尋找方向
2008年9月11日(星期四)
自懷有張小B以o黎, 一直都唔敢做Facial....... 因為怕唔知會唔會整到小B嘛, 所以一直忍, 忍, 忍......
直至最近支Cleaning Gel 用晒, 一定要見一見Facial 姐姐, 終於抱著大肚子到中環走了一趟... 由於Facial 姐姐都巳經生過小朋友, 話題實在滔滔不絕, 樂極也!
談及做Facial 的疑慮, Facial 姐姐說真的不用擔心, 加上今日下午又有時間, 所以做了第一次Facial .... 嘩, 媽媽真的樂透了!
小B, 你有無特別感覺呀? 哈!
2008年9月6 日 (星期六)
雖然婆婆生日巳過(因為昨天才是正日嘛)... 但是, 為了要遷就遠住在港島區的三家姐, 我們選擇了今晚才一齊食Dinner Buffet 跟婆婆慶祝快樂生辰.... 去邊到食? 當然是婆婆至愛, 旺角的帝京酒店啦!
嘩! 小B收到了第一封利是呀! 是婆婆俾小Bo架.... 我們開始一家三口了, Yeah!
哈哈, 小B今晚食o左士多啤梨雪糕呀... 睇下媽媽o既"罪證"先!!!!
2008年9月6 日 (星期五) 農曆八月初六
今天是婆婆生日呀.....
媽媽請了一天假期陪婆婆渡生日, 有什麼節目呢? 就是帶婆婆去食自助午餐呢...... 當然少不了公公同仍在媽媽肚中的小B 啦....
媽媽之前一天預約了好幾間酒店, 最後都是選擇了尖沙咀的帝苑酒店..... 都唔平o架... 但係婆婆生日嘛... 無計啦...!
公公婆婆都覺得呢間酒店唔算太多野食, 但係在我媽媽而言, 都差唔多啦... 話晒係高級Do既酒店嘛.... 最開心o既係有好多好多點心.... 仲有HAGGEN-DAZS 雪糕, 唔係一杯杯o架.... 係有個廚師一球球咁整o架..... 真係好好味呀......
食過BUFFET, 公公婆婆同媽媽仲一齊去永安百貨行左一陣, 公公仲買左套要小B 到一歲先o岩著o既衫送俾小B 呢...
晚上同姨媽一家到酒樓食飯, 之後仲去表哥表姐屋企, 同婆婆一齊切蛋糕呢....
2008年8月29日(星期五)
小B, 知嗎? 今天爸爸媽媽原先打算放工後帶你到永安百貨選購你的BB車.... 可是, 可怕的事發生了, 將爸爸媽媽原有的計劃完全打亂了.... 是什麼? 就是我們的屋企水浸了...
下午4點36分, 媽媽o係公司收到管理處的電話, 因為管理員巡樓的時候發現我們的家滲水, 於是便問媽媽是否在家內.... 奈何爸爸媽媽是上班一族, 又點會有人o係屋企呢?
感謝神, 因為祂安排我o地同公公婆婆住得近... 放下電話, 媽媽便立即致電公公婆婆, 叫公公婆婆趕快幫爸媽過去查看出了什麼問題..... 說實話, 放下電話以後, 媽媽的心情一直未能平復, 腦海中不斷問自己, "今朝早上無關水喉嗎?", "沒有可能, 媽媽都未有開水喉, 到底是什麼一回事呢?"....
等了半小時, 爸爸都打來問, 公公婆婆有無打回來..... 著實, 爸爸媽媽各自都著急到不得了...... 致電公公後, 心中一沉: "你o地屋企被水浸了... 全間屋都是水呢.... 你o地有無買保險呀..?".... 一連串的問題令媽媽不懂反應, 只有致電爸爸, 好讓爸爸跟公公說吧.....
好不容易才等到6點放工, 一出大廈門口便衝上的士趕回家...... 踏入大廈的一刻, 管理處的姨姨巳急急地為媽媽按lift..... 上到屋企.... O..... 水, 水, 水..... 周圍都是水....公公婆婆一身濕透的為我們吸水抺水..... 公公, 婆婆, 辛苦你們了...!
看到整間屋水浸的模樣, 爸爸失落的樣子...... 媽媽就是沒有辦法, 因為媽媽肚內懷著小B... 地面又濕又滑... 媽媽就只有乖乖的坐著, 不可為各人再增麻煩.....
小B, 雖然我們的屋企被水浸了, 家居保險又剛過期..... 但是我們真的要學會感恩. 因為神有著祂的安排...
- 感謝神, 俾我o地跟公公婆婆住得近, 公公婆婆可以好快的幫爸, 媽, 小B查看屋企情況..
