尋找方向
2011年1月24日 (星期一)
由昨午從診所回家以後, 張師奶就是不明所以的打噴嚏, 流鼻水, 心想, 也許是由於天氣嚴寒吧…
今天早上, 如常的上班, 奈何, 由十點多開始, 身體開始不受控的發冷了, 同時間, 自己的呼吸讓自己知道有點熱了, 可能是發燒吧….
撐, 撐, 撐… 一直捱到十一點半鐘, 做畢手頭上的工作, 張師奶投降了, 要回去看醫生了…
在回家的路程中, 坐在巴士上, 就只是覺得身體越來越不像是自己的一樣, 所有的地方都在痛…
好不容易去到診所, 就是整個身體已跟自己分開一樣… 感恩, 得老爸幫忙先行到診所替我登記, 好讓我回馬鞍山以後不用久等, 等了好幾個人已到自己了… 讓醫生探熱, 得出的結果嘛, 就是102, 103 度了…. 唉! 發燒了, 自己竟然病倒….
唉! 今次的真麻煩了… 發燒了, 就是要跟恩晞BB完全隔離吧… 此時此刻, 只寄望爸爸真係已經好番, 晚上可以照顧今早仍未退燒的恩晞BB吧…
回到家中, 張師奶就是第一時間把自己困在自己的房間, 免得跟恩晞BB交差感染吧!
求主加力, 求主醫治我們一家!
2011年1月23日 (星期日)
早上起來為恩晞BB探熱… 唉! 還是未退燒呢… 沒法子, 由於唔知係打針的反應, 還是真的病倒了, 也得帶恩晞BB去診所一趟…
九點鐘致電診所預約, 就是說要到十一點多才有位置, 也好吧, 我們也沒有選擇的餘地… 在帶恩晞BB到診所之先, 爸爸自己都未完全好返, 自己也要到診所一趟… 爸爸九點半鐘出門去, 還未到十分鐘已回來了… “吓! 睇完醫生了嗎?”…. “ 唔係呀, 人太多, 要一句鐘後才有得睇…”
唉! 我想, 真的是流感高峰期了… 大人又好, 小朋友又好, 那一間診所都是迫滿了求診者…
十一點鐘, 張先生先行自己看醫生去, 張師奶嘛! 就是自己一個先推恩晞BB過去兒科診所那邊登記吧!
嘩… 甫到診所, 張師奶只可以”人山人海”來形容吧… 好不容易才把嬰兒車推入診所, 登記以後, 就是告知說要再等四十五分鐘才有得睇…. 唉! 根本沒有法子吧! 也得等了… 於是乎, 就是把嬰兒車推出門口等, 免得在診所中坐, 直接咁吸住D病菌…
十一點半, 張先生過來了... 等上了差不多四十五分鐘的時間, 就是回去登記處, 問一下仲有幾多個才到恩晞BB…. 聽到姑娘的答覆時, 張師奶真的是呆住了, 只在想, “唔係呀嘛!?”…. 哈! 已經等了四十五分鐘, 姑娘說, 恩晞BB前面仲有十五個人…. 吓!? 十五個… 再等一句鐘可以嘛!?
走出診所, 跟張先生說了, 最終也都沒法子吧… 都等了這麼久, 來回屋企診所也要時間, 把恩晞BB推來推去也沒有意思, 只有繼續等, 繼續係街邊食風 (因為診所門外就是大街馬路喔)….
最終, 下午一點, 終於叫到恩晞BB的名字了… 見到醫生, 跟他說過了恩晞BB的情況, 得出的答案是, 恩晞BB應該是病倒了, 可能是被爸爸傳染, 也可能是流感高峰期不敵細菌, 跟前幾日打針應該沒有關係… 沒法子喇, 病病嘛, 食下藥啦!
