2011年3月10 日 (星期四)
當恩晞BB踏入五個幾月, 婆婆同爸爸就是覺得可以俾D新野恩晞BB試下喔… 係乜野? 就係俾D水果佢試下食喎…
今天晚上, 恩晞BB食完蘋果再食橙呀!! 不過, 實際上, 佢又邊到食到呢… 只係可以食到D味架咋… 哈!!!口
尋找方向
2011年3月9日 星期三
滿有喜樂…
2011年3月10日 (星期四)
數算一下日子, 原來恩晞BB已是五個多月大了…
也許, 快樂不知時間過吧… 真的, 好似這麼快恩晞BB已經五個月大了… 一天, 從手機中看到她那初生的模樣, 實在覺得有點點陌生… 哈哈! 看著小朋友成長的感覺實在太奇妙吧…
真真正正當上了五個多月的媽媽, 張師奶仍是覺得自己不太像媽媽吧… 到底, 是因為恩晞BB仍然未會叫自己做媽媽, 還是什麼原因呢!?
實在, 在張師奶要上班的日子, 放工回到家中, 最開心的, 莫過於是看到公公婆婆那個開心樣… 看到公公婆婆望著呢個小竇貝的笑容是那種從心而發, 那模樣是何其滿足時, 張師奶就是不忘在心中感恩…
每當公公婆婆”放工”回家, 在離開張宅的時候, 張先生就是會把恩晞BB抱起, 扮跑的由屋企一直走到升降機那邊送公公婆婆回去… 恩晞BB嘛, 也許已習慣這種送行模式, 每當公公婆婆走到大門, 爸爸把她抱起之際, 這個BB就是笑, 笑, 笑… 然後嘛, 就是兩隻腳仔左郁右郁作準備… 只要爸爸數完”ONE, TWO, THREE”… 一講”GO….”既時候, 恩晞BB 就好似凌空跑步一樣… 好開心咁同爸爸一齊出去送公公婆婆出去…
看到恩晞BB呢個搞笑樣, 爸爸那個開心樣, 公公婆婆那滿足既樣, 張師奶就是覺得自己很幸福吧…
感謝神給我們這個小寶貝, 喜樂歡欣就是這樣子充滿我們這個家庭喔!!!
2011年3月8日 星期二
友人相聚…
2011年3月9日 (星期三)
今天晚上, 張師奶特淮出外玩呀… 恩晞BB嘛, 就是爸爸照顧喔, 多謝晒張先生呀…
星期三晚上去邊? 張師奶就是跟美明相約了一個已經兩年幾無見既朋友食飯呀…
有時候, 朋友就是那麼奇怪… 很久不見, 但一見面就是話題不斷…. 由七點見面一真傾到十一點都好似唔想走咁…
哈哈… 真係夜喇! 下次我地約密D見啦…
張師奶返到屋企已經十二點幾喇… 一心諗住恩晞BB一係就 瞓咗覺, 一係就半睡半醒咁食緊奶… 誰不知, 當張師奶走到恩晞BB間房時, 爸爸就是正抱著恩晞BB, 當呢個小寶貝看到媽媽時, 就是精靈地跟媽媽打招呼, 笑, 笑, 笑呀….
真的, 很喜歡看到恩晞BB既笑容… 因為, 你會覺得小朋友既笑容就是這麼簡單… 看到她笑, 媽媽就要笑了…
2011年3月7日 星期一
婦女節… 感謝日!?
2011年3月8 日 (星期二)
因著今日係婦女節既關係, 張氏夫婦心有靈犀地覺得應該放婆婆一日假呀… 不過, 唔係唔使湊恩晞BB喎, 而係我地獎勵婆婆今晚休息, 可以唔使煮飯, 一於今晚食大餐….
放工過後, 就是跟爸爸相議今晚食乜好… 最終答案嘛, 就是元氣加KFC 啦… YEAH!!!2011年3月6日 星期日
2011年3月5日 星期六
向調景嶺出發….
