尋找方向
2011年7月11 日 (星期一)
今早起來, 由於是工作天的關係, 加上張師奶噚晚瞓得其差遲了一點點起床, 刷牙過後, 就是在房間客廳中左穿右插…
恩晞BB嘛, 就是在客廳的遊戲毯上行行企企.. 正當張師奶好專注咁執拾緊自己個返工袋之際, 忽然間聽到恩晞BB叫 “媽.. 媽.. 媽..” 的叫聲, 當我望向恩晞BB的同時, 呢個BB都係望住我呀…!?
此時此刻, 坐在恩晞旁邊的婆婆就是說, “哎呀! 你叫媽媽呀!?”…
張師奶嘛, 就是同樣望住恩晞BB問, “你係唔係叫我呀!?”… 恩晞嘛, 她就是左望右望咁哈哈大笑… 跟住又無再叫 “媽媽”LU…
咁, 到底佢係唔係叫我呢!?
2011年7 月10日 (星期日)
教會, 對張師奶而言, 是我的另一個家, 屬靈既家, 一個分享分憂的地方…
今天, 一如張師奶如料, 姐夫站到台前分享, 聽到姐夫所說的一言一語, 張師奶哭了, 眼淚就是不受控地流下來了…
由於家姐需要多休息, 今天嘛, 就只有姐夫帶著小朋友返教會去… 聽到姐夫回想這幾天所發生既彷如惡夢一樣, 我想,就是真的, 是個不折不扣的惡夢…
星期三的放工時間, 家姐回到家中坐低正在除鞋之際, 就是剎那間左邊身失去知覺, 不能動彈, 未能說話… 恩同成長了, 也許是家姐的眼神讓恩同知道要打電話給爸爸, 恩同就是好快咁打電話俾姐夫, 簡短的跟爸爸說道, 媽咪唔舒服到唔郁得, 講唔到嘢, 快D返黎… 當時, 姐夫就是在屋苑既停車場泊緊車… 姐夫憶說當一刻, 心裡就是想到 “唔係咁大件事呀!?”… 要是唔郁得, 講唔到說話, 不是心臟問題, 就是腦部問題…
姐夫以最快的速度趕返屋企, 一打開門, 看到坐在廳中的家姐, 他就是害怕, 不敢相信, 因為家姐左邊面就是已鬆弛下來, 口齒不清, 此時此刻, 打電話叫過救護車以後, 姐夫就是跟恩平恩同一同禱告…
實在, 聽到姐夫說, 看到太太當一刻好想說話, 但係什麼都說不出, 從家姐的眼神知道她好驚, 好無助時, 張師奶想到了家姐屋企的所有擺設, 不難幻想出當一刻的情景… 此時此刻, 張師奶的眼淚就是不斷地流下來了…
整件事上, 姐夫不忘數算著神的恩典… 感恩家姐在返到屋企先有事, 感恩妹妹成長了, 平時一向說話欠缺組織既恩同打電話俾爸爸時說話簡潔清楚… 感恩在急症空的等候時間唔係太長, 好多檢查都好快咁處理到.. 感恩威院好快咁收症上到病房… 感謝父神保守住家姐的性命健康等等等…
在過去呢幾日的檢查, 所做過的大型檢查都是正常, 找不到今次中風既原因, 不過, 就正如張師奶昨日所寫到一樣, 到底是喜是憂?
實在, 由於姐夫同家姐都是做醫護界的關係,所見過相類似的情況越多, 比一般人知得越多,了解得越多時, 就不難讓他們擔心更多… 這一類的中風個案, 在接下來的三個月至半年的時間是高危時間, 因為可能會突然復發…
因此, 生理上的檢查以外, 心理上的壓力可說是同樣的重… 席間, 姐夫提到家姐的情緒都要關注, 因著今次的事件後, 家姐有時也都有軟弱的時候, 實在, 有時感覺得好像一切也完了一樣, 自己唔能夠再好好照顧屋企, 也可能成為屋企的負擔, 我想, 這一切的憂慮就是可以想像, 可以理解的…
姐夫說畢分享以後, 牧師領禱, 提到父神一直保守祝福呢個家庭, 係呢段婚姻中, 家姐姐夫同心走過當初認定恩平病症以後的打擊難處, 他們的努力, 恩平既成長, 為好多有自閉症小朋友既家庭帶來咗無限既祝福, 今天再次面對艱難, 求主引領, 求主讓我地看到, 讓我們認定, 一天的難處, 一天當就夠了…
係呀! 求主施憐憫, 求主保守祝福…
說實話, 聽過了姐夫的分享, 張師奶的心情一直都是低沉的… 一條曾經問過自己無數次既問題再一次的出現, “信主的人, 就要比他人經歷得更多嗎!?”…
也許, 張先生看到張師奶一直不在狀態, 就是不住的問我是否唔舒服, 最後，張師奶答道, “如果係唔舒服, 應該係個心唔舒服!”
