尋找方向
2010年2月21日 (星期日-年初八)
今天晚上, 是到老師屋企團拜的日子...
MISS CHAU 果然係我地認識的MISS CHAU, 當我地幾個同學仔陸續咁到達MISS屋企的時候, 接待我地既, 係我地睇住佢長大的一對仔女, 主人家嘛, 仍然未返到屋企喎!? 當MISS兩公婆開門返屋企的時候, 就係我地呢班學生同佢地講, "咁遲架! 自己招呼自己喇! 隨便坐!!".... 太搞笑了吧!!!
同時間, 今年是第一次派利是俾小契仔"星星"喔! 小朋友實在大得太快了吧, 十個月大的小寶寶真係超大隻呀! 最好笑的, 我想是, 連張先生抱左契仔幾個圈都話撐唔住要好好休息一下呀! 哈哈!
田星星, 有相為証呀! 契媽餵過你食麵包呀!!!
十個月大??? 你似二十個月大多D 嘛!?
田星星與爸爸媽媽, 契爺契媽的合照!!!
睇下我地o既MISS ! 她在重溫湊寶寶的感覺喔!!
2010年2月17日 (星期三 – 大年初四)
今天, 張先生為著想陪奶奶到舅父阿姨處拜年, 特別告了一天的年假… 作為太太的我, 今年也很乖喔! 就是跟著張先生周圍去呢! 輾轉的到過大角咀, 葵興, 荃灣再直至晚上要回沙田的酒樓出席外婆那邊的大團拜, 整個人就像散了一樣… 吃過晚飯以後, 就是一心想早點回家, 沖一個熱水涼, 好好的倒頭大睡…
差不多十一點回到屋企門前, 奇怪? 怎麼門鎖開不了??? 站在屋企大門前, 無論我跟張先生如何的嘗試, 門鎖就是扭不過去… 試了不下數十次, 就是沒法子吧, 唯有到大堂去問一下管理員有沒有開鎖師傅電話吧!
好不容易接通電話, 師傅就是跟我們說, 最少要等上一句鐘的時間… 一個鐘頭的時間, 我們去邊到呢? 張師奶第一時間當然想到了娘家吧, 但是, 張先生就是怕老人家會擔心… 但係, 天寒地凍加上大年初四, 很多可以容身的地方(如甜品店)也未有開店, 我們可以去邊到坐上一句鐘的時間呢? 兩小口子站在屋苑平台吃了一陣陣西北風以後, 又是心有不甘的上樓再試, 當然, 又是失敗吧! 最終嘛, 我們也唯有到娘家走一趟吧!
實在, 那一句鐘的時間叫我們很是擔心, 因為, 師傅在電話中說有可能要爆門… 爆門?? 怎樣爆呢! 說實話, 如果只是爆鎖, 也只是有限錢吧! 爆門? 那麼要整扇門裝過嗎?? 當天晚上如何睡覺呀? 怎樣看守著屋企呢?
感恩! 真的感恩! 一句鐘以後, 開鎖師傅花上了時間和一點點功夫, 還是可以用鎖匙開門…
正式踏入家門的時間嘛, 也差不多十二點半了…
2010年2月14日 (星期日 – 大年初一)
按照慣常的習俗, 大年初一, 當然是要先到夫家同奶奶拜年啦! 與往年不一樣的, 就是今年多了細佬兩夫婦, 奶奶多左一個新抱向她拜年呢!
也許, 因著小時候看到媽媽每到大時大節也會斟茶俾女麻女麻飲的關係, 自從做了張師奶以後, 自己一直也保持著這個習俗, 就是總會在大年初一特別斟茶俾奶奶, 再講一些祝福的說話… 不過, 其實張師奶今年也差點忘記喇, 還好, 得張先生提醒吧!