2011年3月6日 (星期日)
山長水遠入到將軍澳, 張師奶務必要把握機會, 珍惜時間去探下朋友仔吧…
由於瑤姨媽今晚要睇鄭伊健演唱會, 那麼, 就是說我地唔可以去姨媽到lu… 咁可以去邊到? 哈哈, 張氏一家三口最終就是帶恩晞BB去咗杜溫姨姨同HANS叔叔位於調景嶺既.屋企啦…
恩晞BB似乎好鍾意杜溫屋企咁呀… 玩, 玩, 玩… 笑, 笑, 笑…
由於有一段時間都無見過MANGO喇, 昨晚就是打電話去問下MANGO今日有無野做, 咁啱MANGO姨姨又得閒喎, 於是乎就造就咗一個小小GATHERING LU…
要多謝阿HANS專登落街買野, 等我地可以有一個極速安排, 但又非常豐富既打邊爐呀…異性相吸!?
2011年3月6日 (星期日)
在教會怱怱餵過恩晞BB以後, 張氏夫婦就是帶BB往將軍澳去… 係呀, 漫長既路程要開始了…
也好, 甫上馬鐵一陣子, 恩晞BB就睡著了… 去到寶琳站, 恩晞BB也就醒過來了…
入到CLUB HOUSE, 見到姨姨叔叔, 一開始就是喊樣呀… 還好, 不出一分鐘, 就變返笑樣喇… 席間, 有一個大恩晞BB一個月既男孩子… 呢個恩晞BB又開始做主動喇… 哈哈, 可能真係異性相吸啦…
YEAH! 收到朱小姐送俾恩晞BB既禮物呀… 多謝晒!
P.S. 期間, 知道姸姸同BB黎唔到係因為阿B 俾熱水整到腳仔… 哎呀, BB肉痛之餘, 做媽媽的, 一定係超級心痛呀… 希望小豬B無事快D好返晒!!!好好檢討…
2011年3月6日 (星期日)
星期天, 又到了帶恩晞BB返教會既時間喇, 真好!
今天早上, 恩晞BB六點幾就瞓醒覺…. 唉! 如果恩晞BB都識得分星期六, 日就好喇… 咁樣, 我地可以俾佢知道星期六, 日, 其實可以瞓晏少少囉..
實在, 張氏夫婦都好疲倦呀… 不過, 恩晞BB 醒了, 即是我們也要醒喔… 一心諗住今早返教會可以準時一點啦, 誰不知, 到放恩晞BB落車仔時一個小吐奶, 張氏一家又要遲到了… 跟張先生說, 也許, 我們要好好檢討一下點樣先可以再掌握得好D先得喇!
返到教會, 原先瞓緊覺既恩晞BB忽然間醒了… 跟教友們打了一陣招呼, 就是再瞓過了…
好… 也得睡一陣覺喔! 因為, 今天下午, 我們要出街去跟其他小朋友玩呢…
2011年3月4日 星期五
2011年3月3日 星期四
邊個最愛維尼熊!?
