尋找方向
2012年5月30 日 (星期三)
今天午飯時候, 坐在隔鄰既陳總送上一塊蝴蝶酥… 係曲奇四重奏呀… 即係謝寧在九龍城開嗰間呢…
問起陳總, 原來佢係在沙田買架, 原來曲奇四重奏而家在沙田開咗分店喎…
之前張師奶一直好想買返屋企俾公公婆婆試下… 但係餅店在九龍城, 位置太唔方便張師奶喇… 所以呢, 話買話買, 一直都未有機會買…
知道咗沙田有分店, 今日又準時放工, 就算爸爸未放工, 張師奶竟然選擇自己一個人去沙田買曲奇餅…. !?
一直以來, 張師奶都好想試佢盒雜錦味曲奇, 由於想趕返屋企同恩晞食飯, 一入餅店, 就是二話不說買了一盒雜錦曲奇…. 哈! 知道幾多錢一盒嗎? 係HKD 148.00 呀…
張師奶真係好少會咁豪爽… 算啦! 就當政府多俾嗰二百蚊用黎買咗呢盒餅啦!
返到屋企, 同婆婆講話呢盒餅係專登去沙田買俾佢食既… 婆婆好開心呀… 見到佢哋開心, 張師奶就開心喇!
2012年5月29日 (星期二)
自從恩平身體出現了狀況以後, 張師奶無時無刻也記掛著這個小孩子, 記掛著家姐這個家庭…
過去數星期, 張師奶 一直也未敢與家姐通電話, 怕自己會在不適當的時間打擾他們… 跟他們聯繫嘛, 就是靠whatapps message 或他們所發出的電郵從而得知哥哥和他們的情況…
這個星期原是哥哥的六年級畢業營, 我想, 對每一個小朋友而言, 這個畢業營也會是小學生涯中 一個特別, 一個有意義的環節…. 當然, 哥哥也不例外….
上一個星期, 家姐姐夫正為是否應該讓哥哥參加畢業營發出代禱信…. 經跟醫生相討和跟學校溝通後, 最終, 他們也決定讓哥哥一試… 家姐姐夫嘛, 就是會每晚到營地跟老師檢討哥哥每天的情況…
星期一在家晚飯的時候, 手機突如其來的一振, 是來自家姐的whatapps message… 看畢內容以後, 不禁從心裡 “唉”一聲… 內容嘛, 大致上是提以哥哥在前往營地時情緒有點不穩定, 難以呼吸… 到達謍地似乎穩定了, 晚餐過後卻有感到不適… 最終, 家姐姐夫決定帶哥哥回家去…
看到這樣子的結果, 張師奶很是心痛… 真的, 哥哥對這個畢業營滿有期待. 張師奶之前諗, 也許, 一個開心既環境對哥哥有正面影響呢…. 奈何, 事與願違…. 再想到當姨姨的我有如此想法, 作為父母的會如何呢…
自哥哥升上六年級以後, 跟其他小學生一樣, 父母就是為著孩子選擇邊間中學問題而張羅… 經過參加多間學校的開放日, 終於選定幾所心儀學校, 連串既筆試面試…. 哥哥最終憑自己的實力考上一所心儀中學, 一般家長心目中的名校… 說實話, 在張師奶眼中, 哥哥真的很叻, 很令人驕傲… 儘管他自小確定患有一個病, 一切學習理應較其他人難以起步, 難以有進步, 但是, 哥哥就是一日一日的進步… 家姐姐夫一直倚靠神, 他們的經驗經歷, 感動了很多相像的家庭…
昨天晚上, 看過家姐的whatapps message, 張師奶就只有留言寫道, “家姐, 撐住呀… 實在, 我唔知道可以講乜野, 有乜野可以做, 但係, 我們就是時時刻刻的 記掛著你們, 為著哥哥, 為著你們一家禱告”…
今天早上, 返到公司查看電郵, 收到了一封由姐夫發給數個教會摯友的代禱告… 內容大致上跟昨晚whatapps message 差不多… 不過, 當中他們提到哥哥有自殺念頭, 又寫上 “我們累了, 很想停下來作點休息但不能夠… “ 看到了這個, 張師奶的眼淚不由自主地掉下來了… 真的, 我想, 他們真的很累了…. 上星期再次讓哥哥試返學時, 情況好像了有好轉了嘛…. 怎麼, 一天的時間, 這個入營的第一天, 又好像是把他們拋下來, 一切從零開始呢…
主呀! 求你揮動你的手去醫治哥哥, 求主保守祝福這個家庭, 我們深信一切都在你掌管中…. 阿門!