張師奶覺得無助, 張師奶覺得乏力, 我知道家姐害怕, 家姐軟弱, 但係我唔知可以點樣…
在由天水圍回家的路段, 就是跟張先生說, “不如帶恩晞BB去睇下姨媽媽囉!”
跟家姐通過電話, 知道她精神尚可, 就是決定今晚到姨媽媽屋企晚飯去, 食乜野, PIZZA 啦!
感恩, 恩晞BB這個開心寶寶就是為姨媽媽帶來點點歡樂吧! 說實話, 氣氛是有點低沉的, 不過, 能夠一家人這樣子坐下來一同分享生活鎖事, 分享食物美點是何等美事, 求主保守祝福!
2011年7月8日 (星期五)
今天晚上, 張師奶原本相約了主人朋友吃晚飯去的… 不過, 由於主人要加班, 張師奶想趁中間既空擋時間先往醫院走一趟, 跟主人提到相關事情之後, 主人 為免我要走來走去, 就是決定將飯局延期…
正當張師奶想往巴士站到醫院去, 致電姐夫, 就是說正幫家姐辦理出院手續, 今早的磁力共振檢查一齊正常, 中風之事就是無根可尋….
我想, 這樣子的檢查的結果到底是喜是憂呢!? 實在, 就是沒有答案吧… 找不到主因, 就是說身體上找到到什麼可見的大問題, 但是, 家姐的確中過風, 找不到主因, 就是說身體出現隱性疾病, 彷如背負著一個計時炸彈…
實在, 這兩,三天的時間, 張師奶就是一直用WHATAPPS 跟家姐溝通, 不時將恩晞的照片傅給姨媽媽睇… 不過, 由姨媽媽回家以後, 家姐就是一直也沒有回覆了…
是身體累了要休息嗎? 我想, 回到家的姨媽媽, 就是也需要調整一下自己的心情吧!
說實話, 張師奶是擔心的… 正如昨天所提到既, 家姐所經歷過的恐慌, 我深信唔係其他人可以想像既… 這些實實在在的感覺是跟自己一世的…. 就正如當日 亦霜離開張師奶的事上, 有一D感覺, 一D恐懼, 我想, 就是連自己都難以理解…
一直以來, 儘管跟大家姐的年齡有一段差距, 但是, 我們倆姊妹的感情就是較深… 在過往的日子中,無論在自己學業上, 或是生產亦霜既經歷上, 是大家姐跟自己走過最艱難的時刻… 今天, 到家姐有事時, 張師奶可以如何呢!?
求主幫助… 求主施憐憫, 祝福…!
2011年7月7日 (星期四)
由於公公赴美旅遊的關係, 今天是婆婆要自己照顧恩晞BB的第一天…
因著家姐昨晚入院的事, 張師奶第一眼見到婆婆就是一大堆問題, “你噚晚O係家姐屋企幾點走呀!? D小朋友點呀!? 有無見到姐夫呀!? ….”
“無見到姐夫… 不過有同佢通過電話, 知道佢差唔多會離開醫院, 我十點幾就走喇!? D 小朋友唔肯瞓, 成日都話OK叫我走… 佢地等埋DADDY先… “
離開屋企, 張師奶個心一直就是掛住掛住… 一直走往巴士站, 就是嘗試打家姐個手提… 可惜, 未能接通… 也許, 電話真是無電了…
返到公司… 做咗一陣嘢, 張師奶又開始心掛掛… 十點幾鐘, 再打電話… O… 接通了, 電話筒內傳來家姐的聲音… “喂… 家姐!? 你見點呀!? “…. “係… 醫生睇緊… 一陣先再打電話俾你… “
就是這樣子, 張師奶只得怱怱掛斷電話… 等了好一陣子, 家姐也沒有來電…
直至將近午飯時間, 接到了張先生的來電, 說牧師剛才來電想問問家姐最新的情況, 張師奶就是跟爸爸說出今早跟家姐對話的情況, 也許, 過一陣再打過去睇下如何吧…
只可惜… 電話再次未能接通…
一整天, 就是這樣子一整天也接不上… 唉!? 情況如何呢!? 怎麼不來電!?
