十七週三日: 讓媽媽感動的一封電郵...

2010年4月30日 (星期日)

真的好享受昨晚跟主人朋友的見面時間, 不知所以, 好想好想發一封電郵讓契媽知道, 發了電郵不久, 看到契媽所回覆的, 媽媽竟然流起淚來... 不是怎樣長的回覆, 但是, 字裡行間, 就是無比的關心...  

感恩, 媽媽真的很感謝神, 讓媽媽身邊有這樣的朋友...

果汁糖, 雖然契媽唔喜歡小朋友, 但係, 因為你係媽媽的小寶貝, 媽媽深信, 契媽應該唔會對你太差o既... 哈哈哈!!

十六週七日: Lit Lit 契媽知道果汁糖o既存在喇!

2010年4月29日 (星期四)

跟主人吃飽飽晚餐以後, 為著避開隔離枱的小朋友, 我們就是轉到APM 的STARBUCKS去... 講真呀, 媽媽當然係想飲自己最鍾意的咖啡啦, 但係而家身份唔同左, 肚入面有果汁糖嘛, 當然唔可以放肆啦...

於是就叫主人朋友買coffee 先, 正當自己煩惱緊可以飲乜野之際... 嘩, 俾我見到d 果汁糖都啱飲既野喎... 哈哈, 原來STARBUCKS 而家有SPECIAL DRINK, 係熱鮮奶呀.... 好啦, 就買呢個啦!

當我買完野飲, 主人問我飲乜, 正當她用極度奇怪眼光望著媽媽之際, 這亦正是讓契媽知道果汁糖存在的好時機喔!

"主人, 你又有機會做人契媽喇!"...

果汁糖, 知道嗎? 在你這個契媽面前, 媽媽就是可以那麼號不保留的分享分憂... UM... 今次懷孕的奇妙安排啦, 最初知道懷孕的喜悅, 以往經歷所帶來的憂心, 擔心, 種種要考慮的問題啦...

同時間, 就是要契媽也作好心理準備, 無論佢有幾唔鍾意小朋友, 果汁糖都要有少少例外, 契媽怕抱初生BB喎, 媽媽就是要佢同媽媽一齊學點樣抱你囉! 記住呀, 契媽話佢到你出世時, 可以攞假黎幫手照顧媽媽喎...   

就是這樣, 講東講西, 好享受這個晚上的時間...

 

即興飯聚...

2010年4月29日 (星期四)

由於張師奶的工作不時需要加班, 為免打亂與朋友之間的約定, 張師奶已甚少相約朋友於星期一至五晚飯聚了... 星期六, 日嘛! 也多留於與家人相聚用... 唉! 換言之, 有好一段日子, 也沒有跟各方好友相聚過了...

今天下午, 辦妥了最急切的工作, 記起久與我失去聯絡的"主人"朋友早前曾四處尋找張師奶的"下落", 短短的一通電話, 竟然幸運地造就了我們今晚的即興飯局... 說實話, 不知道有多久沒有試過這樣即興了...

由於工作需要加班的關係, 張師奶也曾慣於即興約朋友飯聚的... 只可惜, 當身邊的朋友同樣工事繁忙, 又或者多了家庭或朋友仔需要兼顧時, 即興飯局多次未能成事後, 張師奶已少了這樣子的約人方法了, 因為失望的失落感總不好受嘛...

翻看一下年曆, 跟"主人"見面已是二月中(年初六)的時候... 嘩, 不經不覺, 我們竟然有兩個幾月沒有見過面... 

跟"主人"朋友認識, 始於上一份工作, 兩個初入職的"小蛋散", 共同處理一個客戶的訂單, 有問題嘛, 齊齊想辦法解決... "主人"朋友善於工作程式上的理解, 張師奶則善於文章寫作, 兩個小蛋散互補不足, 是最佳拍擋喔! 工作上, 你做唔切嘛, 讓我也幫忙吧! 加班總是一齊加班, 加班過後, 就是一齊外出食晚飯才回家去, 就是這樣子, 彼此的友誼就是如此建立.. 我想, 最感恩的是, 我地兩個不單在工作上有分擔, 就是在我們的個人瑣事都有分享分擔的時候... 能夠認識這位朋友, 張師奶往往覺得這都是神的恩典...

今天晚上, 張師奶與"主人"朋友原本相約於九龍灣的意粉屋去... 可是, 當張師奶由觀塘坐地鐵先到了九龍灣, 竟然發現意粉屋在裝修中... 在德福商場走了好一陣子, 也沒法找到落腳的地方, 我們兩個竟然決定由九龍灣坐地鐵回觀塘的意粉屋.... 誰不知, 到了觀塘APM, 那兒的意粉屋竟然也"關門大吉"了... 哈哈哈, 兩個女子看著那已"關門大吉"的店舖, 實在不懂反應了... 好好笑喔! 