看畢醫生已一點多了, 亦到了恩晞BB肚餓的時間了… 仲要等攞藥, 張師奶就是叫爸爸先推恩晞BB回去喔, 因為, 等攞藥應該也要等一段時間吧! 由於爸爸仲係唔舒服的關係, 張師奶就是致電公公婆婆求救吧, 希望有人可以幫下手咁…
唉! 攞藥了… 是四大支藥水… 恩晞BB要食四支藥水… 快快的俾過藥費, 張師奶就是以最高的速度趕回家去, 因為, 想在恩晞BB食奶之前先餵藥呢! 說實話, 十二點幾, 當張氏夫婦仍在等睇醫生的期間, 我們已經肚餓到不得了, 但由於怕醫生會隨時叫名, 又唔知可以買乜野食好, 最終也是捱住肚餓… 諗住睇完醫生就買埋野食返屋企, 但係, 一諗到想餵恩晞BB食藥先, 也都選擇先回家去, 搞掂晒阿女先理我地個肚了…
回到家中, 爸爸先幫恩晞BB沖涼去, 然後嘛, 就是到了殘酷的餵藥時間… 我想, 今次真的跟以往不同, 因為, 是四支藥水, 四支唔同顏色的藥水…
唉! 張師奶夾實恩晞BB, 爸爸嘛, 就是捉開口仔餵藥去… 至於我們的恩晞BB, 當然係一邊大哭, 一邊用盡自己的力量去掙扎啦… 我想, 我這個做媽媽的真的太無用了…. 看到恩晞BB不斷掙扎大哭, 作媽媽的, 一邊夾實佢之餘, 一邊就是唱歌說話的引開佢注意, 同時間, 想到了是自己沒有好好照顧佢令佢病倒了要咁慘時, 張師奶兩行眼淚不受控的流出來了…
哎呀! 真係覺得自己好無用… 其實, 張師奶好清楚呢個係小病, 100度, 101度係低燒而已, 到他日發高燒或出疹時都唔知點算喇!
唔知呀… 或者因為今次係張師奶自己帶佢出去, 第一次在爸爸不在場帶佢出去就搞到恩晞BB病的關係, 張師奶真係好內疚, 真係覺得係自己問題吧…
恩晞BB, 對唔住呀…. 都係媽咪唔好…
2011年1月22日 (星期六)
今天, 張氏夫婦一早就是要帶恩晞BB到健康院去, 作四個月大的檢查喔!
四個月大的恩晞BB可以磅重喇! 兩個月前, 我地有一包米咁重, 今次呢? 我地平均一個月重左一磅咁上下, 而家有十三磅重喇! BB四個月大, 係健康院要開始做一D成長評估了, 例如, 頸仔有無力呀, 手仔開始握住小東西未呀!?
當姑娘問到張氏夫婦有關恩晞BB左, 右耳的聽力問題時, 哈, 我地竟然唔識答… UM, 因為我地覺得恩晞BB都算耳靈, 有時瞓左覺, 少少聲佢都成個”扎”起. 所以我地又無乜專登TEST佢左, 右耳的反應喎… 而係那一刻, 當張師奶係恩晞BB左邊叫恩晞BB 時, 我地呢個寶寶就係當佢媽媽無到一樣… 姑娘話, 咁未就係唔得喎…
離開健康院已十點幾十一點了, 到商場趕及吃過早餐, 就是收到FACIAL 姐姐的來 電… 哎呀! 係喎, 早幾個星期以前, 張師奶預約左做FACIAL, 不過, 完全唔記得左… 點好呢? 點好呢?
