尋找方向

2010年7月9日星期五

二十七週一日: 爸爸是何其的好!!!

2010年7月9日 (星期五)

因著張師奶的皮膚問題, 因著醫師的一番說話提及有關飲食要注意的地方, 張先生就是有感可能是自己早一排沒有時間煮飯, 張師奶成日要出外食飯而引致現有的皮膚問題...

於是嘛, 張家廚師復工了... 整整的一個星期, 張先生就是盡量的準時放工, 為我這個麻煩太太準備晚餐....

實在, 認識張師奶的朋友也知道張師奶唔識煮飯, 亦很怕煮飯... 相反嘛! 洗碗洗碟就完全無問題, 只要不用煮, 要洗幾多碗碟也可以呢...

唔知呢! 實在太怕生肉那種油膩的感覺, 就像無論是洗幾多次手都無法洗淨一樣... 同時間, 煮飯那種熱能, 實在叫人煮完之後就唔想食了...

最記得的一次經歷是這樣子的... 大概是週末的下午, 張師奶一心為張先生煮一個簡簡單單的公仔麵, 加點肉丸, 加少少菜咁... 但係, 當完成這碗麵以後, 張師奶就是自己已唔想食野了... 結果嘛, 原本諗住煮完張先生個麵, 再煮自己那個跟他一齊吃的.. 最終嘛, 就是只有張先生自己一個人吃午餐...

實在, 這就是張先生最唔鍾意的情景... 記得張先生當時跟張師奶說, 實在, 只要可以一齊食野, 吃什麼也沒有什麼所謂... 吃飯的時間應該是一同享受的喔!

所以嘛... 張師奶就是張師奶... 繼續負責洗碗的部門呢!

看看吧! 一連五日的愛心晚餐呢...

七月五日...

七月六日...

七月七日...

七月八日...

七月九日...

二十七週一日: 威院檢查...

2010年7月9日 (星期五)

今天是媽媽要返威院檢查的日子, 預約時間為早上九時四十五分... 爸爸媽媽在大家樂吃過早餐, 便坐馬鐵到威院去...

由於孫醫生已到英國去了, 今次的檢查將會由另一位醫生負責... 的確, 孫醫生在媽媽上一次檢查時已記錄, 將會把張師奶的檢查交由另一位可信賴的醫生負責, 所以嘛, 張氏夫婦對今次的檢查也有少許的期盼, 期盼著跟這位醫生見見面... 不過, 期盼還期盼, 我們也有心理準備一切的檢查跟之前孫醫生的細心會不一樣, 始終, 我們跟這個醫生完全不認識, 對於他或她而言, 我們只是一個CASE 吧...

等上了一個多小時, 終於聽到自己的名字了... 甫進診症室, 先看到房內有三個醫生坐著, 旁邊的兩個手拿著筆記簿理應是實習生吧... 瞓在檢查床上的張師奶, 等待著醫生過來檢查... 過了一陣子, 一位年輕的女醫生走到張師奶身旁, 先用軟尺在我的肚皮上量度一陣子, 然後就是用胎心機放在張師奶的肚子上... 聽過了果汁糖的胎心聲, 今天的檢查可說是完成了...

張師奶整理過衣服後, 走到醫生旁邊坐下來時, 就是看著女醫生的名牌... 此時此刻, 張師奶覺得有點不對勁吧... 記得孫醫生在預約紙上寫的醫生應該是姓梁的嘛, 這位女醫生怎樣是姓鍾的呢... 亦因為咁, 張師奶多口的問道... "醫生, 唔好意思呀, 我想問一下, 今天我所約見的不是梁醫生嗎?" ... 那位年輕的女醫生就是冷冷的答道, "係呀, 不過梁醫生今日當值唔得閒, 而你之前睇的孫醫生已經唔係香港喇... 咁你之後想係邊到睇? 其實可以返健康院的呢...!"

因著張師奶在健康院會被視作"恐龍"一樣的原固, 儘管檢查過程都是一樣, 張師奶也選擇在威院睇吧...

離開威院時, 跟張先生談到事實就是如此, 我們確信沒有了孫醫生的照顧, 檢查必然是不一樣的, 只是沒有想到就是連梁醫生也見不到吧..!!! 不過, 也不要緊吧... 一切隨緣囉...

