尋找方向
2012年8月8日 (星期三)
話說, 今日下午十二點幾, 張師奶在公司收到婆婆的來電… 看到來電顯示係婆婆電話號碼時, 第一時間, 張師奶就是有少少擔心了… 因為公公婆婆在張師奶工作期間都慣於唔打電話來的… 上幾次接到電話, 就是說恩晞唔舒服之類…
接通了電話, 婆婆就是說今早半推半氹咁帶咗恩晞去快圖美影証件相… 點知到攞相時先知得八張相, 仲要無相底… 如果要相底另加十蚊! 婆婆話當一刻聽到要十蚊就無要… 但係, 返到屋企, 諗下諗下又唔知店舖會唔會delete 咗個record 喎, 所以就打電話黎問我哋點好…
嘩…. 七十蚊八張証件相!? 上星期屋苑個優惠價係十蚊十二張相呀!? 唉….
張師奶於是乎問婆婆輯相影得靚唔靚, 婆婆話ok... 無笑又無喊咁, 正正經經咁囉… 跟張先生相討以後, 就是說花掉那十蚊吧!!
昨晚回家, 公公婆婆將証件相攞俾張師奶睇… 一打開信封, 張師奶第一個反應就是, “吓!? 婆婆… 呢個相好靚嗎?? 個頭成個傻婆咁飛起晒既!?”…. “吓!? 我見佢又無笑又無喊咁正正經經咁嘛… 呢張第三張架喇… 佢又甩咗一條辮仔喎, 跟住咪索性除埋另一條辮影囉…”
“吓!? 但係呢張相真係唔得喎… 學校見到都唔收佢啦… 個頭亂成咁…”
實在, 張師奶知道唔應該怪責公公婆婆的… 因為, 兩老就是知道恩晞唔肯影, 千方百計咁氹佢影的… 在老人家心中, 証件相, 笑的固然是好, 起麻佢無喊肯坐定定俾人影呢… 平時公公婆婆乜都慳, 但係同恩晞飲茶嘛就一d 都唔慳… 恩晞話要食腸粉, 包包就立即帶佢去茶樓… 上星期日, 公公影証件相都係用咗五蚊, 有十二張相… 但係恩晞呢, 七十蚊都係得八張… 兩老就是這樣子愛恩晞… 我這個當媽媽的, 就是希望恩晞都能感受到公公婆婆既愛, 長大以後, 就是一樣的愛公公婆婆…
不過, 都係嗰句呢… 呢輯証件相, 恩晞個頭髮真係唔得囉… 哈哈哈!
2012年8月7日 (星期二)
不經不覺, 恩晞就快踏入兩歲了…
踏入兩歲, 除咗之前所提及過既反叛期以外, 相信, 就是要為恩晞明年入學作準備了… 張氏夫婦從來都不是追求什麼入讀名校既家長, 張師奶只希望恩晞童年係健康, 簡單, 開心快樂既…
不過, 我們也得替恩晞搜尋一間我哋覺得可以的學校吧… 大前提: (一) 近… 方便公公婆婆照顧! (二) 基督教背景… 張氏夫婦希望恩晞可以在滿有基督教氣氛既環境中成長…
對於信仰, 張師奶覺得需要俾恩晞空間… 他日她長大以後, 有自己一套思想, 可能根本唔會接受媽媽這一套… 只係, 在她未懂得選擇之先, 張師奶就是想將自己確信是最好的與恩晞分享. 當然, 張師奶好希望呢個都係恩晞所覺得啦…
求天父為恩晞安排一間合適佢既學校, 等佢可以開心快樂咁成長!
2012年8月6日 (星期一)
下午點幾兩點鐘, 收到了姨媽媽傳來之whatapps 圖片, 係一張姨媽媽同恩晞好開心既合照同埋恩晞在酒樓既照片… 哈哈! 原來姨媽媽同咗公公婆婆同恩晞去飲茶呀… 真好!
下午三點幾, 收到了另一些圖片…. Ooooo, 恩晞同姨媽媽, 婆婆在巴士上既!? 仲要係過海隧道巴士!? 去邊到呀!? 哈哈, 原來恩晞跟姨媽媽返屋企, 佢哋去緊姨媽媽個新居呀!
四點多, 再收到了一張照片, 是恩晞在表姐房玩既相片呀…
五點半, 收到了另一張照片, 是婆婆, 恩晞同表姐在餐廳內一齊影既合照… 原來佢哋去開餐喇! 下午茶當晚餐是也…
六點多放工時候, 致電婆婆手機, 就是說已在回程的巴士中… 既然公公婆婆已吃過了晚餐, 張氏夫婦就是先撐個枱腳才回家去吧! 是日撐枱腳時間同地點, 七點半, 商場內的大家樂是也…
八點半前返到屋企, 在客廳中唔見恩晞既!? 公公就是說她自己在房內食緊奶… 媽媽走進恩晞房間, 真係瞓在床仔食緊奶奶喎… 把奶樽遞回媽媽後, 呢個恩晞就是掛住dadddy 問, “daddy 呢? Daddy 未返黎呀!?”… 爸爸在房外聽到恩晞既提問, 就是回答說, “唔係呀! Daddy 返咗黎喇!”… 恩晞見到daddy 當然開心啦, 就是在她的床仔上跳跳跳… 然後就是跟daddy 說: “去姨媽媽到呀! 去街街呀!”…
實在, 聽到恩晞自己跟爸爸媽媽匯報自己今日去過邊, 做過乜野是何其樂事… 因為, 這彷彿証明了恩晞又長大了一點喇…
2012年8月5日 (星期日)
自從上次恩晞病過以後, 感覺上好似長大了, 但係, 同時間, 變得比之前易扭計….