2011年3月4日 (星期五)
認識張師奶既朋友都知道張師奶喜歡維尼熊家族, 所以, 黎到張宅, 根本不難發現維尼熊既裝飾, 擺設, 因為我地通屋都係…
記得之前有人問過張先生, 其實佢係唔係被迫鍾意維尼熊, 如果係既話, 大家都覺得佢好慘咁話…
說實話, 結婚初期, 聽過朋友所說, 張師奶都真係有認真咁去思考過呢條問題… “係喎, 其實張先生係唔係唔鍾意既呢, 搞到成間屋好似TRENDYLAND咁, 佢可能真係唔喜歡喎… “ 所以, 我地真係有好認真地去坐低討論過呢個問題…
張先生既答案嘛… 就是說他喜歡… 不過, 這種所謂既喜歡, 就是跟女孩子不一樣吧… 沒有反感, 但又不至於會花錢去買既喜歡, 只要是那擺設係靚既, 放在屋企也OK喔… 加上張先生鍾意畫畫, 愛設計上既美, 如果擺設係會令到佢覺得間屋感覺唔好既話, 佢就會出聲叫停喔… 所以, 對於屋企變成好似TRENDYLAND 咁, 多了維尼熊這個主題, 張先生也覺得是好的喔…
不過, 隨著恩晞BB既出世, 屋企既地方越黎越唔見使, 對於唔係必需品既小擺設, 張師奶每次買野之前都會三思… 今天晚上, 又到了張氏夫婦要決擇既時候了…
兩口子放工返到到馬鞍山, 張先生就是到他最愛的玩具店逛一轉, 這間玩具店店嘛, 有張先生最愛既高達模型, 也有張師奶最愛既日本卡通精品賣… 正當張氏夫婦行完想離開店舖既時候, 張師奶既眼睛忽然間被地上既擺設所吸引住…
“爸爸… 爸爸… 你睇下… 好靚呀… “ 張先生就是答道, “咦… “
之後, 就是隨手拿起東東來左看右看… 接著說, “OK喎 … 你係唔係鍾意呀…”
“UM… OK 啦… 好似幾靚咁囉… 不過, 呢個價錢係唔係好貴呢… 之前係TRENDYLAND睇過D差唔多既係唔係唔使咁貴呢!?”
“吓… 差唔多咋嘛… 唔係咩!?”
可能張先生知道呢間店舖每件貨品都返貨唔多, 他就是轉個頭去問店員有幾多存貨, 答案嘛, “兩套…”
張先生再問張師奶, “嗱, 得兩套架咋… 賣咗可能就無架喇… 唔好後悔呀…”
此言一出, 當然令到張師奶七上八落啦… “吓!? 但係恩晞BB真係未用得著住喎… 最快都應該要歲幾兩歲先用得著… 可能之後會出D更靚既款喎… 買咗又要揾地方收埋佢… “
“咁你而家諗唔諗住買呀!? 嗱… 你唔好諗之後會唔會有更好… 可能之後出既你會唔鍾意架, 到你想揾番佢既時候就無架喇… 唔好後悔呀…”
“哎呀… 點呀… 唔買住喇… “
“嗱, 真係唔好後悔呀… 可能一陣間就無架喇…”
“UM… 唔買住喇!”….
才步出店舖門口, 張師奶就是說, “不如咁呀… 我地行過去千色店間TRENDYLAND睇下相類同既賣幾錢先啦… “
此時此刻, 張先生笑了, 就是應道,”好呀!”
行到過去千色店… 左看右看… 原來價錢真係相差無幾喔… 同時間, 看過了TRENDYLAND那邊既款式, 實在, 是令張師奶覺得剛才所看到的才是美…
離開TRENDYLAND, 張先生再一次問道, “咁點呀… 係唔係行返過去買呀!?”…
張師奶思考了好一陣子, 就是說, “UM… 唔買喇… 都係唔買住喇… 都未用得住, 又要揾地方擺, 買咗返去實俾公公婆婆話我地架.. 唔買喇!”
“吓!? 唔買呀!? 咁我地返屋企架喇!”