今年嘛! 自己這樣做, 當然也提議弟婦一齊做啦! 我諗, 當看到奶奶那個笑容時, 就是什麼說話也不用說了… 普普通通的一杯茶, 喝在奶奶口中, 就好像是加了糖一樣… 她的笑容嘛! 就是那種由心笑出來的感覺吧! 簡簡單單的一個動作, 背後實在是一種愛的表達, 對奶奶的一份尊重吧…
今年, 張師奶在新年還試了一個新玩意呀! 什麼?? 就係包角仔喇! 哈哈, 看到張先生包角仔的功架, 實在覺得他很叻喔… 我想, 最好笑的, 還是奶奶成日都問張先生, 點解佢包個d 會咁靚喎, 哈哈!
睇下我家廚師張先生幾認真!
張先生真係有d 功架喔! 俾個"叻"佢呀!
至於我喇喎! 當然係扮野啦! 剩係攞住個棍影相咋!
仲有呀, 摸左那支棍子, 成隻手都好肥膩呀!!!! 這就是我最怕煮野食的原因呀!
睇下! 好靚的角仔呀!!
2010年2月14日 (星期日 – 清晨時份)
實在, 唔知由年廿幾開始, 張氏夫婦都有共識想在今年行一行花市… 唔講大家可能未必知道, 張師奶向來有一股同人迫餐死的癮…. 在早幾年, 當張師奶仍有少少青春活力的時候, 平安夜會出去迫, 什麼美食博覽會, 工展會係點樣都要去, 年宵年場嘛? 就係要等到三, 四點先出維園, 務求要係維園六點關燈的時候掃平貨…. 只可惜, 人大了, 巳經唔係好可以捱更抵夜…. 只要夜少少, 對眼真係AUTO-CLOSE…. 所以呢, 近幾年嘛! 唔係最多撐在一, 兩點之前係咁易行下返來, 就係直頭無去行, 一個字, 懶呀!
年紀漸長, 而最了解張師奶的張先生, 大家不其然的都有同一個諗法, 就係不如試下在日頭行花市, 咁樣未可以唔使好似以前咁捱夜咁慘囉! 只可惜, 一日復一日, 話咁亦巳到了年初一的凌晨時份, 我地嘛, 未就係仲未行花市囉!
說實話, 張氏夫婦完成最基本的新年準備巳是凌晨兩點幾的時候, 外面天寒地凍, 又落雨, 我地兩夫婦就係成日咁問, “出唔出去呀?”…. “um, 唔去囉?”… “ 吓, 唔去喇? 但係我地之前都諗住去架喎…” .. “咁換衫行啦!”… “哎呀, 但係又好凍同有d眼瞓喎… “… 幾經掙扎, 最終, 我地成功地在三點多出門口了…
不過, 近近地啦! 今年唔去維園了, 我地去旺角花墟行一行吧! 坐火車到了旺角, 由於仍然封路的關係, 好不容易才由火車站兜了一個大圈才到達花市… 正當我們要踏入花市還未夠五分鐘, 大雨便下起來了… 四周尋找張師奶每次到花市必買的cute 版風車, 找到風車買過以後, 雨大得實在叫我們走不下去了… 就此, 我們在花市只逗留了不夠十分鐘便決定回去了, 我們兩夫婦太搞笑了吧!
來回用了差不多個半兩小時的時間, 換來的, 就是我們在寒風下共度了一個雨中情人節, 以及一個小吉仔風車呢!
凌晨三點多鍾的"馬鐵"...
凌晨三點九... 終於去到大圍站了... 張師奶的眼睛開始auto-close 喇!
除左眼瞓之外, 其實係好凍... 兩小口子都凍到面青口唇白囉!!!
落大雨呀! 買左風車仔就走lu....
很滿足的張師奶... 買左小吉風車, 係旺角站等火車返屋企喇!
2010年2月14日 (星期日)
雖然各大媒體都紛紛報導, 今年的大年初一撞正情人節… 但是, 作為師奶的我, 當忙為屋企作各樣的賀年準備時, 真的巳忘記了過了十二點, 除了是踏入虎年的大年初一外, 實在也是情人節喔!
