, 張宅傳來了鎖匙聲音, 張先生折返了?? 怎麼嘛! 當張師奶看到張先生開門之際, 就是頓然醒起奶奶今個星期出外旅行了, 幸好張先生在搭車回家之前往往都有致電回家的習慣喔!!!

哈哈... 張先生的折返, 實在, 對於張師奶和KALI媽媽而言都是一個大喜訊... 因為, 有張先生照顧ALICE, 我地兩個嘛, 就是可以自自在在的吃大餐... 相反, 張先生就是無啖好食, 又要切D肉肉俾ALICE 食, 又要同佢玩下咁...

哈哈哈... 托兒服務一流喔!! 這應該也是KALI 媽媽的心聲喔!

ALICE真係大個女咗好多呀... 佢著住件衫衫係張師奶之前買俾佢o架!

托兒時間開始... TEA TIME... 食蛋糕喇!

ALICE 係張宅有乜玩... 就係搬野囉...

O.... 搬晒LU....

好喜歡這張相....

呢張自拍照真係好OK呀... 三個大人都咁開心... 至於ALICE呢, 佢好似唔係好知發生咩野事喎...

ALICE 與張宅寶貝"肥豬, 肥婆, 肥豬B" 的大合照...

托兒服務二... ALICE 好似上緊堂咁喎... 你睇佢幾留心...

   

托兒服務三.... 餵晚餐時間...

最大得益者? 當然係KALI 媽媽啦!... 你睇下佢食鐵板餐食得幾自在... !!

二十七週二日: 父女裝!?

2010年7月10日 (星期六)

今早, 經過BOSSINI, 因為張先生成日都話著住牛仔褲好熱的關係, 張師奶就是說, 不如試下那些短裝的休閒褲吧.. 那麼, 有時候, 星期六, 日出街時未可以著短褲涼爽D囉...

正當張先生試褲的時候, 無無聊聊的張師奶當然是在店舖內行來行去啦... 哈哈! 竟然俾我發現到一條小裙子跟爸爸那條褲的款式是一模一樣的呢... 不過, 最細的碼數, 我諗都要到阿囡歲幾兩歲先著到呢...

當張先生試完褲以後, 就是給他看看手中那條小裙子吧... 正當我們左諗右諗之際, 張先生竟然搵到一條真的跟爸爸同款的童裝短褲喔! 想像出來的畫面實在比起裙仔更得意呢...

就係因為那看想像出來的畫面, 張先生決定買下那條褲仔呢... 知嗎? 童裝真的太貴了吧... 爸爸那條跟果汁糖那條是同一個價錢的呢..!

不過, 只要想到他日的可愛的畫面, 這就覺得值得呢..!

張氏夫婦又浪費金錢喇!!!  

哈哈... 就是這個了...

二十七週一日: 爸爸是何其的好!!!

2010年7月9日 (星期五)

因著張師奶的皮膚問題, 因著醫師的一番說話提及有關飲食要注意的地方, 張先生就是有感可能是自己早一排沒有時間煮飯, 張師奶成日要出外食飯而引致現有的皮膚問題...

於是嘛, 張家廚師復工了... 整整的一個星期, 張先生就是盡量的準時放工, 為我這個麻煩太太準備晚餐....

實在, 認識張師奶的朋友也知道張師奶唔識煮飯, 亦很怕煮飯... 相反嘛! 洗碗洗碟就完全無問題, 只要不用煮, 要洗幾多碗碟也可以呢...

唔知呢! 實在太怕生肉那種油膩的感覺, 就像無論是洗幾多次手都無法洗淨一樣... 同時間, 煮飯那種熱能, 實在叫人煮完之後就唔想食了...

最記得的一次經歷是這樣子的... 大概是週末的下午, 張師奶一心為張先生煮一個簡簡單單的公仔麵, 加點肉丸, 加少少菜咁... 但係, 當完成這碗麵以後, 張師奶就是自己已唔想食野了... 結果嘛, 原本諗住煮完張先生個麵, 再煮自己那個跟他一齊吃的.. 最終嘛, 就是只有張先生自己一個人吃午餐...

實在, 這就是張先生最唔鍾意的情景... 記得張先生當時跟張師奶說, 實在, 只要可以一齊食野, 吃什麼也沒有什麼所謂... 吃飯的時間應該是一同享受的喔!

所以嘛... 張師奶就是張師奶... 繼續負責洗碗的部門呢!

看看吧! 一連五日的愛心晚餐呢...

七月五日...

七月六日...

七月七日...

七月八日...

七月九日...