2010年11月21日 (星期日)
感恩, 恩晞BB昨日食左兩次退燒水, 今早已經無發燒了, 太好了吧!
今天晚上, 眾表哥表姐們仲由天水圍過黎探訪這個小BB添, 熱鬧到不得了... 當表哥表姐係到玩既時候, 恩晞BB就係望到佢地實一實, 哈哈!
恩晞BB, 等你大個D, 你就可以同表哥表姐一齊玩架喇!
昕昕表姐抱.... 哈哈! 不過, 其實都唔係抱... 因為恩晞BB係挨住咋...
女麻女麻同三個外孫, 一個內孫的合照...
尋找方向
2010年11月20日 星期六
恩晞BB發燒了...
2010年11月20日 (星期六)
一直以來, 張師奶都希望按日期的先後慢慢發佈網誌... 但係, 由於要照顧小恩晞的關係, 已經唔似以前咁自由, 實在有太多網誌都未能編寫得切...
不過, 今天的經歷, 因為我呢個媽咪怕自己遲左會唔記得D詳情, 所以務必要迫自己要寫左先...
11月20日, 正正是張恩晞兩個月大的日子... 踏入兩個月, 第一件大事嘛, 就是要開始打針囉... 因為恩晞BB要打針的關係, 女麻女麻昨晚已經來到我地屋企作準備... 哈哈, 準備乜野? 其實都無乜特別既... 只係驚我地兩個搞恩晞BB唔掂, 佢黎做我地既SUPPORT囉...
預約打針既時間為上午九點十五分, 為怕恩晞BB扭計, 就是一早便為她食奶的時間作計算... 八點幾幫恩晞BB換片著衫, 準備揹帶出街之際, 恩晞BB出奇地扭計大哭... 真的, 之前幾次用揹帶出街, 恩晞BB都係定到不得了的... 今次食飽飽又應該唔係眼瞓, 唔知點解, 就係不停咁大哭... 女麻女麻話, BB有時係有感應架, 可能知道要去打針咁話喎... 吓? 係唔係架? 至於爸爸呢, 佢就話可能恩晞BB知道有D野會發生咁話... 點解? 因為見到咁多重要人物同佢一齊出街咁話...
九點鐘出門口, 行了一段路, 恩晞BB就開始瞓覺... 到了診所, 替恩晞BB登記... 接過了姑娘開俾恩晞的覆診咭, 聽到了姑娘叫"張恩晞"的名字時, 作為媽媽的我感覺有一點點奇怪... 什麼奇怪? 係呀, 真係唔識得點樣形容, 也許, 當看到同聽到"張恩晞"呢個名字, 就是確定了她已是一個獨立的個體, 有自己一個身份吧... 不像她家姐般只, 可以被叫做"莫慧芳之胎"這樣子... 霎時間, 媽媽再一次想到了在天家的小霜兒...
一直等到十點幾, 恩晞BB就是在睡在爸爸揹著的揹帶上, 瞓到見醫生時都係瞓緊覺... 醫生替恩晞作了點簡單檢查, 當然要到今天的重頭戲啦... 打針時間到了, 今天嘛... 左邊吉一針, 右邊吉一針, 仲要口服一個架...
當恩晞BB仍然瞓緊覺之際, 醫生就是先吉了左脾一針... 嘩, 忽然間俾人吉一針喎, 恩晞BB當然係成個醒晒大哭啦... 仲係哭緊之隙, 醫生又在右脾吉一針... "哇, 哇, 哇..." 恩晞BB就係咁樣俾醫生吉左兩針喇... 口服那個嘛, 就是要爸爸同恩晞BB先到姑娘室休息十分鐘先再食... 媽咪去邊? 只可以返出去等囉... 因為姑娘室唔可以坐到咁多人喎...
作為媽咪既我, 走出診症室, 就是跟奶奶談了一陣剛才恩晞打針的情況... 等了好一陣子, 竟然看到爸爸從醫生房走出來喎... "吓!? 仲乜出返黎既? o個支口服既食左喇? 乜唔係會叫我入去咩?"... "頭先姑娘在醫生房門口叫過你, 話見你唔到喎"... "咩呀! 我一直都坐係呢邊喎"... "可能診所太多人, 姑娘望唔到你就當你行開左..."