最終, 我倆就是在APM選了一間西餐廳坐下來, 談談這, 說說那... 唉! 只可惜, 由於旁邊的食客忽視換上了我"主人"朋友向來最厭惡的"小朋友"份子, 快快的吃過晚飯, 我們也得轉轉地方呢... 到了STARBUCKS, 好不容易找到個位置, 兩個女子, 就是這樣子暢談起來, 什麼也談, 就是坐到人家關舖的十一點呢....

真的, 真的很享受今天晚上的時間....

"主人", 謝謝你喔!    

 

十六週三日: 胎動...!

2010年4月25日 (星期日)

今天下午, 在團契分組中, 肚子裡忽然一刻的觸動... 是肚子痛嗎? 唔係呀.... 過了好一陣子, 又來一陣怪怪的感覺... 一種似曾相識的感覺... 忽然間聯想到.... 是胎動嗎???

由於在小組過後, 張氏夫婦急於到仁安探望朋友的關係, 張師奶也就先放下了心中的疑問... 直至晚上回到家中, 睡覺前再次想到了今天的疑問, 於是便翻查一下之前由家姐朋友借閱的"懷孕聖經"... 沒想到, 當翻看到懷孕後的身體變化"第十七週"的一個小段落, 就是寫到, "如果以前曾經懷孕過, 本週就會感覺到第一次胎動...."

O... 果汁糖, 媽媽開始感受到你的郁動了... 感謝神!

 

 

十六週二日: 一刻的失落....

2010年4月24日 (星期六)

今個下午, 又到了產檢的日子, 可以看看我們的果汁糖了...

預約時間為下午五點, 由於張氏夫婦太老定的關係, 因著遲了準備出門口的關係, 我們不單止要分開去診所, 仲要遲到呢! 張師奶到了診所後一陣子, 張先生就是超級怱忙的趕到, 因為爸爸怕錯過看到果汁糖的每一個時刻呢! 

等了差不多一個小時的時間, 終於叫到張師奶的名子了... 看到撐左撐右的果汁糖, 爸爸媽媽都笑了... 檢查以後, 當醫生說了一齊都幾好, 說四星期以後再見時, 步出診症室, 媽媽奇怪的沉默起來... 想到剛才看到的果汁糖, 醫生所說的ok, 媽媽竟然忽視的想起了果汁糖的姐姐, 小亦霜... 腦海中忽然問道, 兩年前, 醫生都說霜霜是ok 喔! 內心一沉, 一點害怕, 眼淚又是不自覺的從眼角流出來.... 

主呀! 求祢讓我常存平安喜樂的心! 因為祢與我們一家同在!

迪士尼"超夜"自助餐....

2010年4月23日 (星期五)

話說回頭, 張氏夫婦會係放工之後, 山長水遠咁"撲"入迪士尼, 實在唔係因為想什麼浪漫看煙花, 大前題嘛! 其實只係想會合早於當日已在迪士尼開心遊的公公婆婆, 家姐一家吧了... 

早於四月頭, 由於迪迪尼開始做推廣, 家姐一家已計劃到迪士尼玩下, 兼入住迪迪尼酒店一晚, 張氏夫婦嘛, 都有在被邀請之列... 不過咁, 張先生又請唔到假, 加上要用千幾蚊入住一晚喎, 張師奶又唔係太大興趣咁, 所以呢, 就無一齊去囉!

不過, 當知道他們當晚會係睇完煙花後到迪迪尼酒店食自助餐時, 張師奶反而覺得如果可以一齊係個到食野, 再同埋d 公仔一齊影下相咁, 反而覺得呢個機會好難得... 就係咁, 張氏夫婦就說, 如果可以準時放工既話, 我地就入去join 佢地一齊食自助餐囉...

講真啦! 張先生又未好返晒, 張師奶的喉嚨痛正正痛到達頂點, 如果要什麼浪漫, 都唔會選擇係我地唔舒服的時候入去呢... 所以嘛! 最大的原動力其實係因為這個家庭聚會... 

係入迪士尼的途中, 張師奶話多次都想放棄折返, 其實係真架! 因為, 我地兩個又唔舒服, 個餐自助餐又唔係平喎, 入到去其實我地應該唔係太食到d 乜野... 再加上我地食8點半那一段時間, 食完之後係超夜, 但係仲要山長水遠先返到屋企, 所以真係好掙扎囉!

不過, 最後我地都堅持到, 而正正因著這份堅持, 張師奶今晚過得好開心呀!