由於張先生要留守屋企做公司野的關係, 如果留低恩晞BB俾佢照顧, 可能會阻住爸爸做正經野… 沒法子的話, 可能就要取消做FACIAL的BOOKING了… 正當我呢個媽媽猶疑之際, 跟住在將軍澳的家姐通電話, 竟然俾我發現原來婆婆約好了二家姐話會帶恩平表哥過去喎…
由於張師奶做FACIAL的地方正正係二家姐屋企樓下的關係, 如果婆婆會入將軍澳, 我地未可以帶埋恩晞BB出去, 到時候, 張師奶去做FACIAL, 婆婆就可以幫忙睇住恩晞BB, 而爸爸嘛, 就可以休息下, 又可以專心做公司野囉…
就係咁樣, 我地一行四人(公公, 婆婆, 我呢個媽咪, 表哥仔)就帶埋恩晞BB出發到將軍澳去… 搭馬鐵的時候, 恩晞BB又唔肯瞓車仔喇, 點算? 咪就係我呢個做媽媽既”頂”硬上咁抱住佢囉… 嘩! 真係唔多掂呀… 由於張師奶無乜力的關係, 恩晞BB咪就係越來越低囉…
好彩, 轉搭地鐵時婆婆有位坐, 可以抱住恩晞BB…. 恩晞BB唔知係唔係覺得地鐵人多好新奇, 由馬鞍山一直到將軍澳咁遠, 佢竟然完全無瞓過覺…
差不多四點到達將軍澳, 當我呢個媽媽抱住恩晞BB到FACIAL店同姐姐打招呼時, 佢仲好叻叻咁同姐姐笑添… 將恩晞BB交過俾婆婆, 張師奶就嘆世界做FACIAL, 而囡囡嘛, 原來唔係好似張師奶先頭想像得咁完美喔, 無媽咪係身邊既恩晞, 縱然有公公婆婆陪住, 去到瑤姨媽屋企, 可能因為陌生而令佢好驚而大哭呢!
五點鐘, 收到恩平來電問到做FACIAL做到幾點, 一心諗住問下恩晞BB的情況, 得到既消息就係恩晞BB大哭到拆天, 不過, 由於佢已同瑤姨姨落左商場玩的關係, 佢都唔知恩晞BB點喔!
唉! 點呢? 到底恩晞BB點呢? 五點半, 做畢FACIAL立即致電婆婆, 當婆婆接到電話, 就是急急的問, “你做完FACIAL未呀?”… “做完喇! 仲乜呀??”… “好慘呀! 你個女唔知係唔係認屋呀, 去到姨媽屋企大哭收唔到聲… 姨媽佢地落左街佢瞓左一陣, 一瞓醒, 望下望下又哭, 我同老豆而家同佢落左商場呀!”… “好啦, 好啦, 我返過來架喇!”….
張師奶用最快的速度由一期走到二期商場, 見到恩晞BB時, 佢就係兩行眼淚咁望住媽媽大哭! 哎呀! 那一刻, 真係好心痛, 好內疚, 好似自己走左去玩但係無理個女咁… 把恩晞BB抱住了, 就是不斷逗她玩, 逗她笑… 還好, 有媽媽陪住, 再次去到姨媽屋企, 恩晞BB又好似無乜野喎, 都OK呀!
滿以為一切安好, 誰不知, 世事真係無咁完美o架! 餵好奶, 又俾恩晞BB瞓了一段時間, 瞓醒以後, 都好好咁同姨丈表姐玩左一段時間, 但係, 慢慢地開始越來越扭計了… 最後, 我們就是快快地食飽野就同恩晞BB返屋企…
一心諗住換好片片就走了, 點知恩晞BB係瑤姨媽間房越哭越勁, 已經將佢抱返出廳啦, 最終, 也都大哭到把之前食D奶奶全吐出來… 唉! WENDY姨媽抱住佢仲搞到一褲都係… 唉! 之後嘛, 就是姨丈一直抱住恩晞BB盡力CALM DOWN佢囉… 不過, 姨丈要開車嘛, 婆婆同張師奶輪流咁抱住恩晞BB, 佢都係架車到”E E AR AR”… 唉! 點解會咁架? 平時恩晞BB一上車就瞓覺啦, 點解唔瞓仲扭計架!?
