尋找方向
2010年6月26日 (星期六)
今天早上, 由於要在早上十點鐘至一點鐘留守屋企等Nespresso送咖啡黎, 所以, 張師奶就連自己一直以來最重視的早餐也只可以簡簡單單的在聖安娜買了個腸仔包便算....
下午十二點幾, 婆婆致電說o係酒樓等緊位飲茶, 就是叫張氏夫婦稍後落黎... 由於咖啡剛好於一點鐘送到, 張師奶就是可以先到酒樓去... 不過, 唔知道係唔係因為天氣熱, 今早早餐又俾唔夠能量張師奶, 到達了酒樓這些嘈雜的環境, 張師奶好似覺得唔舒服了... 既唔想食野, 又覺得頭痛不斷加劇... 正當張師奶覺得最唔舒服, 最掙扎係唔要先行離開酒樓的時候, 老爸就是不斷的說這說那, 就此, 張師奶終於按捺不住的大聲說了, "哎呀, 已經好嘈喇! 可唔可以唔好講野呀... !!"
老爸聽畢這句說話, 就是自己發脾氣的說, "以後唔好叫我飲茶, 我邊到都唔會同你地D人去架喇!"....
唉! 張師奶知自己失言了, 加上頭痛的情況沒有止住, 最終也是要張先生先行陪我上樓一趟, 之後就是要張先生自己一個同老爸老媽繼續LUNCH 呢...
實在為難了張先生呢!!
2010年6月24日 (星期四)
今天晚上, 媽媽相約了梅同學於沙田吃晚飯... 由於梅同學剛剛辭掉職務, 為免她要呆等張師奶, 今天嘛, 張師奶就是不顧一切, 準時放工跟張先生結伴到沙田晚飯去!
得悉梅同學已定於2011年10月22日結婚, 張師奶實在開心不已... 實在, 我想在自己最要好的朋友群中, 要是可以被邀當上"姊妹"角色的朋友, 應該只剩下梅同學了... 所以嘛, 張師奶十分期待梅同學出嫁的日子呢!
席間, 談及果汁糖, 提醒梅同學應先為婚事準備什麼, 開心不已喔!
張師奶覺得, 與好朋友相聚, 往往也會真情流露... 到底呢張相仲乜野!?
話說, 張師奶同梅同學走埋去聾貓到影相, 一人企一邊, 但係, 張先生就話, 真係唔知我地兩個想點, 因為, 我地兩個越行越埋, 越行越埋.... 最終, 當然係將成隻聾貓遮住左囉!!!!
好耐無試過跟同學仔o係商場影相喇! 好似返番去讀書年代咁呀!...
張師奶好鐘意呢張相呀... 張師奶, 果汁糖, 仲有Auntie Rani ....
2010年6月20日 (星期日)
今年的父親節, 對於張師奶而言, 實在是心情有點點矛盾... 面對著越來越陌生的老爸, 張師奶實在有點不知所措...
今天早上, 張氏夫婦如常到教會崇拜去, 一心諗住跟老爸老媽吃個LUNCH, 誰不知一見到老媽, 老媽就是訴說今早跟老爸對峙得如何激氣... 媽媽在返教會前諗著跟老爸先上茶樓去, 換來的就是老爸的拒絕, 又說自己個心, 這兒那兒唔舒服, 但是, 一邊說自己如何唔舒服的同時, 就是趁媽媽走進洗手間後, 一聲不響的溜出去了... 所以嘛, 於崇拜結束後, 老媽就是趕回家看看老爸如何....
下午兩點幾, 由於張氏夫婦尚未吃午飯的關係, 就是致電回家問兩老是否同行吃下午茶去... 當老媽接過電話, 得悉他們也未吃午餐, 當老媽問及身後的老爸是否同行時, 電話筒內傳來的竟是老爸"發脾氣"兼拒絕的聲音...
掛斷電話, 張師奶實在按捺不住的跟張先生說, "我真係唔懂得可以點樣... 好地地一個父親節, 點解都要係咁樣呢!!"....