一如我地所料, 返到屋企已經差唔多凌晨一點了, 但係, 今晚可以同張先生一齊睇煙花, 又有得shopping, 仲o係食buffet 時影左d 大合照喎, 張師奶覺得好值得呀!    

張師奶最愛的維尼家族成員呀...

而張師奶手上面既維尼熊, 都係迪迪尼出品, 係張先生當晚送俾我架!

睇下婆婆幾開心... 乜都值得了..!

兩姊妹加埋米妮老鼠... !!

又點少得大合照呢!

我們這一家和米奇老鼠....

雖然米奇同米妮都唔係張師奶的朋友... 但係, 入到迪迪尼, 見到d 靚靚頭飾, 點都要試下囉! 哈哈, 好似"後生"左呀!!

自助餐過後, 公公婆婆佢地就係上酒店大覺瞓... 我同張先生嘛! 就係咁樣, 十一點幾先係迪迪尼酒店坐車出去搭地鐵....!

他約我去迪士尼!?

2010年4月23日 (星期五)

今天晚上, 好不容易準時放工, 目的嘛! 就係我同張先生浪漫到放工過後入迪士尼睇煙花... 好癲呀!!

實在, 由觀塘坐地鐵入迪士尼期間, 實在, 張師奶想過好多次的放棄了....  山長水遠, 加上個喉嚨根本未好番, 仲要係超痛那種, 真係好似太浪漫吧!

不過, 我們最後都堅持到底, 去過迪士尼咁多次, 都係第一次睇煙花咋!! 都值得呀!

專登入迪士尼睇煙花喎... 睇下, 就連架迪迪尼車都無乜人, 因為都無乜幾多個好似我地兩公婆咁癲啦!!

第一次係到睇煙花... 都ok 呀!  

哎呀! 點都要自拍一下影張合照啦!

不過, 呢張其實係影左好多張先影到, 因為我地試過影一d 係完全影唔到煙花的... 當我地兩個見到d 煙花靚, 諗住望轉面影張相時, 原來, 當我地一望轉頭, d 煙花已經放完, 無晒, 好好笑!

唉! 去到迪士尼, 張師奶就會忍唔到手, 好似點都要買d 野走咁...

我的戰利品, 兩大袋, Yeah!!!

 

喉嚨係唔係"爛"左喇!??

2010年4月21日 (星期三)

近日的天氣變化, 一時濕, 一時熱, 一時忽然間又涼, 真係唔知可以點... 亦正因為咁樣, 張先生自從上星期開始已經開始病起來了... 前前後後睇了兩次西醫, 兩次中醫, 咳嗽仍然未止... 結果呢, 張師奶也無幸免的被傳染了...

實在, 由上星期四, 五開始, 張師奶已覺得自己喉嚨開始唔係好舒服, 由於未到極嚴重地步, 就是一直採用自然療法... 勁飲水, 勁食生果, 返到屋企就早d瞓... 唉! 但係... 今日個喉嚨真係好似爛左咁喇!

平日成日講野的我, 又一次要變得文靜起來... 因為, 真係唔想用力講野, 唔想出聲....

救命呀!!!!

十五週五日: 爸爸真好之雪梨湯...

2010年4月20日 (星期二)

由於媽媽的喉嚨痛加劇, 但係在西醫同中醫的角度都係話其實可以靠自己打低d病菌, 既然係咁, 媽咪唯有撐下先啦...

張先生真係好好, 由於呢幾日佢放工都夾唔到醫師應診的時間, 為要可以清晒佢自己的感冒底, 而佢又想問下醫師, 張師奶喉嚨痛但係又唔得藥可以點樣, 就係咁, 張先生跟上司在午飯前告了一小時的假, 由將軍澳出觀塘睇醫師.... 之後, 怱怱忙忙的吃過午飯, 又要趕返調景嶺搭公司車返工...

得醫師教路, 張先生就是差唔多每晚都讓自己準時放工, 返屋企煲"雪梨湯"俾媽媽飲...

"果汁糖, 爸爸真好!".....  

十五週三日: 與教會叔叔姨姨們的午餐...

2010年4月18日 (星期日)

今天下午, 相約了幾個團契的組員聚會後一齊吃午飯... 實在, 亦正是這個原因, 張師奶才選擇自己把雜誌於早上便"抬"到教會去, 因為怕時間緊迫, 無法遷就到時間讓姐夫於崇拜後才到我們家取雜誌嘛!... 誰不知, 因著恩同病倒了, 家姐當日又要到教會侍奉, 姐夫要留在家中照顧妹妹未有回來教會... 換言之, 就是我們這兩個女子要把那堆重重的雜誌抬來抬去... 唉!!!!

這個午餐沒有什麼特別, 我想就是聚一聚, 輕輕鬆鬆的談談大家近況, 互相關心一下... 當然, 作為大肚婆的我, 很自然的成為大家集中關心的對象... "仲有無嘔呀?" "小朋友邊個揍呀?""諗住係邊到生呀?"....