- 感謝神, 讓事件o係星期五下午發生, 爸爸剛忙畢星期四的presentation, 星期六日爸媽不用上班, 好讓爸媽有時間處理執拾..
- 感謝神, 浸著屋企的都是食水.... 否則....
- 感謝神, 屋企的水浸未有影響其他的業主招致賠償...
- 感謝神, 小B還未出世以及新買的BB床剛好未有送抵, 否則真的難以照顧...
2008年8月28日(星期四) -清晨時分
自從懷了小B, 一直以o黎都唔係訓得太好.... 當與同事或朋友傾談提到抽筋問題時, 都好慶幸到了小B31 週大, 仍然未有抽筋的情況....
唔知小B 係唔係聽到媽媽咁講, 而佢又想媽媽試下抽筋的感覺... 今日終於抽筋了.... 嘩, 好痛呀.... 係睡夢中痛到醒的感覺真的不好受呢...
小B, 你要乖乖呀..... 因為媽媽的腳真的很痛呢!
2008年8月24日(星期日)
今天, 爸爸媽媽帶小B到契爺契媽屋企去....
好o野! 除了契爺契媽, 仲見到Mon 姨姨同媽媽的中一班主任-周鳳美老師... 哈, 仲見到老師o既一對仔女呢.... 睇下, 我o地去左飲茶呀, 幾開心!!!
2008年8月9日(星期六)
懷孕以來, 心中一直都有小小的疑問, 就是: 小寶實, 你會似爸爸還是媽媽呢?
之前一真睇不同的forum 都有提過照4D..... 心想, 係唔係真係會睇到的呢.... 雖然係貴一點, 但係都同自己說, 幫小B照照吧! 就正如拍婚紗照一樣嘛, 是一種紀念嘛..... 到小B長大後再俾佢睇番, 真是一個好好的紀念啊!
28週5日大的小B.... 爸爸媽媽今天帶你去拍拍照吧, 你要乖呀... 要訓得靚靚, 否則醫生叔叔睇不到你的啊!
約了林勇行醫生早上10 點, 踏入診所巳是多麼的繁忙.... 係見醫生前, 不斷的跟小B 說, 要訓靚靚呀... 但係唔知點解, 自己總覺得小B 今日應該會不太合作.... 果然, 女人的直覺真的不可少看呀..... 林醫生將儀器放到媽媽的肚皮上, 便說: O..... 小B背向我們呢.... 耐心等候吧!.... 當醫生走出房間的一刻, 媽媽心中只想: 吓, 就咁訓o係床上唔郁, 小B會轉身嗎? 同時間, 張先生同我就開始不斷幫小B 做按摩, 跟小B 說話...... "小B, 要乖乖呀.... 轉下姿勢啦.....醫生叔叔收費好貴o架..... 叻叻呀...!"
過了大概10分鐘左右, 林醫生返o黎喇..... 一照... 嘩, 小B 真的很聽話, 轉身了.... 感謝神, 讓小B聆聽爸媽的說話........
雖然小B 轉身了, 但係張家小B有一個慣常手勢, 就是最愛用自己的小手遮住面仔, 林醫生說: 咦, 遮住面仔喎, 拍拍佢啦...... 哈哈, 呢個時候, 爸爸, 林醫生都在拍媽媽的肚皮..... 嘩, 小B的手仔真係縮開了.....! 看著螢光幕, 看著小B將小手縮開, 小B的實在真的叫我好感動...... 心中只想, O.... 這就是我跟張先生的小寶貝了....
當林醫生不斷調校儀器..... 當去到一個好清晰的畫面時, 聽到林醫生說: 嘩, 好得意時, 心中的喜悅真的不知如何形容..... 不過最好笑的是, 林醫生說: 是仔嘛...? 我同張先生對望而笑. 說: 醫生, 是女呢..... 林醫生看看我, 看看張先生, 說: 似佢(爸爸)呢? 呢個時候, 媽媽大叫了.. 吓, 點解會似佢o架?? 身旁的林醫生同護士都笑了, 林醫生還說: 可能會變的呢... 但係當繼續照時, 醫生還是忍不住說: 真係似佢(爸爸).....
小B, 你真的似爸爸嗎? 出世後, 你會有一點似我嗎?
28 週大的你...... 仲有三個月時間就同我地見面了.... 知嗎, 當媽媽看著手中的4D 相, 我不斷跟自己說, 我一定會好努力咁生你呀.... 你要好似今日一樣咁聽話, 同媽媽一齊努力, 你要健健康康的出世, 正常開心的在我們當中長大.... 爸爸, 媽媽, 公公, 婆婆, 女麻女麻都好錫你的呢...!