算吧! 實在, 張師奶想管也管不著吧! 及至下午四點多鐘, 一心諗住叫老媽過黎試下部新既咖啡機, 再次致電回家, 問兩老得唔得閒過黎坐下... 跟老媽剛剛掛斷電話未夠十分鐘, 就是收到老媽的回電, 問道我們到底叫他們過來做什麼!? 說老爸話我們致電時無叫佢來...
哎呀! 張師奶實在覺得太吃力罷了... 過往打電話也是這樣子的吧! 當我們叫他們來或是出去食飯的時候, 當然是叫兩個吧! 由始至終, 我們也未試過叫一個唔叫一個呢!!!
在張宅坐了一陣子, 玩過了咖啡機, 為免同其他人迫, 就是決定簡簡單單的到茶餐廳去... 唉! 誰不知又是那樣子, 一貫唔開心, 唔舒服的樣子, 自己吃飽了, 就是嚷著要離開一樣, 但實在, 媽媽所點的因為遲來了還沒有吃完呢...
張先生笑說到商場吃甜品去, 這話兒應允了, 到了分差路的時候又說自己要先回家去, 剩下老媽自己一個跟著我們過去...
唉!!! 可以怎樣, 到底想怎樣, 張師奶實在覺得跟老爸相處得很吃力呢!!!
2010年6月20日 (星期日)
認識張師奶耐既朋友也許知道, 張師奶可說是一個咖啡奶茶人.... 在茶餐廳叫的餐飲, 來來去去都係o個幾樣, 咖啡, 奶茶, 鴛鴦啦唔該!!
或者由於公司老細係外國人的關係, 對於咖啡也有一定的要求... 公司內的咖啡機, 並唔係那些傳統要煲的咖啡機, 而係比較先進, 只要放入一個合自己口味的Capsule入機內, 一杯熱騰騰, 香噴噴的咖啡就會為你準備好o個種...
記得剛剛結婚的時候, 曾經跟張先生說過好想屋企放一部咖啡機... 奈何, 張先生又唔係非常喜愛飲咖啡既人喎, 唉! 唯有放棄呢個念頭啦...唔通咁奢侈咩!
不過, 隨著時間的過去, 可能由於張先生成日見到張師奶同婆婆耐唔時就走去McCafe到嘆咖啡, 上次去探馬太時又感受過係屋企有部咖啡機, 下午時份一班朋友一邊飲住咖啡, 一邊談天說地那種忙裡偷閒既感覺, 張先生似乎改變了....
話說昨晚張氏夫婦o係一田行街, 見到Nespresso做緊promotion, 買咖啡機送打奶器, 當張師奶八八掛掛走埋去睇的時候, 張先生竟然陪張師奶企係到睇喎... 當張先生見到張師奶眼仔發光既時候, 仲同張師奶講, 如果想買的話就買喎....
嘩, 嘩, 嘩.... 吓!? 張師奶真係可以買咖啡機返屋企!? 由於事出突然, 張師奶覺得大家要冷靜一下先得, 於是乎, 我地決定要係商場逛一圈先, 始終部咖啡機都唔係平嘛, 張師奶真係唔想做錯決定... 一邊行, 我地兩個就係到討論部機可以放係屋企邊個位, 這個位無插頭, 那個位會鋪塵, 買左部機返屋企的話, 係唔係真係會用, 除左我地兩個, 婆婆係唔係真係會用......
一連串的問題, 讓張氏夫婦在短短十五分鐘內就走完一圈, 話咁快, 我地又行番去Nexpresso個counter... 最終嘛, 我地決定帶佢返屋企喇!!!
特此通告!! 張師奶既咖啡友, 得閒快D黎張宅坐, 一齊嘆咖啡啦!!!
Yeah!!! 成功帶返張宅的咖啡機!!!
好緊張呀! 急不及待要打開黎睇下先....
有新野玩! 又點少得張宅小孖寶的份兒呢! 肥豬肥婆都要八掛下呀!
