2012年7月24 日 (星期二)
上班半天, 六點多離開公司…. 正當張師奶在巴士上聽著收音機之際, 就是收到了一個電話…
“你好, 是張恩晞媽咪嗎?”… “係呀, 我係!” …
“呢到係盧醫生診所打電話黎架… 咁既! 代盧醫生假既古醫生覺得小朋友星期日照嗰張肺片有d 問題, 想你立即抱小朋友落黎俾佢睇一睇…!”
“吓? 我啱啱收到未返到屋企喎… 但係, 我想問下有乜問題呢?”
“醫生覺得小朋友應該患咗肺炎, 所以想你抱小朋友黎睇一睇, 應該要寫紙你哋同小朋友入院!”…
“吓, 肺炎?” … “係呀! 因為古醫生明天唔會係診所, 所以想你哋今晚帶小朋友過黎呢… 我哋呢到收八點…”
“明白.. 明白… 我哋八點前同佢落黎一趟啦!”
掛斷電話, 張師奶已被嚇得六神無主… 立即致電爸爸, “daddy, 你喺邊呀!?”… “公司呀!? 仲乜野呀?”… “診所打電話黎話代診醫生覺得係肺炎, 要寫紙俾恩晞入院!”… “吓!? 乜呀? 恩晞無發燒喇喎! “… “我唔知呀! 佢叫我哋盡快帶恩晞到診所去… 而家點呀!”… “公公喺屋企嗎?”… “唔知…” … “你搭緊車返屋企, 係唔係?”… “係”… “我打咗電話返屋企先, 之後再打電話俾你!”…
掛斷電話, 張師奶心急, 緊張得眼淚掉下來了… 心想, “肺炎? 肺炎會點架? 入院? 恩晞會喊成點樣呀!? 要帶乜嘢入院呀!?” 好多好多的問號, 擔憂湧現著, 眼淚不由自主地滴了下來…
收到爸爸的回電: “公公喺我哋屋企, 我已叫他先帶恩晞到診所去, 我而家離開公司再趕到診所去!”… “咁我應該點?”… “你返到商場睇下公公去到邊再會合公公啦!”… “係.. 知道!”..
掛斷了電話, 收到了爸爸whatapps message, 內容是五個忟憎圖樣…. 並寫道, “明明退晒燒啦, 點會咁呀!?”…
平日覺得好快返到屋企既車程, 今日變得特別慢… 點解咁耐都未到既… 張師奶心中問了好幾次…
終於到站落車了, 玫電公公跟他約好會面位置, 就是高速前進了… 但係, 張師奶的心仍是很怕, 一如以往, 除了張先生, 想到了的是家姐, “家姐, 我好驚呀!”… “吓? 仲乜呀!?”.. “診所打黎話恩晞肺炎要入院呀, 我而家趕去診所途中”… “唔使驚住, 睇咗先, 我一陣子再致電俾你…”
跟公公先帶恩晞到診所探熱去… 就是等到爸爸來才入醫生房了解詳情…
甫入醫生房, 恩晞當然是又一次地放聲大哭吧…
醫生問, “小朋友而家的情況如何?”… “其實佢只有咳, 主要係瞓著覺一小時後開始咳幾下, 抱起佢讓佢順翻之後, 佢又可以再瞓了… 同埋, 已經退晒燒了”…
“俾我聽一聽個背脊仔同睇一睇佢d 皮膚, 喉嚨仔” … 醫生檢查完畢, 就是將恩晞的肺片放在燈箱上… “依我所見, 小朋友兩邊肺都發炎了… 睇下呢d 白色既地方… 因為肺炎對小朋友黎講可以影響好多野, 唔小心處理可能會有肺積水或伸延至其他器宫, 我會建議你立即同小朋友入院囉…”
張先生問, “醫生, 係唔係好肯定佢係肺炎架喇!”… “係呀, 從X光片中睇到, 嗱, 呢D 白色陰影位置都係發炎”…
張師奶說, “醫生, 唔好意思, 我哋唔係好識睇張片, 白色位置係邊到?”… “嗱, 你睇呢d highlighted咗既都係…”
“醫生, 唔好意思, 我想問入到醫院會有d 乜野既treatment, 例如係打針, 食葯定係有其他野呢?”….
“呢d 都depends on 當值醫生同你個小朋友既接受程序... 我真係答你唔到…”
張先生問, “醫生, 其實係唔係好sure 佢係肺炎…?”… “係! 我可以肯定…”
張師奶問: “我想問係唔係呢一刻應該立即同佢入院呢!?”
醫生說: “我會suggest 係… 因為小朋友唔同大人, 佢哋既病變可以好快… 當場入唔入院係取決於父母既... “
“明白!” …
“咁你哋係唔係諗住同佢入威爾斯? 我會寫你哋係急症… 一般見到小朋友肺炎, 佢哋會重視應該會收入院既…”
“吓! 但係入威院應該要等好耐喎… 寫入仁安得唔得呀!? “
“可以, 你想寫邊, 我咪同你寫邊囉… “
“醫生, 我想問下小朋友d treatment 一般要喺醫院幾耐架”
“um… 都depends 架… 一般你預最少五至七日啦!”…
嘩! 最少五至七日? 咁筆醫院費用咪要好貴… 儘管恩晞有買保險姐, 但係, 如果費用太昂貴又係另一個考慮吧!
