擔心…

2011年7月11日 (星期一)

雖然家姐已出院回家休息, 但係, 張師奶對家姐的狀況就總是心掛掛…

今天晚上放工回到家中, 就是問婆婆姨媽媽有無打過電話俾佢, 有無講今日去威院預約的情況如何…

婆婆答道, “打過一次黎, 問老豆心臟有事係幾時發現… 佢話今朝諗住去威院book期之前, 個醫生打電話俾佢叫佢聽日返去見咗佢先喎…”

聽到呢到, 張師奶個心忽然間好像震了一震, 寒一寒一樣… “吓!? 有醫生打電話俾佢!?”…

跟張先生對望以後, 張先生就是答道, “咁可能之前個報告有D野喎…”

婆婆說, “唔知呀!? 佢無講呀! 剩係話醫生叫佢唔好佢BOOK 期住, 見咗佢先…”

也許, 由於之前因著生產的關係都在政府醫院做過多樣檢查, 按一般慣例, 收唔到電話好過收到電話… 因為, 它們只會在發現問題的情況下打電話俾病人…

由於張師奶個心就是這樣子七上八落, 二話不說, 就是站起來, 走入房間打電話俾姨媽媽去…

接過電話的是姐夫, 聽到了家姐的聲音以後, 就是問道, “家姐!? 點呀? 今日見點呀!?”

“OK啦..  無乜野!”

“攰唔攰… 今日BOOK期個到點呀!?

“無呀!? 醫生打電話黎叫我聽日返去見咗佢先, 應該係之前個磁力共振報告揾到D陰影, 確定當日係中風, 聽日返去再睇下點樣講… “

“UM… 明白… 好啦…  我同恩晞BB一齊為你祈禱啦!”

 掛斷電話, 張師奶自己一個坐在睡房中, 實在, 心裡有不安, 有恐懼… “會有咩事嗎!? 點解會咁樣!?” 早兩天就是好地地嘛… 公公出發去美國之前一晚, 姨媽媽就是跟恩晞BB玩得好開心, 恩晞BB一見到姨媽媽就笑笑笑, 姨媽在酒樓食飯時不就是攬住恩晞BB唔放咩… 點解剎那之間會咁樣!??

禱告以後, 冷靜下來以後, 就是走到客廳, 跟張先生以及婆婆說出家姐的情況, 也許張先生看到我的額上刻著”極度擔心”四個字, 張先生就是說, “先唔好擔心, 也許找到源頭可以對正下藥呢!”

實在, 張師奶也都明白這個道理喔! 只可惜, 女人就是女人, 情緒往往成了主導吧!

求主加力, 求主讓醫生有智慧地可以好準確咁分析家姐既病情…  

特別求主看顧家姐姐夫那等待中的憂慮…

一天的難處, 一天當就夠了…  讓我們真的學習放開, 完完全全的交托, 這就是一樣何其深層次的信心功課…  求主祝福保守!