肥豬說: "肥婆, 你o係個盒到攞左D乜野呀?? 快D 攞番出o黎啦, 唔係既話, 實俾Daddy Mummy 鬧死喇!!"
肥婆說: "肥豬, 我唔知呢D係乜野黎喎... 不過, 唔同顏色咁樣, 好靚呀!"
肥豬說: "哎呀, 我平時都叫你要識多野架啦! 教你啦, 呢D係咖啡o黎架, Capsule 呀!!"
準備就緒.....!!!
一杯熱騰騰, 香噴噴的咖啡Ready 喇!
哈哈, 呢個咖啡杯係張師奶當年結婚由一位中學老師所送的結婚禮物... 估唔到, 數年以後, 呢對靚靚咖啡杯終於大派用場lu.....
由張氏夫婦聯手整既第一杯咖啡, 受惠者當然係婆婆啦!!!
2010年6月19日 (星期六)
等了好幾個星期, 今天下午, 可以見見果汁糖了...
預約時間為下午五點, 等了約半小時左右, 終於到媽媽了... 感恩, 果汁糖一切安好...檢查完畢, 張先生跟醫生再一次問道有關催生和開刀生產的問題... 也許, 醫生一時間唔記得了張師奶過去的生產紀錄, 就是說一般只按自然生產和剖腹生產作分別吧!
當我地再提到有關上一次的討論後, 醫生也許醒起了吧! 不過, 今天再作進一步的討論以後, 得了的答案係, 原來催生唔係每個媽媽都適合的... 有些媽媽對催生藥的敏感程度, 足以讓媽媽和寶寶在好短的時間內都帶來影響... 醫生在場嗎? 當然, 大家也估到了吧, 沒有私家醫生會註場等待一個孕婦作自然生產的...
一如之前所有醫生所提及, 現階段來說, 這個問題可以遲多一點點時間再考慮... 不過, 走出了診症室, 似乎醫生的說話, 再一次讓張先生和張師奶帶來了要思考的問題了....
UM... 既然現在可以唔諗住, 咁樣, 我地就選擇唔諗住吧! 咁可以點樣?? 當然係吃大餐去吧! 多謝爸爸今晚選擇唔返奶奶屋企, 陪伴著我這個麻煩的大肚婆...
點少得爸爸架.... 如果肥豬同肥婆係到一齊影就好啦.. !!!
2010年6月18日 (星期五)
加班, 對於張師奶來說, 一點也不陌生... 今天晚上, 理應是"Happy Friday", 不過, 張師奶嘛, 就是在公司加班呢... 實在, 對於加班, 張師奶不太抗拒的, 如果加班可以讓自己工作的枱面"乾淨"一點, 張師奶實在樂意吧! 因為, 見到枱面堆積如山, 儘管讓張師奶放了工, 也帶著個心理包袱呢...
今天晚上, 在公司工作至晚上十點半左右, 搭的士返到馬鞍山已差不多十一點了...
因為倘未食晚餐的關係, 在回家之前, 就是在茶餐廳買了個"牛肚魚片麵"... 由於跟餐廳的接待侍應生較為相熟, 他就是問道, "你唔係話比我知而家先收工呀?"... 張師奶答道, "係呀..." ... "唔係啩, 行完街肚餓買野食咋嘛!?"...
這短短的一段對話, 張師奶心中實在苦笑了一下, "係呀... 今晚似乎真的夜了一點點吧!"....
2010年6月17日 (星期四)
當果汁糖踏入二十四週之際, 唔知點解, 張師奶已有好幾晚連續咁發惡夢了...
夢境內容全部都係跟生產有關, 仲要係全部唔好既野集於一身... 每次從惡夢中驚醒, 張師奶就是已經全身乏力, 身心靈都處於極度不佳的狀態...
求主加力, 將張師奶所有唔好的意念挪開....
2010年6月16日 (星期三)
今天為端午節假期... 沒有為這一天的假期作什麼特別安排, 一切隨心所欲吧!