唉! 無睇住恩晞BB食個支口服劑, 作為媽媽的我不期然有點點失落呢... 至於恩晞呢... 由佢係醫生房俾爸爸抱出黎的一刻開始, 佢就係瞓番覺喇...
下午時份, 由於張師奶要再一次到婦產科醫生處作進一步檢查的關係, 張氏夫婦就出外去了... 及至六點幾返回家中, 恩晞BB仍在睡覺中... 不過, 無幾耐, 當恩晞BB醒來開始扭計之際, 我們全屋人, 包括爸爸, 媽媽, 女麻女麻, 公公, 婆婆, 都摸到恩晞BB有點兒發燒了...
發燒, 當然要食藥啦... 恩晞BB第一次食藥水, 幸好得女麻女麻係到幫手吧, 如果唔係, 真係唔知點算好... 女麻女麻一手攬住佢, 爸爸就攞住藥水針筒... 恩晞BB一邊大哭, 個口仔就含住D藥水唔肯吞... 女麻女麻又要捉住佢一邊鼻仔迫佢吞... 恩晞BB吞左又反胃吐返D藥水出黎, 爸爸又要再喂過... 唉!! 就係咁樣, 搞左一大輪先食到D藥水...
食到D藥水落肚仔當然係第一步吧了... 接下來, 就是藥力發作, 恩晞BB開始不停咁扭計, 不停哭... 哭到無聲無氣....
自從恩晞BB出世以來, 實在, 對於這個寶寶的哭聲, 儘管她是放聲大哭如拆天一樣, 張師奶也是很忍得, 唔攬唔抱... 但係, 只要當她哭得連聲音也發不出來時, 作為媽媽的我, 就是覺得她是何其淒涼了, 心嘛, 就是點點的痛起來了...
今天晚上, 就是這樣子了... 哭得連聲音也沒有, 樣子好像很辛苦似的... 經過兩三個鐘頭多的攬攬抱抱, 恩晞BB最終也瞓著了... 但係, 由於退燒藥水係四個鐘頭食一次的... 即係話, 恩晞BB瞓唔夠那幾個字, 我地又要整醒佢食第二次藥... 頭先的CYCLE又要重新開始...
正當我這個媽咪在奶奶面前話覺得恩晞BB好慘, 好淒涼之際... 奶奶就是說: "吓... 呢D少兒科罷了..."
係呀... 張師奶都知道... 求主加力, 讓恩晞BB快D退燒, 明天唔使再食藥... 又求主讓我們作父母的有智慧, 有耐性懂得如何照顧, 如何教導恩晞BB, 讓我們作一個好的管家...
2010年11月19日 星期五
傷口有問題嗎??
2010年11月20 日 (星期六)
一個星期過去, 又到了返診所覆診的時間了…
再次接受超聲波檢查, 滿以為吳醫生會說一切安好, 不用再回來覆診的… 可是, 從電視螢光幕上再次看到了數個黑色陰影既位置, 從吳醫生一些奇怪既表情, 張師奶就是知道, 應該有點點問題吧…
檢查完畢, 吳醫生第一條問題就是問, “仲有食中藥嗎?”…
張師奶嘛, 當然是急急的回應, “無喇! 你要我停晒D中藥嘛… 之前未食晒都唔敢再食喇!”
吳醫生續說, “明白, 除了中藥以外, 有無食過D乜野特別野!?”
"無呀… 醫生, 有什麼問題嘛…”
“剛才你都可能睇到啦… D黑色陰影位置又出現番, 即係再有積血情況… 咁耐而來, 有無發燒, 肚痛!?”
“無呀…”
“其實呢個情況真係ABNORMAL, 不過, 都諗唔到乜野原因… 可能係荷爾蒙失調, 但係你又餵緊人奶, 唔可以隨意開藥俾你… 如果下個星期再叫你返來覆診, 我又相信情況應該唔會有什麼大既改善…”
“吓!? 醫生, 咁即係應該點呀?”