席上, 其中一個教友問及我同張先生一知道懷孕時的心情, 我地樂意分享之際, 亦慢慢地提到了星期五去威院檢查時時經歷, 心情, 弟兄姊妹們就係好專心咁聽我地的分享, 好關顧明白我地的感受, 之後同我地一齊禱告...

我諗, 神就係咁樣為我地準備, 實在, 平時唔係太多咁既機會會圍埋一齊咁樣食飯的, 但係神就係咁樣為我地預備這個聚會, 俾我地有分享, 俾我地身邊有好多好關心的組員去作鼓勵, 同我地一家一齊去行迎接果汁糖呢個小寶寶... 

感謝主!

    

 

十五週三日: 媽媽跌倒了...

2010年4月18日 (星期日)

唔知道係唔係因著昨日慢步城門河畔的關係, 昨天下午回家以後, 兩腿巳酸到不得了... 經過一晚的休息, 想不到腳仍是一樣的.... 酸!!!!

由於我家的萬能俠(哈哈, 即係張先生)病後未癒, 早上也沒有把他吵醒上教會去... 所以嘛, 也就自己一個返吧!

由於昨天晚上致電說要徵用舊雜誌作活動之用, 我這個大肚婆竟然會諗住十幾廿本雜誌應該唔係好重, 行返教會都係十五二十分鐘到, 一鼓作氣的拿起環保袋就出門口去...

唉! 其實十幾本雜誌又點會唔重呀... 重點係, 昨日的城門河之行真係唔少野嘛... 實在, 一手拿著小手袋, 一手拿著環保袋的張師奶, 走到商場門口已有點點吃不消了... 但係, 又趕住返教會前食小小野, 又已經行左一大段路, 行前同行後都係要行啦, 諗到可以搭一個站巴士到教會去, 於是未就決定繼續行囉...

快快的在街市吃過腸粉燒賣, 便行到巴士站等車去... 張師奶實在實在仍疲態了, 因為未有巴士, 矮矮的欄杆都不能放過了, 要坐一陣吧! 左手把重重的環保袋放在欄杆上借力, 右手拿著熱鮮奶飲著, 誰不知環保袋一個滑落, 唔知可以顧左定顧右的張師奶好似發軟蹄咁同時坐左係地下上面... 這樣一跌, 張師奶成個心驚到好似跳了出來一樣...

當然, 已為人母的我, 第一時間想到的再不是跌落地下有幾肉酸, 衫褲有無整唔乾淨,  腦海中第一個諗到的就是果汁糖, 唔知有無整到佢... 感恩, 著地的力度應該唔係好大, 加上張師奶有個大後盾, 可以撐一撐...

到了教會, 將剛才發生的腳軟事件講俾媽咪家姐知, 換來的當然就是說我太唔小心, 出現疲態就唔應該返教會, 唔應該攞雜誌... 教會過後, 致電張先生, 第一句講的就是對唔住, 因為我整親我們的果汁糖了...

果汁糖, 對不起喔! 媽媽實在太唔小心了...   

 

城門河畔...

2010年4月17日 (星期六)

也許早幾天的睡眠素質太差, 在今天不用上班的日子, 張師奶也把握時間多睡一會, 早上起床也差不多十一點了... 按慣例的致電媽媽, 她就是說這個鐘數不吃早餐了... 也好吧! 橫掂張先生仲瞓緊覺, 等佢起身食lunch 就剛剛好了...

跟媽媽掛斷電話, 就是想蒸幾粒燒賣醫醫肚, 然後到郵局一趟取個郵件... 正當張師奶在廚房中幫於整理那美味的燒賣之際, 頓然發覺有開門聲... 哈, 老爸老媽就是入屋跟張師奶say hello... 媽媽走進廚房左顧右盼, 就是問道燒賣蒸好了沒有... "蒸緊咋! 仲乜野呢! 頭先問你, 你話唔食野住嘛!"... 媽媽就是說, "無野, 無野..."

張師奶又點會唔知媽媽想點呀, 他們兩老就係諗住過黎一齊出去食lunch.... 不過, 知道張師奶已經蒸緊燒賣先話無野之嘛...

看著老爸攞上來的免費報紙, 看到明星酒家的晚市推廣, 張師奶就是無心的說道, "咦, 隻船裝修之後我地都未去過食飯飲茶喎!"... 媽媽就是說, "係呀, 未去過呀, 換衫啦, 而家去啦!"... "吓! 我問下咋喎, 家姐今日要返工嘛!"... 正當我們在熱烈討論中, 張先生也起床了... 致電工作中的家姐, 就是說她放工後join 我地, 叫我地先帶哥哥妹妹出去... 就是這樣, 一條無心的問題, 造就了我們出去飲茶的機會...

