會失去我的媽媽嗎?

2011年2月22日 (星期二)

由於恩晞BB被我們送到天水圍的關係, 張氏夫婦本來就是想在放工以後回去看一看她吧... 奈何, 知道恩晞BB在女麻女麻屋企正在適應中, 張氏夫婦又怕返去睇佢, 讓恩晞BB看到我們會扭計, 就此, 我們狠下心腸, 放工以後最終決定不回去...

因著張師奶近幾日以來一直想到玩具反斗城看看那些"踢踢琴", 也好, 就趁機會到沙田拍拍拖吧... 到反斗城走了一趟, 就是跟張先生決定今天"豪"一餐, 我們到UCC CAFE 食個晚飯吧... 哈哈, 可以切張師奶最喜歡玩的SALAD BAR...實在, 在張師奶大肚期間, 每次到沙田產檢經過UCC CAFE, 張師奶都說生完BB以後一定要到UCC一趟, 勁食一個SALAD喔... YEAH!!!

甫坐下來, 就是點了餐, 就立即出去切SALAD去... 搞完一大輪, 當張先生正為枱上的美食拍拍照時, 就是接到電話來電... 按來電顯示看來, 是張師奶的大家姐喔...

實在, 張師奶一心以為, 可能姐姐從爸媽口中知道我們的恩晞BB渡假去, 又好似上一次咁打電話來話我們好拍拖去吧... 輕輕鬆鬆的接過電話, 換來的卻是叫我沉重到不得了的消息...

"喂... 乜事呀!?" ... 滿以為電話是由家姐打過來的, 張師奶就是輕佻的接過電話...

"喂... 芳芳呀!? 你地係邊到呀!?"... 電話筒傳來的並不是家姐的聲音, 是姐夫沉重的聲音...

"吓!? 姐夫呀!? 仲乜呀!? 我地係沙田..."

"媽咪唔係好舒服... 話行唔到路... 我同家姐而家趕緊過去睇下佢情況如何..."

"咩話!? 行唔到!??? 點會咁架... 得啦! 得啦! 我地好快返黎..."

掛斷電話, 實在, 張師奶已是亂到不得了... 望住坐在對面的張先生, 就是不知所措的問應該點樣...

由於我們所點的食物都剛來了, 張先生就是說快吃快回去... 既然姐夫家姐佢地過緊去睇媽咪, 情況應該可以既, 要張師奶唔好太擔心住, 快快的吃過東西就回去吧...

實在, 張師奶又怎能放心, 又怎能唔擔心... 一邊心不在焉的吃, 腦海中就是想著媽咪情況到底如何... 行唔到路!? 係點樣的一回事!???

十分鐘過後, 再次接到家姐的來電, 張師奶以最高的速度接過電話... 今次, 電話筒內傳來的是家姐的聲音... "媽咪情況好唔樂觀... 佢行唔到路, 口齒不清... 都好可能係中風... 我地已經CALL咗白車..."

"中風!?" ... 什麼中風!? 昨晚媽媽不是好地地的嗎!? 昨晚張師奶仍然跟媽媽見過面, 傾過電話, 媽媽離開我們屋企時仍然跟恩晞BB玩的呢... 及至我致電她告知我們把恩晞BB送到天水圍, 叫她今天務必要好好休息時, 她仍是好地地的... 什麼中風... 是怎麼一回事!??? 

掛斷電話, 張師奶就是不懂說話... 兩行眼淚已完全不受控的流下來... 心裡面就是怪責自己仲乜放工唔返屋企, 仲乜頭先無打電話俾媽咪, 仲乜會唔知道媽咪病, 昨日仲要佢幫我地湊住恩晞BB... 係唔係休息唔夠, 所以咁樣... 中風!? 係唔係以後就會行唔到... 係唔係以後就口齒不清... 係唔係以後就唔能夠同媽咪溝通...

此時此刻, 張師奶已經唔知自己應該做乜野... 儘管枱面既食物飲品都未食完, 未飲完, 張先生就是自己出去結賬, 我們要趕到威院去...

其間, 張師奶已經唔懂得講任何說話, 一直行就是不發一言, 眼淚就是一直在流... 張先生嘛! 就是一直捉緊張師奶那如冰一樣凍既手... 冷靜的跟張師奶說這說那, 一陣子要如何, 無論如何, 無論情況係點樣, 我地都要冷靜... 同時間, 就是提醒張師奶要打電話, 打電話把事情告訴慧瑤姐, 把事情告訴哥哥...    

每講一個電話, 張師奶的聲音就開始抖動, 眼淚又是不再受控... 甫到威院的急症室, 就是看到姐夫跟老爸坐著等候, 原來媽媽那架十字車仍然未到... 姐夫說, 由於媽咪血糖非常低, 情況唔穩定, 醫護人員務必要先落藥穩定媽媽的血糖指數才能開車, 家姐一直在十字車中陪伴媽媽...

等候期間, 就是看到老爸坐立不安, 常問點解白車咁耐... 實在, 我們在坐的都心急的, 但是, 就是要固作鎮定的跟老爸說應該沒問題吧...

大概二十分鐘過後, 一輛十字車駛進醫院了... 看到了家姐, 就知道是接媽媽那架車吧... 看到坐到醫護床上的媽媽, 面色彷如白紙, 頸上掛著嘔吐袋, 跟她說話也就是無力回應一樣, 張師奶實在不知道自己可以如何... 期間, 就是跟著病床行左行右...

由於急症室滿座的關係, 醫護人員往往都不准許我們太多人圍住媽媽的手推床... 始終家姐姐夫在醫院做事, 較我們了解情況, 張氏夫婦就只是走在一旁等候吧... 及至晚上十點幾十一點, 由於我們根本唔知道等醫生要等到幾點, 醫護人員又不斷跟我們說唔好咁多人圍住病者, 加上老爸仍然未食晚飯的關係, 最終就是決定由家姐姐夫留守, 張氏夫婦負責先陪老爸回家去, 同時幫手執拾一下剛才因救護員要入屋而搬動過既家具, 怕老爸會撞倒...

回家途中, 張師奶就是不住的禱告... 求主加力, 求主醫治, 求主安排有智慧既醫生為媽媽檢查, 求主讓媽媽越過今次的難關...

真的, 張師奶真的很害怕...