難得有機會可以瞓下, 十點鐘到起身, 就同張先生落左商場嘆左個早晨全餐, 好滿足呀! 講真, 都唔知有幾耐無試過咁樣坐o係老麥到食早餐喇... 雖然係有d 嘈, 不過食得好開心呀...
食左早餐, 在商場到行左一陣, 就返左屋企睇電視... 一點鐘左右, 老媽打電話過來問我地食左午餐未, 講真呀, 個早餐都未落格, 當然係未食啦, 就是跟老媽說可能再過一點時間先食TEA, 兩點半鐘到先再打俾佢囉... 掛斷電話以後, 跟張先生相討過, 一心諗住老爸老媽都係想飲茶嘛, 一點半左右, 就是叫張先生落樓下間酒樓攞定飛, 準備一陣間同兩老去飲下午茶...
就此, 兩點半鐘, 在早晨全餐都未完全落格之際, 張氏夫婦又食野了... 三點幾飲完茶, 就返上屋企睇電視... 當老爸話想睇番之前幫佢錄影左的足球節目, 張師奶竟然同老媽走左去商場間東海堂攞西餅... 點解無端端攞餅? 哈哈, 未又係因為師奶貪小便宜的心態囉...
話說張師奶早兩日收到個email, 在東海堂只要買四件西餅, 加用八達通的一蚊積分就可以多得一件餅呀, 好似好抵咁嘛... 正因為咁, 未去買幾件餅當甜品囉... 結果, 五點鐘左右, 張氏夫婦又食野喇...
不過, 有時師奶心態就係咁奇怪了... 張氏夫婦加埋老爸老媽, 四個人實在就係食唔晒五件餅啦, 話送o個件其實都唔可以即刻食埋既... 係唔係好好笑呢...!
由於老爸早瞓覺嘛, 為免要佢太夜返屋企, 我地今晚七點半就食晚餐喇! 是日晚餐係乜野??? 哈哈, 肯得基桶餐是也! 點解會選擇桶餐? 其實都無乜特別原因既... 只係我地知道老爸老媽未試過食桶餐, 好想俾佢地試下"年輕人"的選擇囉.... 說實話, 當見到老爸老媽翻開食物那個滿有好奇的樣子, 我同張先生也覺得今晚的選擇沒選錯吧...!
就係咁樣, 一天的假期, 我地就係咁樣食, 食, 食同食喇!
端午節晚餐... KFC 桶餐呀!!! 好味道..!
2010年6月13日 (星期日)
今天晚上, 張先生當上大廚, 親自下廚並誠邀公公婆婆過來食飯...
爸爸由六點幾開始準備晚飯, 由於勁多餸的關係, 最終嘛! 我地到九點鐘先正式開飯...
食過晚飯, 當我地食緊生果之際, 張先生就提議婆婆摸下媽咪個大肚DUM... 哈哈, 其實唔只摸呀, 仲要聽下先得...
婆婆, 你聽到D乜野聲呀? 果汁糖游緊水嘛....
嘩! 你睇下廚師煮左幾多餸...!?
聽下先...
到底聽到D乜野聲呢!?
2010年6月13日 (星期日)
係唔係人老左就會變得自我中心? 就會變得有佢講, 無你講既呢!
說實話, 這一, 兩年間, 張師奶發覺跟老爸的相處越來越有難度了... 老爸往往也恃著自己的一套思想, 只會想或做自己想做既野, 有時完完全全忽略身邊人的感受... 越來越目中無人....
之前也都提過, 由於老媽沒有傾訴對象嘛, 要講老爸怎樣蠻不講理, 怎樣難以相處嘛! 張師奶同張先生就是聽得最多o個兩個... 奈何, 張師奶就是何等的欠缺耐性, 有時候, 實在又覺得老媽是自討苦吃... 明知道丈夫的性格, 有一些事情的處理手法就唔應該係咁樣... 有時候, 張師奶又會覺得面對老爸的蠻不講理, 如果我是老媽的話, 我就會如何的反駁, 不過, 老媽的忍讓就只是助長老爸越來越變本加厲...