跟張先生說了"新年快樂"以外, 就是沒有說"情人節快樂"... 大意的張師奶無心裝載, 向來會花心思的張先生仍是會為張師奶帶來驚喜... 明明在整理新年擺設的, 也就忽然變出一份小禮物...
雖然唔係什麼貴重禮物, 亦唔係張師奶平時喜愛的卡通人物, 但係, 當張師奶看到呢隻小小熊時, 實實在在是從內心深處笑出來....
祝願張師奶身邊所有朋友也一樣幸福快樂.... 情人節快樂!!
肥豬肥婆說: "媽咪, 爸爸話送俾您架!!"
Hi ... 我係 "I Love You" 熊Bear Bear ....
2010年2月13日 (星期六)
吃過了那個有點唔知可以點樣形容的BRUNCH 後, 我們就是在商場內逛逛吧! 真的是滿有新年氣氛吧! 因為, 周圍都係人… 走了一會, 買了點東西, 我們跟老爸老媽也就各自回家去. 點解? 話晒都係年三十, 點都要打掃一下屋企呢!
回到家中巳差不多是點幾兩點了… 坐了一會, 向來都唔係咁鍾意做家務的張師奶, 當然是諗盡方法偷懶啦! 因要引開張先生的注意力, 就是不停的問問題呢… !
“爸爸, 今晚食乜呀? 不如打邊爐啦, 咁樣, 你未唔使煮囉!”…. 張先生的答案嘛, “是但啦, 你問下Daddy, Mummy囉” … 說實話, 其實我又唔係真係好想打邊爐的, 不過, 好似一次過煮熟就有得食呀嘛… 及至打電話俾媽咪, 她說大姊一家話今晚一齊食飯, 就係咁, 本是一個簡簡單單的四人邊爐, 頓然變成了八人邊爐宴... 最終嘛, 就是要張先生陪張師奶一齊出去買野囉… 原本想做的掃地抺窗, 就是做到一半都要先放下來呢…
買野回來, 再洗下菜, 不經不覺, 時間就係一分一秒咁過去喇! 七點開爐, 老爸老媽在九點多鐘回家去, 大姊姐夫嘛, 就是到十點多才離去… 距離十二點尚餘個半鐘, 張氏夫婦實在趕到不得了, 又要洗碗筷, 又要趕洗頭沖涼, 仲要貼揮春, 整全盒… 說實話, 真係好趕的呢… 實在, 知道張先生有點不開心呀! 因為我所認識的張先生, 就係最唔鐘意plan 左d 野做唔到, 又要趕頭趕命咁… 所以呢, 張師奶呢個唔稱職的太太, 就只有不斷咁say sorry 囉!
不過, 儘管係趕d, 張氏夫婦也算趕得切完成最基本, 最基本的新年準備呢! 哈哈!
虎年快樂!2010 年2月13 日 (星期六)
年三十, 早上八點幾起床, 慣常的打電話給媽媽找爸媽們一同吃早餐去… 誰不知, 婆婆今天對我有一點狠心, 她竟然請我食檸檬 !!! 原因嘛! 很是簡單, 年三十, 媽媽仍在努力於製作各式各樣的賀年食品…
唉! 怎麼辦呢? 張先生又未起身, 自己又唔係好想一個人走落街食早餐, 又唔想自己煮野食喎… 點好呢! 唯有睇下電視先啦! 看著電視, 看著時間一分一秒咁過… 唉! 肚子真的撐不住了, 真係覺得好肚餓喔!