好不容易返到屋企樓下, 當張師奶見到張先生既時候, 真係好似見到救星一樣呀… 第一時間, 當然係將阿女俾爸爸抱啦! 跟住就係同爸爸講恩晞BB今日成個下午點樣點樣… 搭LIFT 返屋企的時候, 爸爸就是說, “點解恩晞BB咁既樣既, 好似未驚完咁喎… “
返到屋企, 我地就係好似平日咁, 整理好D野之後就開始餵最後一餐奶奶啦… 唔知點解, 食畢人奶之後, 到爸爸餵恩晞BB奶粉時, 恩晞BB就是左扭右扭… 最後, 又再一次的吐奶…. 忽視間, 張先生好嚴肅的跟媽媽說, “老婆, 攞個探熱計過黎呀!”… 唔知點解, 我這個做媽媽的, 忽然就緊張起來了… “100 , 101 度… 阿女發燒…”
此時此刻, 張師奶有點點呆住了… 腦海中不斷思考, “ 發燒??? 死啦! 幾時開始架… 唔怪得知佢頭先咁扭計啦… 哎呀, 點解我呢個媽媽會咁大意… 我唔應該帶佢出街… “
當我這個做媽媽的亂到不得了, 都唔知自己想做乜同應該做乜的時候, 張先生就是很鎮定地一樣一樣野咁做… 餵藥, 沖溫水涼, 再餵奶… 搞完一大輪, 恩晞BB終於合上眼睛瞓覺喇! 雖然唔係好似平時咁瞓得咁好, 但係, 總算肯合埋眼睛瞓覺呀…
定下來以後, 張師奶就是不停的跟張先生道歉, 因為, 係我無好好咁照顧個女… 第一次無爸爸陪住咁帶恩晞BB出街就搞到佢發燒了… 唉! 我想, 我實在唔太適合做媽媽吧…
整個晚上, 恩晞BB都瞓得唔好… 實在, 恩晞BB由十點幾返到屋企, 到兩點幾先叫合埋眼睛瞓覺, 凌晨四點, 爸爸媽媽又要整醒佢食藥….
唉! 看到恩晞BB好辛苦的樣子, 張師奶真的很內疚, 是我的過錯吧! 希望餵了這轉藥水, 恩晞BB可以退燒無事吧! 求主醫治!
2011年1月20日 (星期四)
恩晞BB四個月大, 又要到打針既時間喇… 張氏夫婦一早已經請定假… 早上起來, 餵好奶就出門去…
去到診所… 嘩! 真係流感高峰期, 超多人等睇醫生…
等了差不多一句鐘的時間, 終於到我地喇… 係呢個時候, 恩晞BB都等到瞓著覺喇… 不過, 當支針一吉係大脾仔時, 當然係成個醒晒, 繼而大哭啦… 到另一隻腳仔, 姑娘都未吉落去, 只係搽火酒紙, 呢個BB已經哭定先, 超搞笑… 不過, 吉完針針之後, 恩晞BB好快就笑返, 仲潦姑娘笑添…
一如以往, 都係爸爸抱住佢係藥房等埋食支口服囉…
我諗, 不得不提既係, 今日發生左件好驚嚇, 但係好感恩既事呀… 就係離開診所上到去到商場, 爸爸想揾番個奶咀蓋, 當張師奶企定定係到搵袋, 聽到張先生話個蓋係自己衫袋之際, 張師奶都未定神, 就係眼尾看到爸爸掉開奶咀蓋, 急步的跑了幾下攬實恩晞BB… “吓… 仲乜呀!?”…
實在, 唔使問, 就是估到恩晞BB差一點點趺落地了… 定了下來之後問個明白, 原來爸爸摸到奶咀蓋係衫袋, 當一手抱住BB, 一手諗住拿奶咀蓋之際, 恩晞BB來一招”蜈蚣彈”把爸爸嚇得要死… 當張氏夫婦嚇到都未定神時, 呢個恩晞BB仲以為係玩, 好開心咁笑添… 感恩, 真係好感恩, 感恩爸爸可以及時把恩晞BB抱住, 感恩BB無跌倒, 否則, 真係唔敢諗呀…
由於張先生仍然抱恙的關係, 實在, 沒有太多精神去照顧恩晞BB… 幫BB沖過涼, 餵過奶以後, 一點多, 連 LUNCH都無吃, 張先生也都瞓著了… 由於張師奶今晚要參與供應商的晚宴關係, 諗到張先生在晚上要自己一個睇住BB, 也就由得他先瞓一陣吧, 誰不知, 他就是瞓上了好幾句鐘, 到五點幾起來就是再看醫生去…
原先有諗過叫公公婆婆過來幫忙的, 但由於張先生說自己可以應付的關係, 也就沒有向公公婆婆求救… 到張先生看過醫生以後, 不明所以地比之前更加疲累, 到我們諗住求救之際,婆婆又已在WENDY姨媽屋企…
唉! 看到恩晞BB 好似有少少發燒, 張先生又唔舒服, 張師奶又點出去呢… 最後, 就是留守家中喔!