也許因為這一切一切, 張師奶開始不自覺的對老爸武裝起來... 只要老爸稍有唔講道理的時候, 張師奶就好像是要為媽媽討回一點公道一樣, 亦因此, 張師奶覺得自己跟老爸的關係疏離了...
我想, 有時候就是這樣子的矛盾吧! 難題自己不疼愛老爸嗎? 非也... 只是想, 為什麼老爸要變得越來越封閉自己, 越來越難以溝通呢?
真的, 張師奶覺得跟老爸相處得最要好的時候, 就是兩年前陀著亦霜的時候... 耐何亦霜的離去, 就彷如是一個觸發點讓老爸徹底的改變, 覺得其他人虧欠了他, 自己唔高興嘛, 就難理其他人的感受, 將自己想講的就放肆的講, 就是這樣變得越來越難以相處...
星期一至五, 張氏夫婦和家姐的家庭各有各忙, 有時候, 就是藉著星期六, 日的日子跟老爸老媽飲茶小聚, 可是, 老爸又是有意無意的藉故不出現... 儘管出現嘛, 有時候就是黑著面子, 又或是渾身不舒服的一貫模樣列席飲茶... 實在, 這可以叫我們怎樣好好溝通呢...
也許, 因著父親節的臨近, 張師奶這幾天的腦海就是浮現著這不散的矛盾...
主呀! 求祢加力.... 我深知道相處是雙向的, 求主讓我真的有智慧, 有耐性跟老爸如何好好相處... 同時, 求主讓老爸改變, 縱然我地的家人都覺得無人可以改變佢的時候, 我地就將佢交俾祢, 因為, 在我們所看為不能的, 在祢凡事都能....
2010年6月12日 (星期六)
今天晚上, 張師奶單拖出席外婆的生日飯局... 點解張先生無份? 因為我地兩個今天要分頭行事, 事關奶奶那邊今晚做節吃飯是也...
外婆真的老了, 九十幾歲的生日飯局, 張師奶實在不想錯過... 說實話, 年紀大了, 還可以共度多少個生日飯局呢! 作為"後生"的, 就是希望可以在這些特別的日子, 也表達點點心意吧!
到達酒樓, 縱然外婆的外貌跟以往沒有多大的分別, 實在她已經唔認得人了... 實在, 當我們每次問到她知唔知道我地係邊個時, 答案往往就是不知道吧! 正因為咁, 張師奶今天沒有問外婆這條慣性的問題, 只是送上祝福和利是罷了...
面對住老人家, 張師奶往往都在想, 神造人真的很奇妙... 嬰孩初生時, 有什麼問題就是用哭聲去表達, 要父母照顧... 當人經歷數十年以後, 成了老人家, 又好像是回到嬰孩的時期, 未必可以同年輕的人好好的溝通, 再一次回到需要人照顧的時期...
只可說, 珍惜眼前人是何等的重要...
2010年6月12日 (星期六)
可能是遺傳的關係, 實在, 張師奶從不刻意向身邊朋友公開自己近況的事, 也可能是遺傳自媽媽的...
對於張師奶懷孕的事, 原來作為婆婆的, 一直也沒有跟自己的親戚提及過...
今天晚上, 張師奶因著要出席外婆生日飯局的關係, 大肚子的事也讓媽媽那邊的親戚也知道了...
張師奶還未有坐下, 表嫂就是開口問道係唔係要恭喜張師奶, 接著就是得到大表姐的祝賀... 當然, 也有細表姐的關心啦...
其他親戚嘛, 雖然沒有刻意提問, 不過, 我想, 以張師奶現在的外貌, 足以讓人知道是個大肚婆了, 哈哈!
2010年6月11日 (星期五)
實在唔記得有幾耐無砌過PUZZLE喇...