飲茶過後, 家姐姐夫要車妹妹回去跳舞, 至於老爸老媽嘛, 就是說諗住行去禾輋逛下... 我和張先生嘛, 也就決定跟爸媽走走吧!

在這個涼快, 陣陣清風吹面的天氣下, 走在城門河畔, 看著一個陪伴自己長大的地方, 就是這麼的自在... 更叫張師奶珍惜的, 是可以跟老爸老媽, 張先生一同走在這個河畔上啊! 是多難得的機會呢! 

張師奶長大了, 爸媽也老了...

十五週一日: 號無防備下的…. 失控!?

2010年4月16日 (星期五)

今天早上, 是張師奶要到威院檢查的日子, 預約時間是早上九點… 跟張先生準時到達威院, 當然也是按照正常慣例, 等, 等, 等…

對上一次跟孫醫生通電話, 理應今天會由他負責接見檢查吧, 就此安安心心的等著… 早上十點鐘, 終於聽到自己的名子了, 滿以為是”等到了”, 誰不知是姑娘接見, 再一次要求張氏夫婦的身份証核實資料, 正當張師奶滿心奇怪之際, 姑娘翻開我的記錄, 就是說, “咦, 你之前已經做左記錄嗎?” 張師奶答道, “係呀!”…. “咁呀, ok 啦, 你出去等叫名接見醫生啦!”… 就是這樣的一分鐘時間, 張師奶就是跟張先生說, “唔知點解, 我覺得等陣見到的未必係 Dr. Suen…” 張先生說, “UM… 唔知架, 等下先囉!”…

早上十點半, 張師奶再一次聽到自己的名字, 是一個女醫生的聲音… 進到檢查室, 聽到醫護助理員和醫生的聲音, 就是知道接見自己的實在不是孫醫生了… 按照指示瞓上檢查床, 女醫生走過來張師奶的肚皮上按了幾下, 就是在喃喃自語說, “咁細既? 唔係好摸到… 唔緊要呀! 我地或者照下先啦!”… 躺在床上的張師奶, 聽到這樣的一番說話, “什麼? 怎麼樣?”… 腦中浮現陣陣思緒之際, 電腦螢光幕上就是看到我們的果汁糖在手仔撐撐的… 醫生問了張師奶一句 “這是bb的心跳, 看到嗎?”之後, 就是量度著果汁糖的大小跟助理員溝通著… 檢查完畢, 當張師奶在整理衫褲之隙, 腦海中就是在籌算著, “是否應該讓果汁糖在私家醫院出世呢?”…

坐到醫生身旁, 她就是跟我們說, “好喇, 檢查過了, bb用手摸係覺得細, 但係照出來的碼數ok既… um, 睇返記錄, 你的上一胎唔得既, 有d媽媽因為心理壓力的原故呢, 會選擇摧生, 如果真係有咁既選擇, 我地醫院係無問題既, 咁你會諗住點呢?”… 張師奶望了張先生一眼, 醫生就是再跟我們講多一次差不多的說法, 聽罷後, 張師奶就是跟醫生說, “你要我地係呢一刻做決定?”…. “UM, 其實都可以唔係既, 如果你地想遲D決定, 或者在懷孕後期少少的時間先返一返黎, 到時再決定吧!”…

看到助理員已將往後的預約紙列印出來, 張師奶就是跟醫生問道, “醫生, 請問往後的檢查是係威院做, 還是健康院呢?”… “um, 其實睇返呢幾次的檢查都OK, 所以之後到會到健康院檢查, 到後期我地會俾個期你返黎再檢查一下, 到時再睇下情況同埋你地的決定…” 聽到了醫生這翻說話, 張師奶就是禁不住的跟醫生說道, “醫生, 唔好意思呀, 其實我之前同Dr. Suen 電話聯絡過, 佢話我之後的檢查都應該係由佢follow的, 今日的檢查佢之前都講過話應該係見佢的… 所以…”… 醫生聽到以後, 就是一邊翻查著我的個人記錄, 一邊說, “係呀!? 呢到又無寫低到喎… 不過唔緊要呀, 如果你話同Dr. Suen 之前傾過, 我地打電話上去問下呀!”….