同時間, 在張師奶的記憶內, 剛才所見的女醫生, 理應是當日第一個用照聲波替張師奶檢查而探測到亦霜完全停止活動的醫生... 兩年過後, 她已變成可以領導實習生的醫生了...

2010年7月4日星期日

教會懇親聚餐...

2010年7月4日 (星期日)

教會每年也會有懇親日的安排, 今年嘛, 就是在百樂酒店辦了一個懇親聚餐的活動...

今次嘛, 張氏夫婦已請不動老爸了... 張師奶就是敵不過他那副牛皮氣吧... 不過也好, 除了老媽以外, 張先生成功邀得奶奶一同參與...

實在, 很感謝張先生的配合安排... 我想, 張師奶之前也都提及過, 奶奶是個傳統到不得了的女性, 加上老爺已離開, 傳統祭祀的思想實在已經根深柢固...

對於教會每次舉辦的懇親活動, 張先生也出心出力的邀請奶奶出席, 我想, 目的很是簡單, 就是想透過一些聯誼活動, 讓奶奶也有機會認識一下新抱的所信的宗教吧...

在今早的崇拜中, 眼看奶奶不知不覺的睡著了, 而今次的懇親日, 也許老人家可能只當今次的聚會只是吃個自助午餐吧, 對於講員的說話未必在意, 但是, 張氏夫婦就是盼望, 箇中的一些思想意念, 可以慢慢, 慢慢的"滲"進她的思維裡吧...

2010年7月3日星期六

二十六週二日: 媽媽的中醫師...

2010年7月3日 (星期六)

實在, 張師奶的皮膚一直以來都唔係太好的... 未陀小朋友時, 當然可以用盡唔同的方法, 用盡坊間不同的藥膏去治愈皮膚問題...

可是, 當近日手手腳腳開始出一D莫明既粒粒, 現在陀著果汁糖, 作為媽媽的我, 就是什麼也要小心, 平時用開的藥膏都唔敢搽...

由於張先生話張師奶隻腳的情況好似越來越唔妥, 實在開始有點擔心了... 痕癢不特止, 範圍好像有點擴散... 唉! 點算好... 婦產科又未到期檢查, 可以點呢? 張氏夫婦嘛, 就是想到了我們的中醫師吧!!

認識潘醫師是由張師奶的傷風感冒開始... 醫師給我的第一個感覺是一點也不像中醫師, 應診的時候, 覺得自己好像在睇西醫一樣... 記得第一次睇醫師時是生產完大概三, 四個月左右的時間, 由於用藥時提及到經期的問題, 有關生產亦霜的事, 潘醫師也略知一二...

大概過了半年, 再次因著傷風感冒的問題到醫師處求診, 想不到的是, 醫師對張師奶仍有印象, 關切的慰問實在叫人窩心... 久而久之, 彼此的關係也互相建立了...

往後的應診嘛, 跟醫師就是什麼也可以談上... 信仰啦, 家庭啦, 自己為人老婆, 為人新抱的瑣事, 醫師作人爸爸, 老爺的開心事... 每次的求診都是嘻嘻哈哈的呢...

今天嘛, 給醫師看過了皮膚的問題, 都是先洗洗皮膚, 不吃藥吧..!!!

因著醫師話張師奶陀果汁糖都幾精神, 幾好睇的關係, 張師奶嘛, 當然是拉著醫師合照啦..!!!

2010年7月2日星期五

師奶仔之心頭好... 魔鬼與天使!?

2010年7月2日 (星期二)

聽到"師奶"呢個稱呼, 唔知大家會諗起D乜野呢!?

通常係星期五先會去超級市場掃特價貨既女人? 樣樣野都要計過度過? 可能為左慳幾蚊又行多幾步路? 鍾意排隊? 儲印花? 貪平?

張師奶知道身邊有D朋友仔好抗拒人地叫佢地做師奶既, 因為佢地覺得呢個稱呼應該係講緊o個D上左一定年紀的女人... 不過咁喎, 張師奶可能個人有D奇怪, 我覺得俾人叫做張師奶都幾得意呀... 同埋, 我份人又真係幾師奶仔嘛...

WELL, 今天, 張師奶的師奶心態又黎喇! 到底仲乜野!?