好不容易到了放工時間, 就是致電姐夫… 感恩!? 接通了… 姐夫將聽筒交到家姐手中… “家姐!? 點呀!? 見點呀!?” … “而家好D啦!?”… “ 你係邊間病房呀!?” … “七樓囉… 得喇!? 無乜野呀… 你快D返屋企睇住張恩晞啦… 今日得阿婆一個人… 唔使過黎喇!”…
掛斷電話, 就是跟張先生聯絡相量是否過醫院去…
感恩, 感謝神就是讓我當上張師奶這個角色… 張先生嘛, 聽到我所說的, 就是說他自己先回去看恩晞, 而我嘛, 就是可到醫院走一趟吧…
就是這樣子, 我們分頭行事… 張師奶致電回家跟婆婆說好會先到醫院走一趟後, 就是坐巴士到威院去…
甫到威院門口, 致電姐夫問到病床號碼, 就是到病房找家姐去…
入到相關病房, 一直找著病床號碼, 怎麼是獨立病房, 家姐要隔離嗎? 通過兩道自動大門以後, 就是看到坐在病床上的家姐… 同時間, 就是有一對教友夫婦都在探病中… 的確, 看著坐在病床上的家姐滿心感恩, 家姐能言能語, 雙手也可郁動, 實在難以相像家姐昨天中風了… 我的家姐不就是 跟我兩晚前所見的家姐一樣嗎!?
可是, 當家姐同姐夫講及昨日所發生的一切, 以及跟住下來要做的所有檢查, 張師奶就是知道同想像到當中他們所經歷過的恐懼和往後下來的擔心…
期間, 恩平同恩同既契爺契媽都到來了… 聽到家姐說昨日中風那刻覺得自己一齊都完了… 當下就是想到往後下來的日子會如何, 小朋友如何時, 張師奶就是完全想像得到家姐那一刻的恐懼…
實在, 儘管家姐同我們有說有笑, 實在內心所經歷既實在不是他人可以理解想像到的吧…
求主保守明天的磁力共振的檢查, 求主讓滿有智慧既醫生護士幫助, 求主撫平家姐內心深處的恐懼, 求主看顧祝福這個家庭, 阿門!
2011年7月6日 (星期三)
今天, 對張師奶而言, 實在彷如坐過山車一樣... 實在不懂如何落筆... !? 求主施憐憫, 祝賀我地既家庭...
7月6日, 是公公跟伯父們到美國外遊的日子, 因著遠在美國的堂弟結婚的關係, 一班長輩們就是難得的一同赴美出席婚宴, 伯父, 伯娘, 公公, 四叔, 五叔, 五嬸... 婆婆同四嬸嘛, 就是因著湊孫的關係未能同行而已...
因為公公要離港足足一個月的時候, 張氏夫婦就是專登請了一天年假到帶恩晞到機場送機去... 目的嘛, 很是簡單, 就是想公公婆婆開心....
公公去旅行, 恩晞BB可以去送自己機, 應該開心吧... 同時間, 恩晞BB又可以同未可同行既婆婆一同回家, 不至於要婆婆送完機之後自己一個回家去咁冷清, 這就是張氏夫婦請假的心意...
一如張氏夫婦所料, 公公是開心的... 送完機以後, 為咗想婆婆也開開心心, 張氏夫婦就是跟婆婆到帝京酒店吃個自助午餐去...
實在, 今天一整天的行程, 張師奶也有跟WENDY姨媽回報, 好讓姨媽媽羨慕吓嘛...
晚上六點多既時候, 當張師奶就是已安坐家中的時候, 看到手機五點多有個MISS CALL... 咦!? 是姨媽媽喔... 致電回去, 無人接聽... 到七點多, 張師奶再嘗試致電姨媽媽的手機... 今次接通了, 一心帶住玩既心情想問姨媽媽係唔係想請我地食晚飯之際, 接電話的是姨丈...
"喂... 姐夫!?"
"係呀..."
"家姐呢!? 係唔係你隔離呀!?"...
"UM... 係..."
"咁你叫家姐聽呀!?"
"UM... 家姐唔係好舒服, 我同佢而家坐緊十字車去急症室..."
"吓!? 仲乜呀!?"
"你家姐可能中風..."
"吓!? 中風? 家姐喎....!???"
"UM.. 係... 家姐頭先係屋企左邊身郁唔到... 講唔到野... 我地而家去緊急症室... 去到醫院再打電話俾你地..."
怱怱被姐夫掛斷了線... 張師奶已被嚇得不知所措... 急急由房間走出客廳... 跟婆婆同張先生說出剛才所聽到的...
"點呀!? 咁而家可以點呀!?"...
抱著恩晞既張先生就是說, "冷靜一點... 姐夫頭先係唔係話會再打電話黎!?... 等一陣子吧!?"
實在, 跟姐夫通過電話以後的半句鐘時間, 張師奶根本心不在焉... 腦海中就是不斷地問... "到底是怎麼回事... 中風!? 這不是只出現在老人家身上嗎!?"... "會跟婆婆上次的情況一樣嗎!?" ...