“醫生, 你幫我兩間院都寫咗先啦… 我哋之後先再決定啦…”
“好呀… 或者小朋友喊到咁可以先出去先啦.. 留低媽咪喺到得喇!”…
張先生同恩晞出去以後, 張師奶就是問醫生說 , “醫生, 我想問阿女既肺炎其實算唔算嚴重呢!?”
“um… 如果你問我, 我會話屬於中等程度… 比佢更嚴重的仲有…”
“吓… 中等程序!? 但係, 現階段來說, 我哋係唔係可以唔需要太擔心呢!?”
“um.. 都可以咁講… 但係, 好似我頭先咁講, 小朋友既病變係可以好快既…”
“醫生, 其實我個小朋友之前已經打晒d 肺炎針呢, 點解都會咁既…”
“咁始終係有病毒感染既機會呢… ok 啦… 你出去等啦… 一陣間姑娘會俾晒d 文件你哋攞入院喇!”
“醫生, 麻煩你可唔可以俾番呢個幾星期個食葯紀錄我, 等d 醫生知道佢食過乜葯呢!?”
“可以… 我寫埋俾你啦!”
步出醫生房, 張師奶第一時間就是打電話俾家姐, “喂… 家姐… 醫生話恩晞有中等嚴重肺炎, 建議我哋立即同佢入院喎..”
“吓!? 立即入院!? 使唔使呀!? 恩晞好差咩!? 我早兩日見過佢都ok 架喎…”
“係呀… 其實我都唔知… 恩晞而家無晒燒, 只係瞓咗咳only.. 但係個醫生話佢張肺片嚴重, 又話小朋友病變可以好快… 又話什麼肺積水之類… 唉!”
“咁佢叫佢入邊間院!?”… “佢話我哋想入邊間就寫邊間喎… 而家叫咗佢寫威院同仁安… 但係, 佢話一般要stay 5 – 7 日 … 我又驚入仁安會好貴… 入威院又驚要等好耐… “
“吓!? 咁佢係唔係自己睇返恩晞架?”… “我諗唔係囉! 我頭先問佢會有乜treatment 要做, 佢話係depneds on 當值醫生既.. “
“吓! 咁又好奇怪咁囉… 因為一般d 醫生會有自己掛牌醫院嘛! 咁佢會自己monitor 番個小朋友個case嘛… “
“我唔知呀… 但係佢無講過話自己睇返呢…咁點呀, 入邊間呀!? 我怕仁安好貴… ”
“吓!? 咁入仁安當然係貴架喇… 但係, 可能好多野可以flexible d囉… 入威院又真係唔知要搞幾耐… 你知你個女啦… 都唔知會點… “
“係呀.. 我好亂.. 唔知點…”
“唔係, 有無買保險先?”… “有”… “咁都應該cover 到既”… “但係埋單可能好貴囉..”
“貴就一定架喇… 但係可能可以take care 佢多d 啦… 咁入仁安啦…”
講到呢到, 姑娘叫名了就掛斷電話… 拿取完所有文件後就是致電家姐再說, “喂… 家姐… 攞晒文件喇… 係唔係要而家入院呢!?”
“其實恩晞張片係點架…!?”…”吓!? 個醫生指住d 白影話係發炎, 但係我哋點識睇呢!”
“姐夫問… 等陣, 我俾姐夫同你講…”
“芳芳… 恩晞張片睇唔睇到xxx… “….”吓!? 死啦, 我唔知你問乜呀… 等陣, 我俾daddy 同你講…”
當張先生同姐夫傾了一陣子以後, 就是覺得也許我們先問多一個醫生意見再決定… 同時間, 張先生想張恩晞張肺片傳給姐夫家姐看看…
但係, 張肺片咁大張, 可以點樣scan 呢!? 同時間, 要有燈箱先可以睇到張肺片呢… 想了一陣子, 就是想到快圖美… 也得試試看吧!
到了快圖美, 得出的答案是”不”… 它們未有這樣子的大型設計在店舖中… 那也沒有法子喔, 張先生就是說回家後再想法子…
正當我們已向著回家方向走之際, 張師奶忽然想到了攝影沖晒店… 於是乎, 我們就是推著恩晞走向另一個商場去, 希望店舖未關門同老闆可以幫幫忙吧!
感恩! 店舖未關門, 老闆娘亦同意借燈箱一用… 就是這樣子, 張先生用手機拍下了肺片, 我們得以用whatapps 傳給家姐姐夫看看了…
與此同時, 張先生亦想問問孫醫生既專業意見… 就係咁, 張師奶又一次透過whatapps 向孫醫生求救了…
實在唔懂得如何感恩, 感謝神讓我們認識到孫醫生… 發出訊息後不久, 孫醫生就是主動回電了… 跟孫醫生談上了恩晞的情況, 他也覺得無必要現在入院.. 始終, 在非必要既情況下, 佢都唔同意小朋友入院, 裡面太多其他細菌了…
同樣, 家姐姐夫看過肺片以後, 也都認為今晚入院是不必要的…
就係咁樣, 張氏夫婦決定明早先跟恩晞多看一個兒科醫生後再作決定吧!
神呀! 求你保守祝福恩晞呢個小朋友… 祢知道佢既需要, 祢知道佢既患處, 求祢醫治…
沒有留言:
張貼留言