2011年2月1日 (星期二 – 年廿九)
張師奶一向都鍾意同人迫, 所以呢, 行花市對張師奶而言都係一個幾重要既環節… 今個農曆新年多咗恩晞BB, 一心都諗住未必有得行花市架喇, 因為, 根本無可能帶佢出去同人迫, 佢又未知花市係乜野, 帶佢出去就無乜意思…
同張先生傾開偈, 發現原來今日已經係年廿九喇… 由於恩晞BB尚在天水圍渡假中, 今天晚上, 其實張氏夫婦又無乜特別野要做, 我地可以把握時間行一行花市喎… 如果唔係, 明晚湊番恩晞BB返屋企, 我地根本唔會有時間同有機會出去走走… 就係咁樣, 張氏夫婦決定今晚要拍一拍拖, 行個大運呀…
由於張先生下班後想先到深水涉揾佢至喜愛既模型, 所以嘛, 張師奶放工以後也有時間自己行行街… 走到旺角鬧市, 花園街, 真係好有新年氣氛呀… 周圍都係賣緊新年野, 感覺真係好好… 我想, o係呢D大時大節, 確要出外走走才可以真真正正感受到呢種過年既喜慶…
過年嘛, 張師奶都想買對新鞋仔俾自己… 睇左睇右, 試左好幾對鞋, 終於總算有收穫呀… 由於人太多的關係, 只係睇鞋試街都花了一句鐘了…. 八點鐘左右, 跟張先生先行醫醫肚, 就繼續行埋另一邊的花園街… 哈哈, 我諗, 今天除左買到新鞋, 紅瓜子, 毛巾, 俾恩晞BB的小鞋子, 小髮飾以外, 最叫張師奶開心既係, 我地買到超抵既水果呀…
係乜野??? 係車厘子呀… 四十蚊三磅??? 仲要大大粒…. 點會可以賣到咁平架!?? 之前我地O係超級市場買, 起馬都要廿幾三十幾蚊磅啦… 四十蚊三磅喎… 點可以唔買呀!? 仲有呀… 二十蚊三PACK士多啤梨… 望落去都幾靚架… 仲好香添….
哈哈! 就係咁樣, 我同張先生要攞住晒咁多野去行花市… 真係超重呀!!!!!! 一路行過去花市O個邊, 我地都話, 邊有人咁傻, 攞住咁多野去同人迫花市架… 哈哈! 但係張氏夫婦咪就係傻O個兩個囉…
嘩…. 人潮管制!? 乜原來年廿九都咁多人行花市咩!? 由於張師奶每年都慣於在最尾一日先行花市既關係, 係張師奶心目中, 早一日行應該係無咁多人既… 但係, 原來唔係咁架… 明明都已經十點幾啦, 聽日又未係公眾假期, 真係唔知點解會咁多人!?? 哈哈… 都係一個好好既體驗呀…
每年行花市, 張師奶都會有一個習慣, 就係想買一個Q 版風車, 唔係什麼意頭野, 只係覺得買左風車, O係花市到買過樣實質既野先証明到自己行過花市嘛…. 今年當然都唔例外, 買風車係張師奶唯一既目標… 一路行, 一直行, 點解好似唔係見到好多人攞住既呢? 奇怪… 年年都好多人攞住架喎, 點解咁奇怪架呢!?
一直揾賣風車既攤位, 行到去最後一條乾貨街終於見到了…. 吓!? 六十八蚊一個!? 唔係呀嘛!? 張師奶年年買都係十蚊二十蚊咋喎… 六十八蚊太貴喇… 正當張氏夫婦諗住離開既時候, 發現有另一個攤位都有賣風車, 問一問價錢, 五十蚊一個…. 唉! 太貴喇… 剛才我地行花園街時, 店舖中都係賣三十八蚊吧了… 五, 六十蚊的話實在太貴了… 由於張師奶覺得實在太唔值的關係, 最終, 我們選擇撤退了…
說實話, 係花市買唔到風車, 張師奶真係有一點點唔開心… 也許, 張先生睇到張師奶唔開心啦, 我地選擇再返回花園街, 看看店舖關門了沒有…
由於已經係十一點幾喇, 張師奶實在唔敢抱太大期望… 走到花園街頭, 張先生以箭步走向剛才既精品店看看是否以關門… 哎呀! 好開心呀… 仲未”山”門呀…. 哎呀! 可以買風車呀… 係桃花同桔仔兩者中選擇了桃花作配襯既風車…. 好野! 大功告成… 張氏夫婦真係可以撤退了…
行咗好幾個鐘, 實在, 張氏夫婦已經疲累到不得了… 不過, 今日拍拖拍得好開心呀…
謝謝, 張先生!
好多人o係後邊呀..!?
沒有留言:
張貼留言