“或者再觀察下先啦… 可以預約返來覆診, 但係, 應該都會係咁…”
離開診症室, 張師奶就是有一點點迷網吧… 即是怎樣呢? 這樣子有問題嗎? 如果第日想再有小朋友, 會有問題嗎? 一大堆問題係自己腦海中…
一輪思考過後, 當然係諗唔到任何野啦… 不過, 就是想到了遠在英國既DR. SUEN… 我想, 應該嘗試問一問DR. SUEN 吧…
感恩, DR. SUEN 實在太好了吧, 電郵寄出了還未夠一天, DR. SUEN很快就是給張師奶回覆了… 答案嘛, 就是說情況也許根餵人奶有關, 現階段不用過份擔心喔!2010年11月12日 星期五
嘩… 咁多禮物o既!?
2010年11 月13日 (星期六)
遠住在法國的好朋友KALI知道自己十一月會回港工幹, 早在九月尾的時候, 就已透過FACEBOOK留言說要在回港時探望我這個媽媽和恩晞BB了…
話咁快, 十一月已到… KALI媽媽已回港了….
實在, 之前KALI已提過買左一D禮物送俾恩晞BB, 但係, 張師奶真係無諗過係咁多囉, 唔怪之得, KALI媽媽話佢半個喼都係恩晞BB既野啦…
仲有呀… 多謝阿HANS 整既鮑魚美食, 正呀!!!!
嘩! 好靚既鞋仔呀....
張師奶剩係掛住睇D禮物完全無理過恩晞BB喎... 有相為証添!!!
D禮物係送俾恩晞BB架嘛, 當然要同恩晞BB一齊影相啦!!!
你地睇下杜溫姨姨幾衰, 特登要恩晞BB露大脾喎...
當我地係出面玩之際, HANS 就係廚房為我地準備美食...
嘩!!! 鮑魚多士呀!!! 好好味架!
今天的晚餐....
少不了的大合照....
KALI話上個月無法出席滿月宴, 而家同我地飲杯喎... YEAH!
2010年11月9日 星期二
傷口滲血… !?
2011年11月10日 (星期三)
昨天晚上, 由於恩晞BB剛好瞓著覺, 張師奶就是趁機沖涼去…
可是, 當張師奶脫去上衣時, 就是發現肚皮上的傷口在滲血喔… 怎麼辦? 怎麼辦?
真的驚到不得了喔!
此時此刻, 張師奶只懂大叫張先生… 同時間, 心中就是想, “是傷口爆裂嘛!?” … “會有事嗎?”
感恩, 每當張師奶驚張慌亂得不知所措之際, 張先生就是一貫的保持冷靜…
“先出來看看傷口, 好嗎?”
“表面看來應該問題不大吧… 用防水膠布先貼住, 明早再打去醫務所看看應該如何處理吧… 繼續沖涼, 但係小心傷口, 應該可以了…”
早上致電醫務所, 由於吳醫生今早只在尖沙咀那邊註診, 就是說, 張氏夫婦也得到尖沙咀走一趟吧…
預約時間為上午十一點半, 等了不到半小時的時間就得接見了…
經吳醫生檢查過後, 就是說問題應該不大, 傷口應該沒有爆裂, 可能係線頭開始溶掉所造成吧…
看畢醫生嘛, 跟張先生吃了個吉野家, 爸爸上班去, 我這個媽媽嘛, 就是回家繼續揍女喔….
星期六再見, 到時候再睇一睇吧!
2010年11月6日 星期六
產後檢查…
2011年11月6日 (星期六)
不經不覺, 原來生產了已有六個星期的時間了… 六個星期過去, 就是說張師奶係時候到診所走一趟作一次產後檢查吧…
再次踏入婦產科診所, 看到身旁一個二個大肚婆時, 看著她們的大肚子, 頓然間覺得她們很幸福喔… 小生命在肚子裡轉來轉去的感覺很得意吧… 可是, 張師奶又好像對大肚子的感覺有一點點陌生, 好像沒有大過肚子喔… 哈哈!
甫入診症室, 跟醫生談過一會後, 就是要作超聲波的檢查… 六個星期了, 可是子宫內的積血仍然未清? 醫生就是問張師奶有沒有吃過什麼旺血食物, 中藥等…
中藥!? 有喔! 張師奶有吃過喔… 當醫生聽到以後, 就是說可能跟服食中藥有關吧…
要怎麼樣? 就是要張師奶停服所有中藥加吃消炎藥喔…
一個星期後回去覆診….
訂閱：
文章 (Atom)