就是這樣, 當值醫生就在我們當前致電Dr. Suen, 經一輪確定以後, 醫生就是叫我們到7E病房搵Dr. Suen… 從檢查室走出來時, 原來已是十一點多的時間了, 等了一陣子, 拿過了有關文件, 就是按照助理員的指示, 慢步走到7E病房去…

到達了7E病房門口, 跟當值姑娘說相約了孫醫生, 姑娘就是叫我們到對面的7F病房去… 按照指示走到對面的7F病房門外, 跟姑娘道明來意, 姑娘就是說幫我們call 孫醫生, 叫我們在病房外的櫈子上坐坐等等…

坐在櫈子上不足二十秒的張師奶, 望著四周圍似曾相識的環境, 海報, 再看到病房內外行出行入的孕婦, 我的心忽然間慌起來了… 看到了自己坐的櫈子, 腦海中忽然間浮現出媽媽當日陪自己入院時, 就是坐在這一張櫈子… 一個一個當日安排入院待產的畫面忽視間在腦海上一幕一幕的閃出來…

張師奶不自在的離開坐位, 走到升降機旁站坐, 望到了走廊外的另一排櫈子, 腦海中竟然又閃出了在我待產第二日, 爸媽, 家姐下午偷偷的前來探我, 張師奶就是坐在那兒跟他們談天說地的畫面… 就是這樣, 一幕又一幕的影像就好像記錄片一樣在張師奶的腦海中, 與此同時, 眼淚就是不自控的滴下來了…

起初, 張先生就是怕我疲倦, 一直叫我坐下唔好行來行去, 但是, 當他看到張師奶的坐立不安, 眼睛又慢慢開始通紅之際, 一切看到眼內, 當然也估到張師奶是因著7樓的環境有點唔妥, 正當他想跟姑娘提出到別處等醫生的時候, 逞強的張師奶就是說, “無事的, 無事呀!?”… 就是這樣, 在病房門外等了半個多小時, 終於見到Dr. Suen 的出現了…

被安排到照超聲波的房間, 當孫醫生仔細的放大畫面讓我們看著果汁糖時, 看到果汁糖咀仔郁郁的時候, 爸爸媽媽再次笑了…

離開醫院, 站在巴士站的時候, 張師奶終於跟張先生承剛才自己是莫明的慌亂, 就是這樣的不經意, 讓我這個媽媽知道當日的傷痕仍未痊癒, 當一幕一幕的影像再次浮現的時候, 原來張師奶仍是會如此軟弱…

不過, 張師奶好感謝神給我今天這個安排, 就是這樣一次轉折的檢查, 原來張師奶還有很多野要留意, 要面對, 就是今天這個不經意的安排, 張師奶更明白自己的心理狀況, 要是真的留在威院生產, 可有更多要注意留心嗎? 如果到要生的時候, 才頓時發現這些嘛, 情況真的很難想像吧!

所以嘛! 真的感恩, 感謝神讓我們今天是這樣子的進行檢查…  未有宗教信仰的朋友, 往往都會覺得一切也許是巧合, 好彩唔好彩的問題… 但是, 對張師奶而言, 神就是這樣的給我們預備了....

搭過"龍"....

2010年4月8日 (星期四)

經過了一連五天的復活節假期, 公司堆積下來的工作實在不少... 昨日第一天回到工作崗位, 張師奶就是晚上十點才離開公司... 今天嘛, 第二天喔! 加班到八點多鐘的時候, 實在開始覺得有點力不從心了, 因此, 決定離開公司, 明早再戰...

行到去巴士站, 實在巳九點多鐘了... 上了巴士, 整個人好像也軟了下來一樣, 也許, 太累又有點肚餓吧... 在巴士一直盤算著, 落車時應該也未到十點鐘, 應該尚有飯盒賣吧!

巴士一直駛著, 過了大老山隧道, 張師奶還是清醒的, 但是, 也不知從何時開始, 自己竟然不經不覺的瞓著了... 一眼醒來, 看著巴士外面黑漆漆的環境, 點解有點陌生呢... 看看車上的乘客異常的少, 再看看巴士上打出車站的資料....O.... 過站了! 張師奶, 你過站了!!!

是怎麼回事嘛! 怎麼會過站呢... 雖然只是一個車站, 但是, 可謂住在山腳的張師奶實在可說是被巴士車到山上去了... 腦海中一直計算著應該落車, 還是搭到總站再坐一個站馬鐵回去... 最後, 心有點點亂的張師奶決定在下一站落車了, 也許轉乘巴士或小巴回去吧! 誰不知落了車, 也許是因為夜的關係, 巴士何其疏落.... 唉! 算吧! 張師奶決定步行回家了... 我想, 四, 五個字也可以行回去了, 大學時期幫人補習時, 為了省卻幾蚊車錢, 也是這樣子行吧!  

就是這樣, 張師奶在巳經超級乏力之際, 竟然笨拙的選擇了行路回去... 一直走著走著, 真的覺得自己有點點慘喔! 實在, 這可說是張師奶第一次搭車搭過龍呢... 唉!  