一直行, 一直行, 張師奶個腦袋根本無停止過咁諗住那套東東… 回家路上, 就是跟張先生說其實那件東東真係OK … 好似仲靚過TRENDYLAND那些… 張先生嘛, 就是說, “係呀… 其實真係靚架… 所以, 第時可能搵唔返架喇!... 佢得兩套喎, 真係應該好快就無架喇… “
張先生就是這樣子不斷說那套東東有多好 , 應該之後都揾唔返等等說話… 哎呀, 俾佢講多兩講, 張師奶就是想折返買下東西喔… 此語一出, 張先生就是停下腳步說, “係唔係買呀… 行返轉頭架喇…”
實在, 那一刻, 張氏夫婦已經遠離商場, 差不多行到返屋苑了… 不過, 兩個傻人就是這樣子行返轉頭, 立心買下那東東…
再次步入玩具店, 之前為張氏夫婦解答問題既醒目店員剛剛不在店舖內, 問到其餘兩位店員, 就好像是什麼都唔清唔楚咁… 由此DISPLAY那套好像有少少花, 張先生想要倉內另一套查看一下時, 舖中店員就是好像唔知道D貨擺邊到, 之後又同我地話件貨已然有人留起咗咁…
正當張師奶在遊說張先生放棄買下來的念頭時, 醒目店員出現, 就是把倉內既一套都拿出來給張氏夫婦看喔… 說實話, 做工不是很完美, 但是, 張先生就是仔細比較後二選其一決定要買下來…
真的, 印花不是太完美喔… 加上, 由於恩晞BB真係未用得著, 在店內經過一段長時間既糾纏, 張師奶就是覺得可以唔買住… 但是, 爸爸最終也買下來呢…
WELL, 講咗咁耐, 到底張氏夫婦買咗D乜野呢??? 答案就係… 維尼熊印花既小朋友摺枱摺椅呀!!!!!
以往, 大家都以為所有維尼熊野應該都係張師奶所堅持的… 不過, 在現實生活中, 張先生也有為維尼熊堅持既時候架… !!!
P.S. 由於張氏夫婦無打電話返去話會遲D返到, 一入屋就被公公大駡一頓喇!!!!!!!!!!2011年3月1日 星期二
人人六千蚊!?
2011年3月2日 (星期三)
由於小朋友大得快, 作為媽媽的, 儘管希望能夠幫恩晞BB扮下靚, 但係都會以合乎經濟原則為首要考慮… 恩晞BB既衫, 大多都係幾廿蚊, 過咗五十,甚至一百蚊的, 實在係少之有少… 除非媽咪或者DADDY真係超級鍾意啦…
同時間,知道現在市面上好多店舖所賣既都係”淘寶”貨時, 張師奶就更加會三思喇… 因為如果真係淘寶貨色, 張師奶也可以自己淘吧!!! 不過, 點都有例外既… 就好似CARTER’S 既衫仔, 淘寶係有好多呀, 不過, 有時係香港舖頭見到既款式, 我地又未必件件都可以O係淘寶到揾到喎….
今天晚上放工以後, 跟張先生經過千色店, 就是看到一條我地兩個都好鍾意既CARTER’S裙仔同一件衫仔呀… 夏天款式… 好可愛咁…. 起初, 見到兩件衫仔各要賣成六十幾蚊時, 張師奶都有卻步過架… 不過, 由於張師奶係淘寶網真係好似未見過呢兩件野, 加上張師奶又真係幾鍾意既關係, 最終, 張師奶還是適不過自己, 好捨得咁買咗返去送俾恩晞BB呀…
好啦! 既然財爺今日最新公佈話人人有六千蚊, 咁張師奶就獎勵自己, 用百幾蚊買野俾阿囡啦, YEAH!!!!!!!!!一樣的瞓覺模式…
2011年3月2日 (星期三)
話說, 由於張師奶小時候所住既地方有好多四腳蛇同小強出沒, 爸爸媽媽又常說, 只要四腳蛇條尾斷咗跌入我地既耳仔就會聾, 張師奶自小瞓覺就好缺乏安全感, 深怕瞓著覺既時候會被整聾, 因此, 自小瞓覺就養成咗一個習慣, 就是要有好多好多被去圍住自己先至瞓得著, 瞓得好…
無諗到既係, 原來呢D咁既習慣都會遺傳架喎!?
恩晞BB而家五個月大, 張氏夫婦觀察了好一陣子, 頓然發覺呢個寶寶跟媽媽一樣, 就是要有一些枕頭, 紗巾圍住自己, 她就會較快瞓得著呀…
當婆婆”見識”過恩晞BB真係有咁既習慣時就是說, “唉… 好學唔學, 就係學咗媽咪D衰野喔!!”…
訂閱：
文章 (Atom)