今晚同張先生經過玩具店, 見到話買PUZZLE會送埋架喎, 雖然一盒108塊PUZZLE 已經要百幾蚊, 但係都好似幾抵咁... 哈哈, 在師奶心態發作下, 我地竟然買左兩副呀...
睇完電視劇"談情說案", 張氏夫婦就開始我們PUZZLE大比拼的遊戲, 看誰砌得快?
結果嘛! 唉... 係張先生砌得快D, 佢用左十至十五分鐘就搞掂... 而張師奶呢? 幾經辛苦, 都可以係三十分鐘內完成... 都算係咁啦! 哈哈!
張氏夫婦的比拼材料... 哈哈!
當張先生已經砌好以後, 張師奶仍在努力中...
唉! 好苦惱....
UM.... 呢塊啱唔啱呢? 唉! 又唔啱添....
YEAH! 張師奶都砌好喇!!!!
我們的傑作.... 大功告成!
製成品當然要SHOW出黎啦... 就掛係門後面啦!!
2010年6月6日 (星期日)
雖然已經過左嘔得最厲害的階段, 但係, 隨著可能當日精神唔好的關係, 嘔吐依然的難免的...
早上返過教會崇拜, 實在就是有一點點不舒服... 會合張先生到樓下茶餐廳吃過通粉以後, 回到家中便嘔吐大作... 迫著自己在下午休息, 又怕今晚就不得了, 因為只要張師奶瞓過午覺以後, 夜晚必然是眼光光的了...
不過, 唔舒服始終也要休息吧! 整個下午待在家中, 在張師奶休息的同時, 張先生也不知不覺的睡著了... 及至黃昏時間, 張師奶覺得有點頭痛要先行起身了... 張先生嘛, 反而瞓到差不多八點的時間...
今晚食乜好呢? 哈哈, 諗到了... 食肉獸出動.... KFC桶餐啦! Yeah!!!
2010年6月5日 (星期六)
今天晚上, 張氏夫婦被邀請出席一個中學同學的結婚派對...
實在, 這可說是一個難得的婚宴, 今天晚上的一對主角認識於中學時代, 兩個人拍拖, 由中學, 大學, 出社會工作一齊走過了十數個年頭, 今天立誓一起建立自己的家庭, 實在是不簡單, 不容易的事吧! 新郎哥還特意為新娘子作曲作詞數算著這段感情的長久, 多叫人感動喔!
不過, 我想, 最叫張師奶驚喜的, 也莫過於是抵達婚宴場地, 竟然看到了應該身在法國的Kali 吧! 原來Kali 剛好來香港工幹, 得以從法國飛回香港出席今晚的婚宴呢...
Kali 還帶來了Alice 的近照給我們看.... 嘩, 時間真係過得太快吧... 歲半的Alice 長高了不小, 越來越外國小朋友樣子了... 不過, 仍然是那麼可愛, 那麼得意...
得悉Kali 將於夏天會再次帶Alice 返香港, 張師奶實在是期待萬分吧! 唔知到時候, Alice 會跟我們這班姨姨們講法文, 英文還是廣東話呢!?
先要多謝 Hans (杜溫老公) 幫我地capture到呢個moment....
這就是張氏夫婦見到Kali 在場最驚奇驚喜的一剎那吧!
可以齊齊出席同學仔的婚宴, 真是件開心事喔!
2010年6月5 日 (星期六)
之前也曾提及過, 張師奶從不刻意向朋友透露自己懷孕的消息... 不過, 因著今晚要出席同學婚宴的關係, 同時張師奶也開始見肚的時候, 相信也是一個向同學們宣佈喜訊的時間了...
到達酒店, 跟一群中學同學們打個招呼, 當然也要互相拍照啦... 特別是見到遠從法國回港的Kali, 張師奶就是開心極了... 正當Kali 諗住攬著張師奶之際, 就是不經意的碰到了我的"大"肚子... 哈哈, Kali 因此知道了...
期間, "何渣"也許看到張師奶的"娃娃裝"夾雜了"大肚子"的味道, 從眼神交流中問過了張師奶, 張師奶自然也將這件喜事跟她和她的丈夫分享了...