說實話, 一日正常的三餐中, 張師奶最重視是早餐, 因為這是一天的開始, 吃得飽足以後, 就有氣力有精神工作嘛… 因此, 每天早上, 張師奶定必要吃早餐… 不然, 頭暈暈, 手腳乏力的張師奶就會在你面前出現了…
既然肚餓, 到底可以怎麼辦呢???? 哈哈, 向來自私的張師奶要發作了…. Um, 也差不多十點了吧, 就等我扮晒野咁走入房攞野, 然後故意發出聲音吵醒張先生吧! Yeah! Yeah! Yeah! 奸計得逞, 成功了, 可以落街食早餐喇…
一心諗住攞KFC 既coupon 去食早餐, 誰不知剛踏出門口, 屋企電話就響起來… 到底係邊個呢? 落到樓下, 先致電媽媽, 看看是否她打電話過來吧! 哈, 真是媽媽! 什麼事嘛? 她說叫我們返屋企煎糕吃喎… 吓, 食糕? 當然唔可以啦! 張師奶咁辛苦先叫醒張先生去食早餐, 我地要去食 KFC呀… 唉! 媽媽聽到我們要吃KFC, 她竟然說又要去喎!?
問題是, 他們兩老尚未換衫, 最少要二十分鐘後先過到商場, 唉…. 無辦法吧! 先在商場走走, 到他們來到商場先一起食早餐吧! 再想了想, 老爸也過來吃喎, 要是到KFC的話, 他未必有食物岩食呢! 也許, 我們也得轉轉地點呢! 三十分鐘過後, 最終我們的選擇是, 遷就老爸老媽, 我們改到”椰林閣”去..
唉! 踏入餐廳巳是十點五十分了… 也不知道是否年三十的關係, 早餐牌上很多食品也說售罄了… 服務嘛? 所有侍應都是忙, 忙, 忙, 我們嘛, 就是叫天不應, 叫地不聞… 一個叫人非常失望的早餐...
不過算了吧, 能夠跟老爸老媽一齊吃早餐, 也很好, 很享受喔!
滿有新年氣氛的商場喔! 大金魚呀!
2010年2月10日 (星期三)
今天晚上, 由於張師奶要出席一個供應商的週年晚宴, 放工以後, 就是跟同事們一同坐的士到尖沙咀去... 實在, 坐在的士車廂內, 肚子巳經開始餓得不得了, 連話也不想多說...
到達酒店以後, 週年晚宴尚有一段時間才開始, 於是便跟同事們到酒店對面的"活方"商場去... 走了一會, 看到Starbucks, 當陳蘋果說內裡裝修有點特別時, 張師奶也就藉故走進去一趟... 與此同時, 當然是左顧右盼, 到底有無什麼食物可以買下來充充飢吧!
看著看著, 終於給張師奶找到了小件裝的"雲石"蛋糕, 12元件, 係就係貴左D, 但係無辦法呢! "二寶"果汁糖令媽媽肚餓了, 12元就12元啦... 當陳蘋果見我買左蛋糕, 她真的很好, 就是跟其他同事說我們想在Starbucks坐坐, 實在嘛, 就是陪我這個孕媽媽吃罷蛋糕才到商場走走啊!
果汁糖, 你真係要記得蘋果姨姨o既好呢!!!
2010年2月8日 (星期一)
因著買了迪士尼年票的關係, 在特別的喜慶節日, 當然要到迪士尼走一趟吧! 點解? 因為我地要同穿上特式服裝的卡通人物拍拍照嘛!
剛好今天請了半天年假, 就是要跟公公婆婆到迪士尼, 看看農曆新年的迪士尼喔! 今天雖然是落雨天, 不過也好喔, 當我們到了迪士尼以後, 雨也就停了!
DAISY 好靚呀!
恭喜,恭喜!
虎年行大運...
2010年2月5日 (星期五)
告了一天的年假, 除了想讓自己休息休息以外, 就是想到嘗試到威爾斯作登記...
帶同由普通科醫生開出的懷孕証明書, 住址証明, 再次踏入威爾斯的婦產科作登記, 心情原來是那麼複雜...
時隔年多的時間, 威爾斯再一次的不同了... 由馬鐵走到威院去, 旁邊那座新的大樓好像將近落成了... 還記得清楚, 兩年前在病房所看到的只是地盤吧了...