2011年1月7日 (星期五)
自從恩晞BB出世以後, 要坐下來寫一篇日誌真的不是易事... 每次當媽媽滿以為恩晞BB瞓著就開電腦準備寫日誌的時候, 哭聲就是隨之而來...
2010年12月有很多日誌還未趕上發表, 在2011年的今天, 在2011年發表的第一篇日誌, 就是要跟自己的外婆, 恩晞BB的太婆道別, 感恩外婆在早年已信主, 我們盼望他日在天家相會...
傍晚的時間, 當張師奶仍然在公司加班之際, 罕有的收到舅父的來電, 滿以為接通電話大概就是他找不到老媽所以來電傳話, 誰不知卻是告知外婆離世的消息...
"外婆今早離開了, 你知道了嗎?"... "吓? 我唔知道"... "媽咪無同你地講嗎!? 外婆今早離開了, 作為外孫的你們要送上花牌.. 想問清楚你們的名字怎樣寫..."
說了好幾句話, 一向都唔聽話的手提電話再一次的無電把電話掛斷了... 致電回家, 告知舅父致電事宜, 並叫老媽幫忙回電...
回家路上, 腦海中不斷浮現著小時候外婆俾錢我們買燈籠的片段, 隨之而來就是對上一次見外婆就是恩晞BB的滿月宴... 的確, 在這個多月期間, 知道外婆身體欠佳, 情況越來越差, 進出醫院, 療養院好幾次... 可惜是, 照顧著恩晞BB的我們實在難以放低在家的恩晞BB而前往探望... 我想, 最令張師奶感到內疚的, 就是連累老媽也因著要幫我們湊著恩晞BB的關係, 難以有時間探望外婆, 最多只可以在星期六, 日的時間趁我們不用上班才出去看看外婆...
踏入家門, 看到老媽就是在我家忙碌的煮飯, 仍然未有提到外婆的事宜時, 張師奶真的倍感內疚... 痛失母親的老媽就是要像沒發生什麼事, 仍是在我們家為張氏夫婦忙於照顧恩晞BB同預備晚餐... 的而且確, 對於老人家要離去的事宜, 大家都應有著心理準備... 但是, 在事情真的要發生的時候, 我想, 難過是必然的... 做女兒的, 又怎會不傷心呢!?
實在, 張師奶覺的老媽的EQ很高... 她就是那個什麼也為我們想的媽媽... 今天晚上, 因著張氏夫婦都要加班的關係, 食晚飯已是九點多的時間... 席間, 問到外婆離去的詳情... 原來, 外婆是在凌晨的時份離去的... 凌晨兩時多, 老媽接到阿姨的來電, 說收到醫院來電說外婆心跳轉弱, 換了衫搭的士三點多到達醫院也是遲了, 外婆已離去... 由於舅父上了大陸的關係, 大家就是等至五點多, 待舅父也從大陸怱怱趕回港看過外婆最後一面才送外婆到殮房去... 除了老爸老媽, 阿姨姨丈, 舅父舅母, 兩個表哥表姐以及表姐夫也有到醫院去... 我想, 老媽未有讓我們知道, 就是想著我們要照顧恩晞, 第二日又要上班的關係, 所以沒有告知我們吧...
人長大了, 面對著生老病死, 真的覺得生命就是這樣子... 當我們正享受著面對著新生命來臨的喜悅時, 我們亦是要面對著生命老去的現實...
感謝神, 讓我們仍然有生命氣息, 求主叫我們珍惜活著的時候, 珍惜所擁有既一切...
外婆, 謝謝你, 因為你養育了一個好好的女兒(我媽媽), 謝謝你過去咁多年來的愛護, 我深信你已回到天家, 回到父神身邊... 他日我們必在天家再聚...!