當然啦, 行到屋企附近, 由於太夜了, 張師奶也只得放棄到酒樓買飯盒的計劃... 最後嘛, 就是到茶餐廳買了碗"牛肚魚片麵"醫醫肚囉!

大家庭聚會...

2010年4月5日 (星期一)

認識張師奶的朋友都會知道, 張師奶的"莫"氏家族實在不少... 除了農曆新年以外, 最能集齊人馬一同食飯的就是清明, 重陽節, 因為掃墓過後, 就是家人集齊一同食飯, 打麻雀, 遊戲傾偈的時間... 由早到晚, 一整天的時間就是這樣跟大家庭一齊過...

午飯過後, 大朋友就是打麻雀, 小朋友嘛, 就是到大伯家玩集體遊戲.... 張師奶最愛看這群小朋友玩遊戲, 因為真的讓自己尋回不少小時候的回憶...

為他們主持"有口難言"的環節, 諗題目時要顧及他們不同的程度, 不竟小朋友的年齡就是介乎K3 至中一都有... 太難的, 年紀小的實在連知道答案也不明所以... 太淺嘛, 高年級的就是一估便估到... 看著小朋友想著動作應該怎樣做, 身邊的大朋友又不其然的投入了遊戲同小朋友一齊估時, 實在開心不巳....

一整個下午, 看著他們玩什麼估領袖, 有口難言, "猜"皇帝, "痴"牆等玩意, 遊戲過後, 就是一鍋蜂的去爭食大伯公和姑媽姑姐們為他們預備的燒賣, 牛肉, 雞蛋仔等食物時, 就是覺得這批小朋友的世界實在太好了...

我想, 最好笑的, 就是儘管小朋友知道燒賣的"心"仍然是凍的時, 只要他們看到另一個小朋友仍然在努力的吃時, 他們就是什麼也不理, 一個一個還是將口中的食物吞下, 然後跟大人說, "都唔係好凍, 少少吧!"... "我食那粒是暖的".... 哎呀! 看到他們這個樣子, 實在被他們氣死了吧!   

難眠的一晚...

2010年4月4日 (星期日)

跟爸媽吃過今年的兒童節大餐, 張師奶也得自己一個人回家去...

儘管扭開了電視, 家中滿有聲音, 獨個兒在家的孤獨感就是陪伴著張師奶吧... 雖然巳經按平時一樣的沖涼瞓覺, 但是, 沒有張先生在家的時間, 原來就是這樣的不自在...

在床上輾轉反側, 好像怎麼也瞓不著一樣... 看著時鐘, 十二點多...  輾轉反側了好一陣子, 巳是一點多的時候... 好不容易應該睡了一會, 卻又只是三點多呢... 就是這樣, 瞓下醒下... 實在, 就像是沒有瞓過一樣...

回想過去, 上次都是這樣子的時候, 就是張先生出外到土耳其公幹的時候....

好頭痛呀!!!!!!

寂寞的早餐...

2010年4月4日 (星期日)

因著張先生還未跟奶奶定好今天回鄉的時間, 為免影響行程, 張師奶今早也得自己一個返崇拜去... 返教會之前, 慣常的吃個早餐吧! 獨個兒坐在大家樂, 不其然的有陣陣失落感... 點解? 我想, 實在是因為在前兩天的時間, 張師奶的早餐, 也是有爸媽和張先生陪伴的關係吧!

終於開始第一天的復活節假期了(4/2 - 星期五), 張師奶竟然如常的早起... 咁早起身做乜好? 當然係食一個美味早餐啦! 原自為張先生應該無咁早起身, 誰不知他也早起了, 就是這樣, 我們跟爸媽到了他們樓下的大家樂吃早餐去... 哈! 好開心啊!

到了星期六(4/3), 今天嘛, 就只有張師奶早起了... 為免吵醒張先生, 張師奶就是靜靜地溜出去了... 原本打算跟爸媽再到大家樂去, 只可惜, 今天的大家樂, 似乎什麼食物也沒有準備好一樣, 所以, 就是改變計劃, 跟爸媽到商場的椰林閣去... 哈哈! 今早老爸爭著俾錢... 算了吧! 因著我們有$40現金劵, 老爸只要俾$20就成了, 唉, 就由他吧!!!  

也許, 就是這樣, 今早的我, 自己一個人坐在大家樂... 儘管是同一樣的食物, 但是, 就是這樣一點也不開心了...

所以嘛! 要務必珍惜與家人相處的時刻喔!

 

兒童節大餐!?

2010年4月4日 (星期日)

每年的清明節和重陽節, 張先生也例必需回鄉拜山的... 張師奶是否需要隨行, 張先生一貫也給予自由度... 而今次的長假期嘛, 張師奶就是偷懶了, 決定不隨隊回鄉去...