步入威院, 一直走到二樓的婦產科, 樓層雖然未有改動, 但是, 內裡的位置格局都改變了...
而張師奶嘛, 也都成長了... 再次陀著小寶, 只是, 感覺好像有點不實在...
還好吧! 可以憑著家庭醫生所發的懷孕証明書先作登記!
2010年2月1日 (星期一)
在公司中, 坐在張師奶旁邊的陳蘋果, 公事也好, 私事也好, 都是一個傾談的好伙伴...
一直以來, 陳蘋果也知道張師奶需於二月尾隨老細到孟加拉去... 今天嘛, 正當蘋果經理問及孟加拉之行的出發日期時, 當張師奶答道不隨老細出發時, "懶"醒目的陳蘋果, 想到了張師奶上星期放了一天年假, 竟以為張師奶定必於當日外出檢查知道自己懷孕了... 哈哈! 太搞笑吧! 雖然那一天的年假根本跟果汁糖沒有關係, 但是, 這個姨姨也算叻叻啦... 因為, 她估中了今次取消了孟加拉之行, 是張師奶的"二寶"出現了嘛! 哈哈!
果汁糖! 果汁糖! 認住蘋果姨姨啦!
2010年2月1日 (星期一)
由於公司在年頭開立了孟加拉分公司, 而張師奶早被老細安排負責協調孟加拉同事的公作, 孟加拉之"遊"實在是勢在必行吧! 跟老細相討以後, 也許, 就是需在二月尾, 新年假過後便隨老細出發去, 一個星期的時間吧.....
第一次有機會出TRIP, 縱然是孟加拉這個落後的國家, 張師奶實在也覺得是個難得的機會, 好好的體驗吧! 認識張師奶的好朋友都知道這個麻煩師奶是對蚊叮有敏感的情況, 所以, 對於孟加拉之行, 張師奶最擔心的也只是當地的蚊患吧了! 心想, 盼望做好所有可以做的防蚊準備, 避過被蚊叮的命運吧!
奈何, 得悉果汁糖的存在後, 作為媽媽的我, 擔心自然多起來了... 除了最基本的蚊患問題, 懷孕初期, 到這麼落後的國家, 會水肚不服嘛.... 再計一下時間, 二月尾的時候, 果汁糖大概是八至九週大的時間, 按照前年陀亦霜的經歷, 嘔吐頭暈的徵狀會在此階段出現了... 身在孟加拉的我, 到時要坐車四處巡視生產商的廠房, 能夠應付嘛!? 身體出現什麼問題的話, 可以怎麼樣?
跟張先生相討過後, 還是決定先跟老細說說自己的擔心... 如果務必要隨隊出發的話, 也沒法子吧, 唯有自己事事小心吧!
今個下午, 好不容易找到機會跟老細面談, 遞上了醫生的証明書, 老細也就二話不說的跟張師奶說, 他自己過去孟加拉吧!!!
感恩, 感恩, 真的很感恩... 說實話, 跟現在的"男"老細相處, 遠不及跟以往"女"老細的輕鬆, 對他的感覺, 奇怪的有一點隔膜.... 雖然如此, 他也是一個相當體諒員工, 會替員工出頭, 保護員工的好老細吧!!!!
2010年2月1日 (星期一)
記得自己在陀著亦霜的時候, 每當媽媽跟朋友們說到肚裡的小寶貝, 媽媽都會以"張小B"做代號的...
再次懷孕, 媽媽覺得"張小B"這個代號應該為亦霜所專有的... 於是, 想了一想, 想到了"二寶"這個稱呼, 但係諗諗下, 叫佢做張二寶有點點怪怪的... 諗諗下, 竟然俾我呢個媽媽諗到"二寶果汁糖"....
不如叫"果汁糖"啦... 甜甜蜜蜜的, 為我家帶來歡樂....