今天早上, 跟恩晞返教會, 我同張先生還笑說恩晞比之前無咁怕陌生人了… 見到d 唔認識既叔叔同姨姨都無喊, 肯垂低頭仔同人打吓招呼…
誰不知瞓了個午覺就開始不停咁扭計… 由於管理處有個拍攝証件相優惠, 就是諗住同恩晞去影張相留用作報學校用啦… 點知, 呢個小朋友一入管理處就失控咁喊, 完全安靜唔到, 最終, 張氏夫婦只好放棄呢個拍攝機會了…
好啦… 唔影相, 就諗住行去大家樂食晚餐啦… 等咗成十幾廿分鐘先找到位置, 點知呢個恩晞呢, 一坐低又失控咁大喊, 最終嘛, 就係搞到張師奶完全無晒心機, 全人類折返回家…
返到屋企, 呢個小朋友又好似完全無事一樣, 不知玩得幾開心… 但係, 去到食飯既時候, 食食吓飯又開始扭計了.. 好少少過後又扭計大喊… 真係呢… 呢個恩晞令到一向有耐性既張先生也得走開冷靜一下…
晚飯過後, 原本一直留守在廚房洗碗既張師奶就是間唔中聽到恩晞既喊聲, 忽然間, 張先生走進來, 就是說叫與張師奶交換位置… 張師奶抺乾雙手, 出到客廳就係見到恩晞雨行眼淚加鼻沸攬住阿公… 見到張師奶就要媽咪… 張師奶抱佢一陣, 同佢玩下其他野佢又收番聲… 原來頭先恩晞想攞我哋放埋咗一邊既玩具, 爸爸同佢講要大個d 先可以玩, 呢個恩晞就放聲大哭… 到媽媽同佢講話嗰d 佢未識得玩, 呢個小朋友又無乜野喎… 轉個頭就走去同公公講, “嗰d 恩晞未識玩架…”
實在, 對於恩晞唔肯拍攝証件相, 怕人既情況令張氏夫婦有點點沮喪… 原本見佢今早在教會既表現就是滿心歡喜的, 奈何, 到管理處卻如此怕人… 始終佢都要影証件相嘛, 唔肯影咁可以點呢? 唉…
一諗到呢d, 真係頭都大晒…
Whatapps俾姨媽媽同佢講恩晞既情況, 姨媽媽就是回覆”terrible two”作怪… 細問之下, 是指兩歲開始既反叛期到了…
Oooooooo…. 小朋友開始扭計反叛了! 求天父俾張氏夫婦更多既耐心, 智慧如何好好教導恩晞, 作一對稱職既父母, 管家…
2012 年8月2 日 (星期四)
當上了父母, 我想, 總是想給兒女們最好的… 不過, 到目前為止, 張師奶也不清楚何為最好…
身邊好多朋友都會為著小朋友報讀什麼playgroup, 返邊間幼兒班而張羅… 也許, 唔知道張氏夫婦係未殺到埋身未知驚還是怎樣, 我們真的不太在意這些… 實在, 張師奶好簡單地諗, 就是希望恩晞健康快樂, 唔想佢咁快就在壓力下成長…
Playgroup, nursery… 實在, 張師奶確信這些對小朋友有一定的幫助, 促進他們成長… 但係, 可能張氏夫婦唔夠與時並進吧! 當日在屋村長大的我們都是未有這些喔! 有時候就是在想, 點解現今的小朋友需要呢d 呢? 已經成為必需品了嗎?
也許, 恩晞他人長大後會問媽媽, ”點解我無上過playgroup 架!?” … “點解我無上過什麼什麼興趣班呀!”… 媽媽就是會答道, “媽媽想給你的, 是一個簡單快樂的童年喔!”
2012年8月1日 (星期三)
正如張師奶之前提過, 為免要公公婆婆加班照顧恩晞, 放工以後, 張氏夫婦就是會盡快回家接更去… 實在, 知道湊一個小朋友殊不簡單, 體力心力實不可少, 真係好辛苦的呢!
今天嘛, 爸爸放工有節目啊! 是他的興趣之一, 與同事出外拍攝黃昏加夜景…
哈哈! 終於到爸爸出外抖抖氣了… 說實話, 每次張先生出外, 當張師奶諗到有段時間要自己一個照顧恩晞時, 就不禁有些膽怯了… 不過, 而家恩晞大個咗, 懂得互動溝通, 照顧佢比細個時好多了… 同時, 想深一層, 張師奶真係唔可以咁自私既… 實在, 張先生有好一段日子無試過攞這個”晚上”假期了, 過去幾個月, 張先生都是遷就張師奶俾我外出先的… 也許, 張先生比起張師奶始終有耐性得多, 所以嘛, 恩晞就是鍾意爸爸多好幾萬倍… 有時見到爸爸對恩晞的好, 張師奶都會諗, 如果我係張恩晞, 自己都會鍾意爸爸多過媽媽既…
由於婆婆仍然唔係太舒服的關係, 原本佢諗住留在我家幫幫手的, 但係都被張師奶勸回家去了… 八點四十五分開始, 就是張師奶同恩晞的獨處時間… 跟恩晞一邊食車厘子, 一邊看看書, 玩玩手提電話的遊戲, 也到了九點半恩晞要瞓覺的時間了…
跟恩晞刷過牙, 洗了臉以後, 就是把這個都有少許扭計的小寶貝回床仔瞓覺了… 我想, 恩晞都很照顧媽媽喔! 今天晚上, 很快就自己瞓著覺了… 媽媽嘛! 仲可以好悠閒咁睇”怒火街頭2”添… 哈哈!