早上到過教會崇拜, 跟張先生吃過午餐, 他就是要出發回鄉去... 而我嘛! 就是趁張先生外出了, 四點多鐘的時候, 叫公公婆婆到美心快餐吃下午茶餐去... 致電媽媽, 卻慘被請食檸檬了, 因為爸媽兩點幾三點才吃過午餐喔! 正當張師奶準備踏出門口到商場走走之際, 屋企電話卻又響起來了... 邊個? 哈哈, 竟然是媽媽... 她說老爸話也想到商場走走, 也許, 到美心坐一會兒吧!

到美心快餐點了最喜愛的美心雞脾, 吃著之餘就是等老爸老媽出現吧! 唉! 他們真的是過來坐坐吧, 什麼食物也沒有點... 不要緊, 一同坐坐也好吧! 張師奶就是最好這樣的悠閒, 跟家人坐下, 傾下偈就是那麼好...

吃過下午餐, 到街市商場走了一趟, 就是跟爸媽回家坐... 不經不覺, 就巳到了晚上七點, 老爸就是說請張師奶出去食兒童大餐, 慶祝兒童節....

在商場走了幾趟, 最後終於也找到了地方食我們的兒童大餐了... 哈哈! 是什麼特別地方嗎? 唉! 素來平民化的我們, 走來走去, 最終也就是選擇了一間貴價茶餐廳, 牛腩河一碗呀, 唔該!!!!

我想, 食什麼就是不重要吧! 重要的, 實在是背後的一份愛, 一份關心... 說實話, 爸媽下午時實在唔肚餓, 只是他們知道張先生回鄉去, 他們就是怕張師奶會悶, 因此特意到商場走一趟... 晚飯嘛! 老爸老媽就是怕我自己一個人吃飯, 所以特意跟張師奶到外吃飯去...

可以在這個家庭中成長, 老爸老媽如此愛護自己, 這是何等的有福氣喔!  

十二週七日: 黑豬... 黑名單... !?

2010年4月1日 (星期四)

今天, 張師奶告了一天的年假... 目的嘛! 就是因著今早要應上次健康院醫生的要求, 要先在懷孕初期作一次糖水測試... 因為怕自己抽了血和作測試以後會有什麼唔舒服, 也就請了一天的假, 提早放復活節這個長假期吧! 

說實話, 對於今次的糖水測試, 張師奶是有一點點抗拒的... 原因嘛! 也許是因著上次檢查時, 那個醫生給了我一個不太好的感覺吧! 因為老爸老媽有糖尿. 高血壓的問題, 實在知道到了懷孕中期要接受一次糖水測試實在是無可避免的... 但係, 點解初期都要做一次呢!? 記得, 醫生就是跟我說, "UM... 你知道自己的過去啦! 我覺得有需要先做一次囉"... "醫生, 其實上次生產之後都做過晒CHECKING, 應該同呢D無關的, 不是嗎?"... "我覺得要做囉, 我呢到可以做的就係咁多..."

再加上上次提到這個醫生摸胎那個有點不負任的態度, 感覺嘛! 就是覺得這就是按本旨辦事, 這裡可以做, 他們都要安排為我安排, 再有什麼嘛, 那就完全與他們無關了...

有機會問過孫醫生的意見, 實在, 這一次初期的糖水測試可以說係非必要的, 如果真係好怕那杯糖水, 其實都可以等到中期先做... 不過, 如果健康院安排左, 而我又可以接受到的話, 都可以照做的... 就此, 張師奶今天也到了健康院一趟...

經過了抽血, 飲糖水再抽血整整兩個多小時的過程, 最後, 就是要取回產前記錄帶回威院去... 當姑娘翻看我的記錄, 提到今次的報告會如何安排告知取回, 再提到如果威院到時如果Refer 張師奶返來要幾時返來等問題, 一連串的對話後, 簡單的一句實在讓張師奶有點點難過, "係囉, 因為你既Poor history, File 唔靚, 其實佢地都未必叫你返來o架喇!"...   

從護士室走出來之際, 說實話, 張師奶真的有點失落難過... 我想, 從小到大, 張師奶也算是循規蹈矩的人, 小時候讀書嘛, 老師蓋上的都是白兔仔印, 黑豬印嘛, 應該未試過吧! 黑名單嘛, 應該也沒有自己的份兒吧! 奈何, 拿著這份產前記錄, 健康院的人就像是將張師奶蓋上了黑豬印, 列入了黑名單一樣... 實在, 唔到我介意, 因為我唔可以介意, 這個真的是一個實實在在的過去, 係神俾我的一個經歷...

只是, 像是被人歧視的感覺, 真的有一點點難受呢!!! 求主加力!!!