話說, 昨日下午返天水圍同奶奶飲茶, 經過美心餅店, 見到有個購物袋好靚呀... 好似話買個天使/魔鬼蛋糕再加三十蚊就有囉喎... UM, 好似都幾抵呀... 有得食之餘, 加少少錢又有個袋... 其實已經心郁郁呢...

及至昨晚返到屋企, 收到三家姐個電話, 佢就係打電話黎同佢個妹, 即係我張師奶講, 話佢好鍾意美心個購物袋, 叫我買蛋糕食然後送個袋俾佢喎... 嘩, 頓然令我諗起今日見到o個個袋其實自己都好鍾意喎...

直至今天下午, 在雜誌上看到美心餅店的廣告, 即刻又諗起昨日見到個個靚靚袋喇! 不過, 咁大個天使/魔鬼蛋糕, 就算張氏夫婦加埋老爸老媽都食唔晒啦... 哈哈, 係我最煩惱的時間, 忽然想到了大家姐一家四口呢... 立即致電大家姐問佢地今晚有無節目, 無既話, 未可以一齊食飯兼一齊吃蛋糕囉...

不過, 煩忙到不得了的姨甥仔同姨甥女又點會無節目呢, 放左學唔係學呢様就要學個樣呢... 星期五嘛, 放左學就要先學彈琴, 再學打乒乓球, 最快都要九點先返到屋企... 聽到家姐講及佢對仔女的Schedule, 其實都諗住放棄了... 哈哈, 及至跟家姐提及其實一心都係想一齊食蛋糕only... 佢就話九點後當甜品都OKo架...

係喎... 九點後先攞個蛋糕上去同佢地食都OK喎... 橫點張先生今晚有約, 都係得張師奶一個人係屋企... YEAH! 行去家姐屋企都係十數分鐘嘛, 就咁話啦, 我今晚九點到....

說畢電話, 即刻走到美心訂蛋糕啦... 唉! 原來要換o個個購物袋係要買兩個蛋糕再加錢先得o架!? 嘩, 兩個蛋糕!? 點食得晒呀... 問過之後, 原來可以買蛋糕劵, 係今年年底前換蛋糕食就OK... 哈哈, 好呀, 好呀, 張師奶當然要照原定計劃做啦... "一個魔鬼蛋糕今晚要, 另外買一張劵, 再加錢換袋呀, 唔該!!"

俾完錢以後, 店員問張師奶係唔係先攞蛋糕劵同購物袋走... 張師奶因為想俾個靚靚袋媽咪同大家姐睇下嘛, 就決定剩係攞蛋糕劵走ONLY... 其他野嘛, 今晚先一次過攞啦...

在商場內走了一圈, 再次走過美心餅店, 忽然看到門口Display 的兩個購物袋都除掉下來了, 心中忽然有一陣擔心呢!? 哎呀!? 點解會咁既, 唔通無晒貨!? 咁我今晚攞蛋糕時, 會唔會攞唔到個靚靚袋架!

掙扎了好一陣子, 再次走入美心餅店, 問到店員是否已幫自己預留購物袋今晚提取... 那個服務員姐姐真的很好呀, 可能佢見張師奶好擔心既樣啦, 佢就同張師奶講一早已經幫我留起一個了... 不過, 個袋實在太多人喜愛, 佢地就連Display 那兩個袋都要除下來給客人了, 因為已經無貨喇! 留俾張師奶那個嘛, 剛剛是最後一個新貨, 絕對唔係Display, 叫我放心今晚蛋糕同靚袋袋一齊攞....

哈哈哈! 好開心呀! 原來自己今日咁好彩呢...

晚飯時間, 叫左老爸老媽落茶餐廳開飯, 吃了個美味到不得了既鐵板什扒餐, 就諗住一齊上去家姐屋企食蛋糕呢... 唉! 誰不知老爸又再次孤癖發作說不去呢... 沒法子也不打緊吧, 張師奶跟老媽一齊去吧!!

先到美心餅店取蛋糕吧... 在檢查蛋糕和購物袋時, 店員就是跟張師奶說, 他們的店舖已經無晒購物袋了, 仍然未知何時返貨呢...

哈哈! 師奶仔心態, 張師奶覺得自己好似中左獎咁呢... YEAH!