2012年5月23日
好一陣子無到過黃大仙八喜吃晚飯了… 今天, 在工作間忽視間想到了八喜的沙茶炒河… 好想食呀!!!
跟張先生通了電話, 爸爸竟然說, “想食咪去食囉!”…. “吓!? 唔通兩個人去咩? 掉低公公, 婆婆同恩晞?”… “唔係, 你打個電話返屋企, 可能婆婆都有興趣出黎行下呢?”….
張師奶想了想, 也好吧, 問問之嘛!
接通了電話, 問婆婆今晚請他們到黃大仙吃飯好嗎 ? 哈哈, 婆婆竟然一口答應… 也許, 這個答案答得太快了… 就是說: “吓!? 你哋要帶住恩晞喎, ok 嗎?”… “有乜問題呀!? 我哋就得, 你就一定唔得喇! 頭先阿公已經話今日星期三兩蚊車錢帶你個女出街, 我唔理佢之嘛…”
就係咁, 我哋相約晚上七點食晚餐啦… 六點半, 我同張先生都先後到了黃大仙地鐵站, 致電婆婆手機, 原來佢哋已經行緊商場呢..
恩晞一見到daddy , mummy 就係佢架私家車上坐住黎jump… 勁開心! 見到佢咁樣 , 就係叫張師奶最開心架喇…
因為今晚約埋yoyo姨媽食飯, 所以我哋在商場行咗一陣先入八喜攞位… 真係好, 八喜有好似大家樂那些bb 椅, 方便極了…
吃什麼? 沙茶炒河, 肉燥飯, 炒扁豆, 擔擔麪…. 嘩! 有年幾兩年無黎過呢到食野喇… 好味!
2012年5月20日 (星期日)
老人家常說, 要幫小朋友戒片, 就務必要把握夏天的時間… 點解? 我諗係因為冬天著衫多會麻煩d 掛…
恩晞踏入一歲八個月, 也是戒片的時候了… 奈何, 這份功課真的很難….
今天早上,恩晞起床幫佢換掉尿片, 張師奶諗諗下, 就索性唔俾片片佢著… 因為, 按好多老人家或朋友既經驗之談, 唔俾片片著, 等佢賴下尿係必經階段喎… 好啦, 也就試試看吧!
八點鐘, 恩晞飲成晒240ML奶, 於是乎, 張師奶咪由八點半開始, 每十至十五分鐘就同佢坐一次痰罐仔囉… 明明摸到呢個小朋友係肚仔脹張, 應該係有尿尿的, 呢個張恩晞呢, 成日都答”無呀!”…. 張師奶望住恩晞同佢講, “唔係喎, 有尿尿喎, 屙啦!.... 真係無咩? ”
哈, 呢個小朋友 竟然答媽媽話, “著留片片先…”
當一刻, 聽到呢番說話, 張師奶忽然間無明火起… 好忟憎… 一向欠缺耐性既張師奶可能當時都有少少變樣啦, 恩晞竟然走入房拍醒爸爸… 都啱時候, 張師奶呢個時候都係唔適宜對住恩晞架喇…
張先生見我咁忟憎, 就是說, “媽咪, 唔急得喎, 慢慢黎啦… “
真的, 事後諗番轉頭, 張師奶都唔明白點解自己會咁忟憎…. 我想, 感恩的, 是父神為我安排了這個丈夫… 一個欠缺耐性的張師奶, 就是配上一個有無限耐性的張先生….
有時候, 實在是難怪恩晞咁鍾意爸爸既…