屋企電話響起, 張師奶就是以最快速度接聽... 是姐夫的聲音... "芳芳... 我同你家姐已經到咗急症室, 而家就係等醫生啦... 你家姐頭放工返到屋企忽視間左邊身郁唔到... 講唔到嘢... 而家都無乜可以做到... 祈禱啦... 我諗最緊要睇住D小朋友... 同埋幫我地打個電話俾牧師一齊祈禱啦... 因為我個電話無乜電喇!?"
掛斷電話... 跟婆婆同張先生講過一切, 跟牧師也通過電話, 接下來的就是想到, 係唔係要到家姐屋企走一趟, 看看恩平恩同呢!? 此時此刻, 婆婆就是說, "等我上去睇佢地啦..."
婆婆出去以後, 張師奶就是一直的擔心著呢樣, 擔心著那樣... 到底家姐點呢... 恩平恩同又OK嗎!?
這剎那, 張師奶就更是想到, 萬一家姐有乜事, 會話俾公公知嘛... 今天公公才第一天出發去旅行... 點樣好... 可以點呢!?
直至九點多十點, 終於忍不住再致電姐夫, 就是說家姐到達醫院後情況緩和了, 手腳有番知覺, 可以輕微郁動, 都講得到D嘢... 而家威院收症上病房... 聽到了這些, 就是告訴姐夫說婆婆就是在他們家睇住恩平恩同, 免得姐夫擔心在家的小朋友...
此時此刻, 張師奶就是求主施憐憫.... 求主恩待家姐, 醫治家姐...
2011年7月5日 (星期二)
由於公公明早就出發到美國旅遊一個月的關係, 今天嘛, 姨媽媽, 瑤姨姨同我都是不約而同的想同公公一起晚飯去…
正當張師奶BOOK好晒位通知各人 已BOOK好位以後, 就是收到姨媽媽的來電, “查實老豆媽咪佢地今晚好似唔得閒喎… !”
“吓!? 仲咩唔得閒呀!?”
“你唔知咩, 我噚晚打電話俾佢地, 好似話六嬸既媽媽離開咗, 佢地諗住去躬個躹嘛!?”
“吓!? 我真係唔知喎.. 佢地無同我講喎… 如果佢地出去, 邊個睇住張恩晞呢!?”
“真係唔知喎, 都係打電話返去問下先啦!”
跟婆婆通電話以後, 就是知道原來佢地打算剩公公出去, 婆婆留守家中看住恩晞BB所以無同我地講…
不過, 正正因為咁既安排, 即係話, 公公今晚同唔到我地食飯啦… 咁仲出唔出去食飯好呢 !?
哈哈.. 或者因為大家既心都預咗今晚出街食飯啦… 最終, 我地都係決定今晚唔使婆婆煮飯, 照樣出街食…
放工回家途中, 就是收由屋企打過來的電話… 哈哈, 原來姨媽媽已經係我地屋企同恩晞BB玩緊喇… 電話筒中傳來恩晞BB大叫大笑既開心聲音… 也許, 因為姨媽媽成日都黎睇恩晞BB既關係, 恩晞BB就係好鍾意姨媽媽…
在酒樓晚飯, 恩晞BB開始有D眼瞓扭計, O係車仔都瞓唔夠十分鐘, 就是熱醒咗繼續同姨媽媽同姨丈玩…
哈哈… 快樂寶寶!!
2011年6月16日 (星期四)
好一段日子沒有更新網誌了... 原因嘛!? 就是就抽不了時間吧...
踏入五月天, 由於公司有同事放產假去, 就是自告奮勇咁幫忙幫忙... 再次投入跟單行列, 回想剛畢業投身社會既種種細節, 過去的個幾月時間, 縱然受過客人無理取鬧, 什麼"你明不明白!? 明? 你明乜呀!?", 被客鬧自己係"人頭豬"等也不能反擊...總括而言, 還是忙得開心快樂!! 也許, 張師奶仍然是個簡單快樂人吧, 感恩!
昨天早上, 從電台新聞聽到土瓜灣唐樓大火有人死傷, 就是一直都未有坐下來看過電視新聞的種種細節... 今天早上, 趁有時間看看報紙... 看到一家五口慘遭大火吞噬... 媽媽跟她肚裡既BB, 一歲和六歲小朋友死去... 爸爸危殆... 十八歲既姐姐為救妹妹燒死... 看到文字間既形容, 看到少女爸爸流淚的照片, 想像著他們各人逃生的情景, 張師奶既眼淚不自覺地流下來了... 求主安慰在地上的家人
人長大了, 看到生命中的無常, 實在覺得我們實在太渺小, 我們實在太有限吧! 生命, 這一刻所擁有的, 就是可以在下一刻就完全失去了...
讓我們好好珍惜所有, 時常感恩!!!