我想, 最叫張師奶感動的, 是當杜溫得悉喜事後的反應吧... 實在, 杜溫一直未有跟張師奶合照, 就在張師奶邀請合照期間, 張師奶跟杜溫輕輕道出十月要作媽媽的消息... 杜溫好像是難以置信一樣, 合照也不能即時影.... 她由心而發的喜悅, 一切一切實在叫張師奶看在眼裡...
當然, 席間還有預科班主任Alex 和好同學Mango 送上的祝福啦...
Kali 的出現實在叫張師奶太驚喜了...
哈哈! 這就是杜溫知道張師奶懷孕後的反應了...
明明大家已經企好晒位等影合照... 聽到了張師奶的喜訊後, 杜溫忽然間彈開了...
我們的合照.... 杜温, 張師奶(加果汁糖), 仲有KALI....
Mango 當晚在商場迷路了, 好彩, 終於都趕得切....
而中間o個個就係我地當年的預科班班主任(Alex)喇!
2010年6月5日 (星期六)
說實話, 張師奶都有三,四年時間無去檢查牙齒了... 年頭的時間, 張師奶終於的起心肝, 預約二月尾到牙醫處洗牙, 及後發現自己懷孕了, 又正正是嘔吐期最厲害的時間, 張師奶也只好取消預約吧!
因著孕期變化的關係, 流牙血的問題越見嚴重了, 張師奶實在覺得也得探探牙醫吧! 不過咁, 在赴約之先, 張師奶仍是有點心大心細... 未陀小朋友之前, 有時候洗牙都會緊張既... 更何況現在陀住果汁糖!
張先生知道張師奶的擔心, 就是答允陪張師奶一同到牙醫處... 最後, 張先生更是陪著媽媽一同入診症室, 睇住媽媽洗牙呢...
見過牙醫以後, 就是叫公公婆婆也出來走走吧!
在等公公婆婆的時間, 張氏夫婦就是去享受一刻的悠閒, 到了附近Home Square 的Pacific Coffee, 坐著Sofa, 一邊聽著音樂, 一邊睇雜誌... 張先生飲著他最愛的Mocha, 張師奶嘛, 當然是飲著一杯超大熱鮮奶啦... 嘆了約半個鐘的時間, 知道公公婆婆差唔多去到沙田的時候, 就是回到現實的嘈雜, 走到樓下的鳳城酒家揾位飲茶去...
最後, 由於張先生公司有事, 飲茶過後, 張先生就是先行回家, 而媽媽就是跟公公婆婆到IKEA走了一趟才回家呢...
坐家姐屋苑的Shuttle Bus 回到馬鞍山, 剛好家姐致電, 就是一行四人到McDonald 嘆咖啡薯條去也... 坐上了半句鐘以後, 就是到超市掃貨的時間了... 滿足!
2010年6月3日 (星期四)
當果汁糖越來越大, 張氏夫婦就更重視每晚的親子時間... 近幾日開始, 張先生不斷將自己最愛的音樂同果汁糖分享... 哈! 真係俾呢個爸爸笑死呀....
一時就"仙樂飄飄"... 一時又"迪士尼"什麼什麼原聲大碟... 一時又"雪狼湖".... 今晚嘛, 就是輪到"歌聲魅影"....
不過最好笑既呢都莫過於果汁糖喇... 我諗, 佢都幾鍾意爸爸鍾意聽個d 歌喎... 話說呢, 之前我地播過隻家姐亦霜最鍾意個隻兒歌大碟俾果汁糖聽, 只可惜, 佢好似少少興趣都無咁... 不過, 到播放爸爸鍾意聽個d 歌劇音樂呢, 果汁糖就反應不斷....
就好以今晚咁, 嘩... 到歌聲魅影喇... 哈哈, 果汁糖發揮前所未有的"大力"... 一腳撐去張先生塊面上, 哈哈哈!!!
